(ភ្នំពេញ)៖ បន្ទាប់ពីកញ្ញា ធី សុវណ្ណថា ប្រធានអង្គការយុវជនដើម្បីសង្គម អមដំណើរដោយលោកមេធាវី លី ច័ន្ទតុលា បានចូលទៅបំភ្លឺអយ្យការអមសាលាដំបូង រាជធានីភ្នំពេញ ព្រឹកនៅថ្ងៃទី០៧ ខែកុម្ភៈ ឆ្នាំ២០១៧នេះ ពាក់ព័ន្ធនឹងការប្តឹងលោក សម រង្ស៊ី ពីបទបរិហារកេរ្តិ៍ជាសាធារណៈរួចរាល់ហើយ, កញ្ញា ធី សុវណ្ណថា បានថ្លែងប្រាប់អង្គភាពព័ត៌មាន Fresh News ឲ្យដឹងនៅមុននេះបន្តិចថា ការប្តឹងលោក សម រង្ស៊ី ទាមទារសំណងត្រូវបានផ្លាស់ប្តូរពី ២៥ម៉ឺនឡើងដល់ ៥០ម៉ឺនដុល្លារ។
កញ្ញា ធី សុវណ្ណថា បានបញ្ជាក់នៅព្រឹកថ្ងៃនេះយ៉ាងដូច្នេះថា «ការប្តឹងទាមទារសំណងនេះបានផ្លាស់ប្តូរហើយ គឺពី២៥ម៉ឺន ដល់៥០ម៉ឺនដុល្លារ ដោយក្នុងពាក្យបណ្តឹងដាក់ទាមទារ២០០ពាន់រៀល, នៅពេលនេះការបំភ្លឺនៅអយ្យការបានចប់រួចរាល់ហើយ»។ កញ្ញា បានបញ្ជាក់ ប្រសិនបើបានសម្រេចនេះកញ្ញានឹងយកទៅអភិវឌ្ឍន៍តំបន់អារ៉ែង។
សូមជំរាបថា កញ្ញា ធី សុវណ្ណថា បានប្តឹងលោក សម រង្ស៊ី ដោយភ្ជាប់យកករណីដែលលោក សម រង្ស៊ី ចោទប្រកាន់សម្តេចតេជោនាយករដ្ឋមន្ត្រីថា បានសូកប្រាក់ កញ្ញា ធី សុវណ្ណថា ចំនួន១លានដុល្លារអាមេរិក ឱ្យរូបនាងធ្វើសកម្មភាព ប្រឆាំងនឹងគណបក្សសង្រ្គោះជាតិ។ ដើម្បីបង្ហាញភាពស្អាតស្អំ ទើបកញ្ញា ធី សុវណ្ណថា បានប្តឹងទៅតុលាការឲ្យជួយរកយុត្តិធម៌ និង ផ្តន្ទាទោសលោក សម រង្ស៊ី តាមច្បាប់។
កន្លងមកកញ្ញាធី សុវណ្ណថា បញ្ជាក់ថា ក្នុងឱកាសជំនួបសំណេះសំណាលជាមួយសកម្មជនគណបក្សសង្គ្រោះជាតិប្រចាំប្រទេសបារាំង កាលពីថ្ងៃទី១៤ ខែមករា ឆ្នាំ២០១៧ លោក សម រង្ស៊ី បាននិយាយថា សម្តេចតេជោសូកប្រាក់កញ្ញាធី សុវណ្ណថា ចំនួន១លានដុល្លារអាមេរិក....។ កញ្ញា ធី សុវណ្ណថា ចាត់ទុកថា ការលើកឡើងគ្មានមូលដ្ឋានច្បាស់លាស់នេះ គឺជាការចោទប្រកាន់មួលបង្កាច់ ជាការអះអាងដោយបំផ្លើសនិងជាការទម្លាក់កំហុសដោយអសុច្ចរិត ហើយបានធ្វើឲ្យប៉ះពាល់យ៉ាងធ្ងន់ធ្ងរ ដល់កិត្តិយសកេរ្តិ៍ឈ្មោះ និងសេចក្ដីថ្លៃថ្នូររបស់ កញ្ញា ធី សុវណ្ណថា។
លោក សម រង្ស៊ី ត្រូវបានតុលាការកាត់ទោសឱ្យជាប់ពន្ធនាគារ២ឆ្នាំ ពាក់ព័ន្ធនឹងការចោទប្រកាន់ញុះញង់វាយប្រហារ លើឧបនាយករដ្ឋមន្រ្តី ហោ ណាំហុង ថា ជាមេគុកបឹងត្របែក ហើយប្រធានបក្សប្រឆាំងរូបនេះ ក៏ត្រូវបានតុលាការកាត់ទោស ឱ្យជាប់ពន្ធនាគារ៥ឆ្នាំថែមទៀត កាលពីចុងខែធ្នូ ឆ្នាំ២០១៦ ពាក់ព័ន្ធ នឹងករណីក្លែងឯកសារព្រំដែនកម្ពុជា-វៀតណាម។ ក្រៅពីនោះ លោក សម រង្ស៊ី ក៏កំពុងជាប់ពាក់ព័ន្ធនឹងបណ្តឹង នៅតុលាការច្រើនថែមទៀត ដែលមិនទាន់ កាត់ទោស ដែលភាគច្រើនជាបណ្តឹង បរិហារកេរ្តិ៍ជាសាធារណៈ៕
