(ភ្នំពេញ)៖ តាមការគ្រោងទុកនៅថ្ងៃទី០៧ ខែកុម្ភៈ ឆ្នាំ២០១៧ ស្អែកនេះ កញ្ញា ធី សុវណ្ណថា ប្រធានអង្គការយុវជនដើម្បីសង្គម នឹងចូលបំភ្លឺជូនតំណាងអយ្យការ អមសាលាដំបូងរាជធានីភ្នំពេញ នៅវេលាម៉ោង៩៖០០ព្រឹក ពាក់ព័ន្ធនឹងការប្តឹង លោក សម រង្ស៊ី ប្រធានគណបក្សសង្គ្រោះជាតិ ពីបទបរិហារកេរ្តិ៍ជាសាធារណៈ ហើយទាមទារសំណងជំងឺចិត្តចំនួន២៥ម៉ឺនដុល្លារអាមេរិក។
កញ្ញា ធី សុវណ្ណថា បានប្តឹងលោក សម រង្ស៊ី ដោយភ្ជាប់យកករណីដែលលោក សម រង្ស៊ី ចោទប្រកាន់សម្តេចតេជោនាយករដ្ឋមន្ត្រីថា បានសូកប្រាក់ កញ្ញា ធី សុវណ្ណថា ចំនួន១លានដុល្លារអាមេរិក ឱ្យរូបនាងធ្វើសកម្មភាពប្រឆាំងនឹងគណបក្សសង្រ្គោះជាតិ។ ដើម្បីបង្ហាញភាពស្អាតស្អំ ទើបកញ្ញា ធី សុវណ្ណថា បានប្តឹងទៅតុលាការឲ្យជួយរកយុត្តិធម៌ និង ផ្តន្ទាទោសលោក សម រង្ស៊ី តាមច្បាប់។
កន្លងមកកញ្ញាធី សុវណ្ណថា បញ្ជាក់ថា ក្នុងឱកាសជំនួបសំណេះសំណាលជាមួយសកម្មជនគណបក្សសង្គ្រោះជាតិប្រចាំប្រទេសបារាំង កាលពីថ្ងៃទី១៤ ខែមករា ឆ្នាំ២០១៧ លោក សម រង្ស៊ី បាននិយាយថា សម្តេចតេជោសូកប្រាក់កញ្ញាធី សុវណ្ណថា ចំនួន១លានដុល្លារអាមេរិក....។ កញ្ញា ធី សុវណ្ណថា ចាត់ទុកថា ការលើកឡើងគ្មានមូលដ្ឋានច្បាស់លាស់នេះ គឺជាការចោទប្រកាន់មួលបង្កាច់ ជាការអះអាងដោយបំផ្លើសនិងជាការទម្លាក់កំហុសដោយអសុច្ចរិត ហើយបានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយសកេរ្តិ៍ឈ្មោះ និងសេចក្ដីថ្លៃថ្នូររបស់ កញ្ញា ធី សុវណ្ណថា។
លោក សម រង្ស៊ី ត្រូវបានតុលាការកាត់ទោសឱ្យជាប់ពន្ធនាគារ២ឆ្នាំ ពាក់ព័ន្ធនឹងការចោទប្រកាន់ញុះញង់វាយប្រហារ លើឧបនាយករដ្ឋមន្រ្តី ហោ ណាំហុង ថា ជាមេគុកបឹងត្របែក ហើយប្រធានបក្សប្រឆាំងរូបនេះ ក៏ត្រូវបានតុលាការកាត់ទោស ឱ្យជាប់ពន្ធនាគារ៥ឆ្នាំថែមទៀត កាលពីចុងខែធ្នូ ឆ្នាំ២០១៦ ពាក់ព័ន្ធ នឹងករណីក្លែងឯកសារព្រំដែនកម្ពុជា-វៀតណាម។ ក្រៅពីនោះ លោក សម រង្ស៊ី ក៏កំពុងជាប់ពាក់ព័ន្ធនឹងបណ្តឹង នៅតុលាការច្រើនថែមទៀត ដែលមិនទាន់ កាត់ទោស ដែលភាគច្រើនជាបណ្តឹង បរិហារកេរ្តិ៍ជាសាធារណៈ៕
