(ក្រចេះ)៖ ស្រ្តីមេម៉ាយម្នាក់ បានចេញមុខសុំឲ្យលោក ជា សុផារ៉ា ទេសរដ្ឋមន្រ្តី និងជារដ្ឋមន្រ្តីក្រសួងរៀបចំដែនដី នគររូបនីយកម្ម និងសំណង់ អន្តរាគមន៍រកយុត្តិធម៌ឲ្យ ក្រោយមន្រ្តីសុរិយោដីខេត្តក្រចេះម្នាក់ បានបើកឡានបុកកូនស្រីរបស់ខ្លួន ស្លាប់បាត់បង់ជីវិត ហើយមិនទទួលខុសត្រូវ។ នេះបើយោងតាមការបញ្ជាក់ឲ្យដឹងនៅលើ Facebook របស់សាច់ញាតិក្មេងស្រីរងគ្រោះបង្ហោះឲ្យដឹងនៅថ្ងៃទី០៦ ខែកុម្ភៈ ឆ្នាំ២០១៧នេះ។
យោងតាម Facebook សាច់ញាតិក្មេងស្រីរងគ្រោះបានបង្ហោះរៀបរាប់រឿងទាំងស្រុងឲ្យដឹងថា «នាងខ្ញុំឈ្មោះ ភាន សោភា សូមគោរពឯកឧត្តម ជា សុផារ៉ា សូមឯកឧត្តមមេត្តាជួយរកយុត្តិធម៌ឲ្យក្រុមគ្រួសាររបស់នាងខ្ញុំផង នាងខ្ញុំជាស្រីមេម៉ាយមានកូនស្រីតែម្នាក់គត់ ស្រលាញ់ជាងជីវិតទៅទៀត ខិតខំចឹញ្ចឹមបីបាច់កូនដោយជីវភាពជាគ្រូបង្រៀន រហូតដល់កូនអាយុ១៥ឆ្នាំ តែជាអកុសលនៅថ្ងៃទី២៨ ខែឆ្នូ ឆ្នាំ២០១៦ វេលាម៉ោង៧៖៤០នាទីយប់ នៅពេលដែលកូនស្រីរបស់នាងខ្ញុំចេញពីរៀនគួរនៅសាលាវិទ្យាល័យកុសុម: ត្រូវបានមន្រ្តីមន្ទីសុរិយោដីខេត្តក្រចេះឈ្មោះ គីរី បើកឡានរបស់អង្គភាពសុរិយោដី បុកម៉ូតូកូនស្រីរបស់នាងខ្ញុំបណ្តាលឲ្យស្លាប់យ៉ាងអណោចអធមជាទីបំផុត រួចហើយបើកឡានរត់ទៅលាក់ទុកនៅក្នុងមន្ទីរសុរិយោលដីខេត្តក្រចេះដោយគេចវេសមិនព្រមទទួលខុសត្រូវ ប៉ុន្តែអ្វីដែលគួរឲ្យសោកស្តាយជាងនេះទៅទៀតនោះ គឺនៅថ្ងៃបន្ទាប់(ថ្ងៃទី២៩) ពេលដែលសមត្ថកិច្ចស្រាវជ្រាវរកឃើញរថយន្តបង្កដែលលាក់ទុកនៅក្នុងមន្ទីរហើយនោះ ស្រាប់តែលោកប្រធានមន្ទីរ ឈ្មោះ ឡែន បានប្រើឥទ្ធិពលរបស់ខ្លួនមិនឲ្យប៉ូលីសយកទៅរក្សាទុកភ្លាមៗទេ ហើយបានព្យាយាមលាក់បាំងជនបង្ករហូត ដល់ល្ងាចថ្ងៃដដែលទើបព្រមឲ្យសមត្ថកិច្ចយកទៅរក្សាទុកនៅកន្លែងប៉ូលីស ចំណែកជនបង្ករត់គេចខ្លួនបាត់ ដោយមិនមានការទទួលខុសត្រូវពីខាងណាទាំងអស់»។
បន្ថែមពីលើនេះ ស្រ្តីមេម៉ាយ ដែលជាម្តាយរបស់ក្មេងស្រីរងគ្រោះ បានបញ្ជាក់ឲ្យដឹងទៀតថា «ដោយសានាងខ្ញុំជាស្រ្តីមេម៉ាយ ទន់ខ្យោយ និងមានជីវភាពជាគ្រូបង្រៀន នាងខ្ញុំគ្មានលទ្ធភាពអ្វីតទល់ជាមួយលោក ឡែន ទេ មានតែស្នើសុំឲ្យ ឯកឧត្តម ជា សុផារ៉ាមេត្តាជួយរកយុត្តិធម៌ឲ្យនាងខ្ញុំផងទៅចុះ ព្រោះចាប់តាំងពីកើតរឿងរហូតមកដល់ថ្ងៃនេះភាគីខាងមន្ទីរធ្វើព្រងើយកន្តើយ មិនមានទំនាក់ទំនង មកខាងក្រុមគ្រួសារនាងខ្ញុំឡើយ»៕
