(ភ្នំពេញ)៖ ក្រុមហ៊ុន Premium Auto Import Co.,Ltd ​នាំចូលចែកចាយផ្តាច់មុខ​រថយន្តម៉ាក BMW បានធ្វើកាលប្រកាសប្រគល់ ជូននូវរថយន្តប្រណីតចំនួន៣៥គ្រឿង ដែលមានតម្លៃប្រមាណ ជាង៣,៥លានដុល្លារអាមេរិក ទៅដល់ក្រុមហ៊ុនជួលរថយន្ត​ប្រប្រណីត Royal Cambodian Limousine Services។ ការប្រកាសនេះ ត្រូវបានធ្វើឡើង នាដើមកុម្ភៈឆ្នាំ២០១៧នេះ នៅក្នុងបរិវេណសណ្ឋាគារ Raffles Le Royal ក្រោមវត្តមានតំណាងជាន់ខ្ពស់ របស់ក្រុមហ៊ុនទាំងពីរ។

លោក Peter Brongers នាយកគ្រប់គ្រង​​នៃក្រុមហ៊ុន BMW Cambodian បានបញ្ជាក់ថា ក្រុមហ៊ុន​ពិតជាមានមោទនភាព ក្នុងការប្រកាសផ្តល់ជូននូវរថយន្តប្រណីត ស៊េរី BMW5 និងBMW7 ស៊េរីថ្មីចំនួន៣៥គ្រឿង ប្រគល់ជូន ដល់ក្រុមហ៊ុន Royal Cambodian Limousine Services ដើម្បីបម្រើ​ដល់អតិថិជនពិសេស ក្នុងការចូលរួមផ្តល់សេវាកម្ម ដល់រាជរដ្ឋាភិបាលកម្ពុជា។

​លោកលើកឡើងបន្តថា កិច្ចសន្យាតម្លៃប្រមាណ ជាង៣លានដុល្លារអាមេរិក ពិតជាមានសារៈសំខាន់ខ្លាំងណាស់ សម្រាប់ពួកយើង​ ខណៈកំណើនរថយន្ត BMW នៅលើដងផ្លូវ បានបង្ហាញឲ្យឃើញយ៉ាងច្បាស់ ពីការរីកចម្រើនរបស់ម៉ាក BMW​។

ដោយឡែក លោក Jake Montross នាយកគ្រប់គ្រងក្រុមហ៊ុន Royal Cambodian Limousine Services បានឲ្យដឹងថា «រយៈពេលជាង៤ ឆ្នាំមកនេះ យើងមានបទពិសោធដ៏ល្អឥតខ្ចោះ ជាមួយរថយន្ត BMW ដែលជារថយន្ត​ប្រណិត របស់យើង។​ អតិថិជនរបស់យើងទាំងអស់ ពិតជាមានភាពសប្បាយរីករាយ មែនទែនជាមួយនឹង​ការប្រើប្រាស់ រថយន្ត BMW ហើយដោយសារតែដល់ពេលវេលា ដែលយើងផ្លាស់ប្តូររថយន្ត ដូច្នេះហើយរថយន្ត BMW 7 ស៊េរី និងរថយន្ត ៥ ស៊េរីប្រភេទ GT គឺជាជម្រើសដ៏ស័ក្តិសមបំផុត។ សេវាកម្មដ៏រហ័សទាន់ចិត្ត និងអាចទុកចិត្តបាននៅ BMW Cambodia កាន់តែផ្តល់នូវភាពងាយស្រួល ចំពោះយើង»៕
​
​