(ពោធិ៍សាត់)៖ សាខាកាំកុងត្រូលខេត្តពោធិ៍សាត់ ដឹកនាំដោយលោក ណាល់ វណ្ណៈ អនុប្រធានសាខាទទួលបន្ទុកទីផ្សារ សហការជាមួយមន្រ្តីមន្ទីរពាណិជ្ជកម្ម នៅព្រឹកថ្ងៃទី០៦ ខែកុម្ភៈ ឆ្នាំ២០១៧ បានចុះត្រួតពិនិត្យគុណភាព សុវត្ថិភាព ផលិតផល ម្ហូបអាហារ និងស្រាវជ្រាវនូវផលិតផលតៅហ៊ូ (Bottled preserved bean curd) ដែលមានចម្លងបាក់តេរី Bacillus cereuse នៅផ្សារថ្មីពោធិ៍សាត់ និងតាមបណ្តាម៉ាតមួយចំនួន ក្នុងក្រុងពោធិ៍សាត់ ខេត្តពោធិ៍សាត់។
មន្រ្តីកាំកុងត្រូលខេត្តពោធិ៍សាត់ បានថ្លែងថា ក្រុមការងារបានចុះអប់រំផ្សព្វផ្សាយដល់សិស្សានុសិស្ស ស្តីពីសុវត្ថិភាពម្ហូបអាហារ និងបានត្រួតពិនិត្យទំនិញ នំចំណីនៅក្នុងសាលារៀនចំនួន០២កន្លែង រួមមាន៖ទី១-សាលាបឋមសិក្សាពោធិ៍សាត់ និងទី២-សាលាបឋមសិក្សាស្ថានីយ៍
ស្ថិតនៅភូមិពាលញែក២ សង្កាត់ផ្ទះព្រៃ ក្រុងពោធិសាត់។
ជាលទ្ធផល: ផលិតផលតៅហ៊ូ (Bottled preserved bean curd) ដែលមានចម្លងបាក់តេរី Bacillus cereus គឺមិនមានចរាចរនៅផ្សារខាងលើនោះទេ។
ក្រុមការងារបានធ្វើតេស្តបឋម លើផលិតផលម្ហូបអាហាររមួយចំនួន (ពុំមានរកឃើញសារធាតុគីមីហាមឃាត់ឡើយ), បានណែនាំ និងចែកផ្ទាំងរូបភាពអប់រំ ស្តីពីសុវត្ថិភាពម្ហូបអាហារ ដល់អាជីវករ ប្រជាពលរដ្ឋ និងប្អូនៗសិស្សានុសិស្ស នៅតាមសាលារៀន, បានរឹបអូសផលិតផលខូចគុណភាព និងហួសកាលបច្ឆេទប្រើប្រាស់ចំនួនផងដែរ យកមករក្សាទុក នៅសាខាកាំកុងត្រូលខេត្តដើម្បី កំទេចចោលតាមនីតិវិធីច្បាប់៕
