(ភ្នំពេញ)៖ ដោយមានការណែនាំពីអគ្គនាយកកាំកុងត្រូល ក្រសួងពាណិជ្ជកម្ម លោក ម៉ក់ ពេជ្ជរិទ្ធ និងប្រធានសាខាកាំកុងត្រូល​ផែស្ងួត​ចុងទីភ្នំពេញ មន្ត្រីជំនាញសហការជាមួយមន្រ្តីមន្ទីរពាណិជ្ជកម្ម រាជធានីភ្នំពេញ និង​អាជ្ញាធរ​ដែនដី បានចុះត្រួតពិនិត្យទំនិញនៅតាមផ្សារទំនើប និងផ្សារផ្សេងៗ ដើម្បីត្រួតពិនិត្យគុណភាព សុវត្ថិភាព​ម្ហូបអាហារ​។

ជាក់ស្តែង នៅព្រឹកថ្ងៃទី៦ ខែកុម្ភៈ​ ឆ្នាំ២០១៧ លោក​ គង់​ វុទ្ធី អនុប្រធានសាខា​កាំកុងត្រូលផែស្ងួតចុងទីភ្នំពេញ បានដឹកនាំមន្ត្រីជំនាញ សហការជាមួយអាជ្ញាធរមូលដ្ឋាននឹងមន្ត្រីពាក់ព័ន្ធ​ ចុះពិនិត្យទំនិញក្នុងផ្សារទំនើបឡាក់គី និងផ្សារបឹងត្របែកផ្លាហ្សា ស្ថិតក្នុងភូមិសាស្រ្តខណ្ឌចំការមន។

​លោក​ គង់​ វុទ្ធី​ បានឲ្យដឹងថា យុទ្ធនាការចុះត្រួតពិនិត្យមុខទំនិញទាំងនេះ បានធ្វើឡើងបន្ទាប់ពីអគ្គនាយកដ្ឋានកាំកុងត្រូល នៃក្រសួងពាណិជ្ជកម្ម​បានចេញ​ សេចក្តីជូនដំណឹងដល់សាខាកាំកុងត្រូល រាជធានី-ខេត្ត ស្តីពីបញ្ហាដែលមជ្ឈមណ្ឌលសុវត្ថិភាពម្ហូបអាហារ ក្រុងហុងកុង​រកឃើញវត្តមានបាក់តេរី Bacillus cereus ក្នុងគំរូការផលិតតៅហ៊ួ ( bottled preserved bean curd) ដែលប្រភពដើមនៅកោះតៃវ៉ាន់ ក្នុងបរិមាណលើសពីការតម្រូវកំណត់ក្នុងគោលការណ៍ណែនាំ​របស់អាជ្ញាធរ។

ដូច្នេះសាខាកាំកុងត្រូលផែស្ងួតចុងទីភ្នំពេញ បានចុះពិនិត្យផ្ទាល់ទៅតាមផ្សារទំនើប និងផ្សារផ្សេងៗ ក្នុងរាជធានីភ្នំពេញ ដើម្បីតាមអង្កេត និងទប់ស្កាត់ចំពោះតៅហ៊ួដែលមានជាតិបាក់តេរី ព្រោះដោយសារការទទួលទានអាហារដែលមានជាតិបាក់តេរី Bacillus cereus បណ្តាលឲ្យមានជំងឺរាគ និងក្អួត ជាដើម។

គោលបំណងនៃការចុះត្រួតពិនិត្យដ៏សំខាន់មួយទៀត គឺ​ទប់ស្កាត់ទំនិញ ខូចគុណភាព ក្លែងបន្លំលើកស្លាកសញ្ញាដែលជនខិលខូចមួយចំនួនបានលួច បញ្ចេញទំនិញមកលក់លើទីផ្សារ និងពង្រឹងការយល់ដឹង អំពីបញ្ហាសុវត្ថិភាពម្ហូបអាហារដល់បងប្អូនអាជីវករនិង អ្នកប្រើប្រាស់។

ក្នុងប្រតិបត្តិការខាងលើ​ មន្ត្រីកាំកុងត្រូលបានធ្វើតេស្តបឋមរកសារធាតុគីមី បូរ៉ាក់ ទៅលើសរសៃគុយទាវតូច សរសៃគុយទាវធំ មីក្រៀម មីស្រស់ ប្រហិត​ប្រហុក​ ប្រអក​ សាច់គោ ប្រហិតសាច់ជ្រូក លតឆា គ្រឿងសមុទ្រដូចជា មឹកស្រស់ បង្គាស្រស់ និងយកគំរូ បន្លែ ផ្លែឈើស្រស់មួយចំនួនទៀត បញ្ជូនទៅមន្ទីរពិសោធ៍ នៃអគ្គនាយកដ្ឋានកាំកុងត្រូល ដើម្បីរកសារធាតុគីមីបន្ថែម ទៅលើផលិតផលម្ហូបអាហារ។

​លោកអនុប្រធាន ក៏បានអំពាវដល់ក្រុមអាជីវករទាំងអស់ដែលលក់គ្រឿងបរិភោគស្រល់ៗនឹងក្រៀម​ មេត្តាជួយពិនិត្យនៅគុណភាព ឲ្យបានច្បាស់ ចាំទិញយកមកលក់បន្តជូនបងប្អូនប្រជាពលរដ្ឋយើងប្រើប្រាស់​ ដើម្បីចៀសវាងពីបញ្ហាប៉ះពាល់ដល់សុខាភពដោយសារមានជាតិគីមីនៅក្នុងទំនិញ៕