(កំពង់ស្ពឺ)៖ ករណីបុគ្គលិកក្រុមហ៊ុនចំការអំពៅឈ្មោះជឿងនៅស្រុកឱរ៉ាល់ ខេត្តកំពង់ស្ពឺវាយសម្លាប់គោអ្នកស្រុក ព្រោះតែ ខឹងគោចូលស៊ីអំពៅនោះ ត្រូវបានដោះស្រាយបញ្ចប់ហើយ ដោយក្រុមហ៊ុនសុខចិត្តចេញលុយសងទៅអោយប្រជាពលរដ្ឋ ជាម្ចាស់គោដើម្បីបញ្ចប់រឿង។
លោកមួង ធី អភិបាលស្រុកឱរ៉ាល់បានថ្លែងប្រាប់អង្គភាពព័ត៌មាន Fresh News តាមទូរស័ព្ឌនៅវេលាម៉ោង៤រសៀលថ្ងៃទី ៥ ខែកុម្ភះ ឆ្នាំ២០១៧នេះអោយដឹងថា ករណីនេះត្រូវបានដោះស្រាយបញ្ចប់ហើយរវាងក្រុមហ៊ុន និងប្រជាពលរដ្ឋជាម្ចាស់គោ កាលពីម្សិលមិញ(ថ្ងៃទី៤ មករា)បន្ទាប់មានការសម្របសម្រួលពីមន្ត្រីអាជ្ញាធរសមត្ថកិច្ចរបស់លោករួចមក។
លោកអភិបាលបាន អះអាងថាខាងក្រុមហ៊ុនបានសុខចិត្តសងលុយ ទៅអោយម្ចាស់គោទៅតាមតម្លៃ ដែលពួកគាត់ទាមទារសរុប ចំនួន២៤៥០ដុល្លារ អាមេរិក។ក្នុងនោះម្ចាស់គោឈ្មោះសែម ម៊ឺន ទទួលបានសំណង៤៥០ដុល្លារ ឈ្មោះអូក ណាង ទទួលបាន សំណង ៥០០ដុល្លារ ម្ចាស់ឈ្មោះជា សាតទទួលបានសំណង៥០០ដុល្លារ និងឈ្មោះបូ រឹម ទទួលបានសំណង៩៥០ដុល្លារ។ បន្ទាប់មកខាងក្រុមហ៊ុន និងប្រជាជនម្ចាស់គោបានធ្វើកិច្ចសន្យា បញ្ចប់រឿងឈប់ប្ដឹងផ្ដល់គ្នាតទៅទៀត។
គួរបញ្ជាក់ថា គោអ្នកស្រុកចំនួន៥ក្បាល ត្រូវបានបុគ្គលិកក្រុមហ៊ុនចំការអំពៅ នៅស្រុកឱរ៉ាល់វាយបណ្ដាល អោយងាប់៣ក្បាល របួស២ក្បាល ដោយក្រុមហ៊ុនចោទថាគោអ្នកស្រុកខាងលើ ចូលសុីអពៅរបស់ខ្លួន។ ក្រោយកើតករណីបែបនេះ ប្រជាពលរដ្ឋជា ម្ចាស់គោបាននាំគ្នាប្ដឹង ទាមទារសំណង និងបន្ទាប់ពីមានការអន្តរាគមន៏ ពីអភិបាលខេត្តកំពង់ស្ពឺអោយធ្វើការស្រាវជ្រាវ រកមុខអ្នក សំលាប់គោអ្នកស្រុករួចមករួចមក ទើបខាងក្រុមហ៊ុនចេញមុខ មកចរចាដោះស្រាយបញ្ចប់តាមរយៈការសម្របសម្រួល ពីមន្ត្រី អាជ្ញាមានសមត្ថកិច្ច៕
