(ព្រះវិហារ)៖ ក្រោយពីទទួលបានព័ត៌មានថា មានកូនសិស្សស្ថិត​នៅសាលា​បឋមសិក្សាសំព្រាង ក្នុងឃុំរតនៈ ស្រុករវៀង គ្មានអាគារល្អដើម្បីអង្គុយរៀនសូត្រ ហើយថែម​ទាំងរៀនក្រោម​ដើមឈើ​ទៀតនោះ នៅថ្ងៃទី៤ ខែកុម្ភ: ឆ្នាំ២០១៧នេះ អភិបាលខេត្តព្រះវិហារ លោក អ៊ុន ចាន់ដា បានដឹកនាំមន្រ្តីក្រោមឱវាទ ចុះទៅពិនិត្យដោយផ្ទាល់ និងបានជួយដោះស្រាយភ្លាមៗ តាមរយ:ធ្វើការជួសជុល​អាគារដែលចាស់មានស្រាប់ និងសម្រេចសាងសង់​អាគារមួយខ្នងទៀត សរុបទាំងអស់​មាន៦បន្ទប់។

លោក អ៊ុន ចាន់ដា បានថ្លែងយ៉ាងដូច្នេះថា «នៅព្រឹកមិញនេះ ខ្ញុំ រួមជាមួយថ្នាក់ដឹកនាំខេត្ត ប្រធានមន្ទីរអប់រំ យុវជន និងកីឡា ថ្នាក់ដឹកនាំស្រុក បានចុះពិនិត្យ​សាលាបឋមសិក្សាសំព្រាង ឃុំរតនៈ ស្រុករវៀង ដែលមានសិស្សសរុបចំនួន៤៧នាក់តែប៉ុណ្ណោះ កំពុងរៀនក្រោមដើមឈើ ។ ក្នុងនាមអាជ្ញាធរ​ខេត្តព្រះវិហារ បានសម្រេចជួសជុល​អាគារសិក្សាមួយខ្នងមាន ៣បន្ទប់ធ្វើអំពីឈើ និងសាងសង់អាគារសិក្សាថ្មីមួយខ្នង៣បន្ទប់បន្ថែម»

បើតាមលោកអភិបាលខេត្ត នៅក្នុងភូមិសំព្រាងនេះមានប្រជាពលរដ្ឋរស់នៅតែ៥៨គ្រួសារប៉ុណ្ណោះ ហើយជាភូមិនៅដាច់ស្រយាល។ លោកគ្រូអ្នកគ្រូបង្រៀនតែមួយ​ពេលព្រឹកប៉ុណ្ណោះ ដើម្បីឲ្យពួកគាត់អាចវិលត្រឡប់ទៅផ្ទះនៅថ្ងៃរសៀល នេះជាមូលហេតុធ្វើឲ្យគាត់នាំសិស្សមកបង្រៀនក្រោមដើមឈើ។

 គ្រូបង្រៀនម្នាក់នៅសាលាចាស់ទ្រុឌទ្រោមមួយនេះ គឺអ្នកគ្រូមុត សុគេន បានប្រាប់ក្រុមអ្នកកាសែតថា សិស្សដែលមករៀននៅសាលានេះ មានចំនួន៤៨នាក់ និងគ្រូ៤នាក់២នាក់ជាបុរស ដែលត្រូវបង្រៀនសិស្សនៅទីនេះ។

បើតាមអ្នកគ្រូមុត សុគេន  សិស្សដែលអ្នកគ្រូបង្រៀននៅក្នុងថ្នាក់មាន១២នាក់ ពួកគេទាំងអស់បានត្អូញត្អែរពីការលំបាកធ្វើដំណើរមកកាន់សាលារៀន និង​នៅពេលមករៀន គឺត្រូវបង្ខំចិត្តរៀនជ្រកក្រោមដើមឈើនោះថែមទៀត។

អ្នកគ្រូថា មានពេលខ្លះសិស្សមិនបានមករៀនឲ្យបានទៀងទាត់តាមថ្ងៃ និងតាមពេលវេលានោះទេ ដោយសារផ្លូវលំបាក និងពេលមករៀន ត្រូវរៀនជ្រកក្រោមដើមឈើ ដោយសារសាលាខ្វះថ្នាក់បង្រៀនសិស្ស។

នាយិកាសាលា អ្នកគ្រូ គង់ សុផល្លា បានប្រាប់ឲ្យដឹងថា កាលពីមុនសាលាសព្រាងនេះ​មានគ្រូបង្រៀន​ទាំងអស់ចំនួន​៦នាក់ ប៉ុន្តែ នៅបច្ចុប្បន្ននេះ មានតែ៤នាក់ប៉ុណ្ណោះ ក្នុងនោះគ្រូ​បុរស២នាក់ មានសិស្ស​សរុប៤៨នាក់។

អ្នកគ្រូបានបន្តថា មូលហេតុដែលនាំឲ្យមានការបង្រៀនសិស្សជ្រកក្រោមម្លប់ដើមឈើនេះ ដោយសារថ្នាក់រៀនមាន៣ថ្នាក់ គឺចាប់ពីថ្នាក់ទី១ ទី២ និងថ្នាក់ទី៣ ហើយសិស្សមានការកើនឡើង ដូច្នេះ ការបង្រៀនគឺត្រូវមានការបែងចែកថ្នាក់គ្នារៀន មិនអាចបង្រៀនបញ្ចូលគ្នា ជាមួយនឹងកំរិតយល់ដឹងខុសគ្នានោះទេ ដោយខ្វះថ្នាក់រៀនទើបជាមានការមកបង្រៀនក្រោមដើមឈើយ៉ាងដូច្នេះ។

 នាយិកាគង់ សុផល្លា បានបន្តឲ្យដឹងទៀតថា នៅរយះពេលកន្លងមក អ្នកគ្រូធ្លាប់បានពិភាក្សា​ជាមួយប្រធានការិយាល័យ​អប់រំស្រុក និងធ្លាប់បានលើកគំរោង តាមរយៈ អង្គការ​ទស្សនៈពិភពលោកដែរ តែត្រូវបានប្រធាន​ការិយាល័យអប់រំស្រុកឆ្លើយថា មិនមានគំរោងសាងសង់សាលារៀននោះបន្តទៀតទេ ដោយសារគ្មាន​សិស្ស​គ្រប់គ្រាន់ និងក្នុង១ថ្នាក់តម្រូវឲ្យ​មា​នសិស្សចាប់ពី​៤០ទៅ៤៨នាក់ ផងដែរ។

ប៉ុន្តែចាប់ពី​ពេលនេះទៅ ក្រោយលោកអភិបាលខេត្ត សម្រេចដោះស្រាយរួចហើយ កូនសិស្សទាំងអស់ និងលោកគ្រូអ្នកគ្រូ អាចរៀន អាចបង្រៀន​ក្រោមដំបូលអាគារដ៏ល្អបានហើយ។

សូមបញ្ជាក់ថា ក្រោយបញ្ចប់ការដោះស្រាយបញ្ហាជូនលោកគ្រូ អ្នកគ្រូ សិស្សានុសិស្សរួច លោកអភិបាលខេត្តព្រះវិហារ បានចុះសួរសុខទុក្ខ​ដោយផ្ទាល់​ជាមួយ​ប្រជាពលរដ្ឋ នៅក្នុងភូមិព្រមទាំងចែក​អំណោយ​មួយចំនួនផងដែរ៕