(ភ្នំពេញ)៖ នៅវេលាម៉ោងប្រមាណ ១១៖០០នាទីព្រឹក ថ្ងៃទី០៤ ខែកុម្ភៈ ឆ្នាំ២០១៧នេះ លោក ធិន ច ប្រធានាធិបតីមីយ៉ាន់ម៉ា និងភរិយា រួមទាំងគណៈប្រតិភូ​ជាន់ខ្ពស់មីយ៉ាន់ម៉ា បានចប់ទស្សនកិច្ចនៅរមនីយដ្ឋានវត្តភ្នំហើយ ពេលនេះលោកកំពុងត្រឡប់ទៅកាន់សណ្ឋាគារអ៊ីនធើខនវិញ។

សូមជំរាបថា នៅវេលាម៉ោង៩ព្រឹកថ្ងៃទី០៤ ខែកុម្ភៈ ឆ្នាំ២០១៧នេះ ជំនួបពិភាក្សាការងាររវាង​ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងប្រធានាធិបតីមីយ៉ាន់ម៉ា បានចាប់ផ្តើមឡើងនៅវិមានសន្តិភាព ហើយបន្ទាប់ពីបញ្ចប់ជំនួបទ្វេភាគីនេះ លោកបានទៅកាន់រមនីយដ្ឋានវត្តភ្នំ។

ប្រធានាធិបតីមីយ៉ាន់ម៉ា និងភរិយា ព្រមទាំងដឹកនាំគណៈប្រតិភូ បានដឹកនាំគណៈប្រតិភូមកដល់កម្ពុជា នៅវេលាម៉ោងប្រមាណ១១៖២០នាទី​ព្រឹកថ្ងៃទី០៣ ខែកុម្ភៈនេះ និងបានជួបសវនាការថ្វាយព្រះករុណា ព្រះបាទសម្តេចប្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ហើយបន្តធ្វើដំណើរទៅកាន់ស្តូបវិមានឯករាជ្យ និងស្តូបព្រះបរមរតនកោដ្ឋ ដើម្បីគោរពវិញ្ញាណក្ខន្ធ និងបានអញ្ជើញចូលរួមពិធីលៀងសាយភោជន៍ នៅព្រះបរមរាជវាំង រយៈពេល​ជាង២​ម៉ោង ចាប់តាំងពីម៉ោង ៧យប់ថ្ងៃទី០៣ ខែកុម្ភៈនេះ៕