(ភ្នំពេញ)៖ ក្រុមប្រឹក្សាធម្មនុញ្ញចាប់ពីថ្ងៃទី៣០ ដល់ថ្ងៃទី៣១ ខែមករា ឆ្នាំ២០១៧នេះ ដោះស្រាយបណ្តឹងរបស់តំណាងគណបក្សសង្រ្គោះជាតិ ដែលប្តឹងឲ្យលុបឈ្មោះ អ្នកបោះឆ្នោតក្នុងបញ្ជីឈ្មោះបោះឆ្នោតថ្មីបានចំនួន ៨បណ្តឹងហើយ។ ជាលទ្ធផលបណ្តឹងទាំង៨នេះ ក្រុមប្រឹក្សាបានសម្រេចរក្សាឈ្មោះអ្នកបោះឆ្នោតទាំង ៥៦៤នាក់ក្នុងបញ្ជីឈ្មោះបោះឆ្នោតដដែល ពោលមិនលុបចោលតាមការទាមទាររបស់គណបក្សសង្រ្គោះជាតិនោះឡើយ។
យោងតាមសេចក្តីជូនដំណឹងរបស់គណបក្សសង្រ្គោះជាតិ បានឲ្យដឹងថា បណ្តឹងដែលរុញមកពីគណៈកម្មការធិការជាតិរៀបចំការបោះឆ្នោត ត្រូវបានប្តឹងដោយ លោក ផែង ហេង និង លោក កាក់ កុម្ភារ ជាភ្នាក់ងារគណបក្សសង្រ្គោះជាតិ។ បណ្តឹងនេះ គឺភ្នាក់ងារគណបក្សសង្រ្គោះជាតិ ទាមទារឲ្យឈ្មោះអ្នកបោះឆ្នោត ក្នុងបញ្ជីឈ្មោះបោះឆ្នោតថ្មីចំនួន ៥៦៤នាក់ មកពីតាមការិយាល័យចុះឈ្មោះនានានៅក្នុងរាជធានីភ្នំពេញ និងតាមបណ្តាខេត្ត ដោយពួកគេអះអាងថា ជាជនជនបរទេស។
លោក អ៉ឹម ឈុនលឹម ប្រធានក្រុមប្រឹក្សាធម្មនុញ្ញ បានបញ្ជាក់ថា បណ្តឹងរបស់ភ្នាក់ងារគណបក្សសង្រ្គោះជាតិ គឺត្រឹមត្រូវតាមច្បាប់ ប៉ុន្តែខុសនឹងគតិច្បាប់ ព្រមទាំងបានចាត់ទុកការសម្រេចរបស់គណៈកម្មាធិការជាតិរៀបចំការបោះឆ្នោតជាបានការ។
មន្រ្តីក្រុមប្រឹក្សាធម្មនុញ្ញបានឲ្យដឹងថា មកដល់ពេលនេះក្រុមប្រឹក្សាធម្មនុញ្ញទទួលបានបណ្តឹងចំនួន ៦០បណ្តឹងពីគណៈកម្មាធិការជាតិរៀបចំការបោះឆ្នោត ហើយដោះស្រាយទើបបាន ៨បណ្តឹងប៉ុណ្ណោះ៕
