(សៀមរាប)៖ អាជីវករផ្សារលើធំថ្មីខេត្តសៀមរាបរាប់រយនាក់ បាននាំគ្នាអះអាងថាបើលោកសូ ប្លាតុង អភិបាលក្រុងសៀមរាបនៅតែមានៈ ចង់បោះឆ្នោតជ្រើសរើស ប្រធានគណៈកម្មាធិការប្រតិបត្តិសមាគមផ្សារថ្មី ដោយគ្មានហេតុផលត្រឹមត្រូវទៀត ពួកគាត់នឹងមិនទៅបោះឆ្នោត ឡើយ ហើយនឹងនាំគ្នាធ្វើការតវ៉ាប្រឆាំងនឹងផែនការនេះ ព្រោះចំណាត់ការរបស់លោកសូ ប្លាតុង ផ្ដើមចេញពីទំនាស់បុគ្គលតែប៉ុណ្ណោះ។
អាជីវករលក់ដូរនៅផ្សារលើធំថ្មី ខេត្តសៀមរាបជាច្រើននាក់ បានអះអាងថាផ្ដើមចេញពីជំលោះផលប្រយោជន៏បុគ្គលម្នាក់ លោកសូ ប្លាតុង បានសំរេចដក ប្រធានគណៈកម្មាធិការប្រតិបត្តិសមាគម ផ្សារលើធំថ្មីចេញដោយប្រកាសបោះឆ្នោតរើសប្រធានថ្មីតាមរបៀបបន្លែបន្លំ មិនច្បាស់ លាស់ ខណៈអាជីវករភាគច្រើន លើសលប់គាំទ្រប្រធាន ផ្សារបច្ចុប្បន្ន។
អាជីវករមួយក្រុមបានរាយការណ៏អោយ Fresh News ជួយផ្សាយពីផែនការ របស់លោកសូ ប្លាតុង ប្រុងដកប្រធានផ្សារលើនេះ តាមរយៈបោះឆ្នោតបន្លែបន្លំ ដើម្បីអោយថ្នាក់លើបានជ្រាប ជាពិសេសលោកអភិបាលខេត្តឃឹម ប៊ុនសុង តែម្ដងដើម្បីជួយមានវិធានការទប់ស្កាត់កុំអោយរឿងតូចក្លាយទៅជារឿងធំទាន់។
ពាក់ព័ន្ធករណីនេះ ត្រូវបានអាជីវករមួយរូបបានទូរស័ព្ឌរៀបរាប់ប្រាប់ Fresh News អោយដឹងថា លោកអភិបាលក្រុងសៀមរាប សូ ប្លាតុង ពិតជា មានគម្រោង ការដកប្រធានផ្សារ លើប្រាកដមែនតាមរយៈបោះឆ្នោតបន្លែបន្លំបក្ខពួកនិយម ហើយគម្រោងការនេះត្រូវបរាជ័យម្ដងរួចមកហើយ ខណៈលោកអភិបាលក្រុង ចេញសេចក្ដីជូនដំណឹង អោយអាជីវករទៅបោះឆ្នោតរើសប្រធានថ្មី គឺមានតែអាជីវករជាបក្ខពួកមិនដល់ ១០០នាក់ ផងទៅចូលរួមហើយ ដោយសារឃើញអាជីវករតិចពេក ក៏ប្រកាសផ្អាកវិញទៅ។
ឥឡូវស្រាប់តែលោកសូ ប្លាតុងប្រកាសធ្វើការបោះឆ្នោតរើស ប្រធានផ្សារសារជាថ្មីនៅថ្ងៃទី៥ ខែកុម្ភះខាងមុខនេះម្ដងទៀត ទើបធ្វើអោយក្រុមអាជីវករ ភាគច្រើន ប្រកាសប្រឆាំង រហូតដល់ត្រៀមធ្វើបាតុកម្ម ទៀតផង។ អាជីវករខាងលើបានបន្ថែមថារឿងលោកសូ ប្លាតុង ព្យាយាមដកប្រធានផ្សារលើនេះ គឺផ្ដើមចេញពីរឿងគំនុំ បុគ្គលរវាងអាជីវករនិង អាជីវករតែប៉ុណ្ណោះ តែដោយសារប្រធានផ្សារមិនកាន់ជើងអាជីវករដែលខូច ហើយអាងខ្លួនមានលុយក៏រត់រកខ្នង ចាយលុយធ្វើយ៉ាងណាអោយតែ ដកប្រធានផ្សារអោយបាន ទើបលោកសូ ប្លាតុង ខ្នះខ្នែងព្យាយាមម្ដង ជាពីរដងដកតាមរយៈបោះឆ្នោត ទំលាក់បែបនេះតែម្ដងទៅ។
អាជីវករដែលដឹងរឿងរ៉ាវខាងលើបានអះអាងថាផ្សារលើធំថ្មីនេះដើមឡើយដោយសាររដ្ឋមិនមានថវិកាធ្វើការកសាង ក៏បានអោយគណៈកម្មាធិការ ផ្សារជាអ្នកចេញលុយ ធ្វើហើយលក់តូបអោយអាជីវករក្នុងតម្លៃថោកៗនិងបង់លុយជាដំណាក់កាលៗតាំងពីឆ្នាំ២០០០មកម្ល៉េះដោយគណៈកម្មាធិការផ្សារ ដែលមានលោកស៊ាង ណារ៉េន ជាប្រធានគ្រប់គ្រងរដ្ឋបាលរយៈពេល៣០ឆ្នាំ ចំណែកការយកភាសុីចូលរដ្ឋគឺមានអ្នកដេញថ្លៃយកផ្សេង។
លុះនៅពេលថ្មីៗនេះមានអាជីវករម្នាក់ ដែលលក់ខោអាវ មិនសូវដាច់ក៏សំរេចជួលតូបអោយគេលក់មាសវិញ ហើយក៏បានរត់ការសុំច្បាប់ប្ដូរមុខរបរទៅប្រធានផ្សារ និងអភិបាលក្រុងសៀមរាបដោយលោកសូ ប្លាតុង ខ្លួនឯងជា អ្នកចុះហត្ថលេខាឯកភាពទៀតផង។ប៉ុន្តែក្រោយមកក៏មានម្ចាស់តូបលក់មាសនៅក្បែរនោះ មិនចង់អោយមានតូបលក់មាស នៅក្បែរខ្លួនខ្លាចបាត់ អតិថិជនក៏ប្ដឹងតវ៉ា មិនអោយម្ចាស់តូបខាងលើប្ដូរមុខរបរ ពីលក់ខោអាវទៅលក់មាសនោះឡើយ។
ក្រោយម្ចាស់តូបក្បែរខាងប្ដឹង ប្រធានផ្សារមិនឯកភាពតាម ព្រោះនៅក្នុងផ្សារនេះ ការប្ដូរមុខរបរ តែងតែមាន កុំអោយតែប្ដូរទៅធ្វើអោយប៉ះពាល់ដល់ សណ្ដាប់ធ្នាប់ និងសោភ័ណភាពផ្សារខ្លាំងពេក ហើយក៏ជាការយោគយល់របស់ប្រធានផ្សារធ្វើមិចអោយតែអាជីវកររកទទួលទានបានផលចំណេញ។ ដោយ សារតែប្រធានផ្សារ មិនឯកភាព ទើបម្ចាស់តូបដែលជាអ្នកប្ដឹងរត់ការរកខ្នងបង្អែកជួយដែលលទ្ធផលគឺលោកសូ ប្លាតុង សម្រេចមិនអនុញ្ញាតអោយប្ដូរ មុខរបរហើយក៏បានចេញលិខិត មោគភាពហត្ថលេខាអនុញ្ញាតរបស់ខ្លួនពីមុនចោលវិញ ហើយប្រធានផ្សារក៏មិនឯកភាពតាម។បន្ទាប់មកនៅថ្ងៃទី១៩ ខែមករា ឆ្នាំ២០១៧ ស្រាប់តែលោកសូ ប្លាតុង ប្រកាសបោះឆ្នោតរើសប្រធានផ្សារថ្មីនៅថ្ងៃទី២២ ខែមករា ទាំងប្រធានផ្សារមិនដឹងខ្លួនមុន ហើយលោក សូ ប្លាតុង ប្រកាសថាមានបេក្ខជនឈរឈ្មោះ អោយអាជីវករបោះឆ្នោតចំនួន៣នាក់ តែមិនបានប្រាប់ឈ្មោះអោយអាជីវករបានស្គាល់ឡើយ ហាក់ដូចជា មានអាថកំបាំងអ្វីមួយបង្កប់នៅពីក្រោយ។
លុះដល់ថ្ងៃបោះឆ្នោតតាមការកំណត់ ក្នុងចំណោមអាជីវករជាង១០០០នាក់ មានតែអាជីវករមិនដល់១០០នាក់ផង នាំគ្នាទៅបោះឆ្នោតធ្វើអោយការបោះឆ្នោតបរាជ័យ ហើយគណៈកម្មការក៏ប្រកាសលើកពេលទៅថ្ងៃក្រោយវិញតែម្ដងទៅ។ ក្រុមអាជីវករភាគច្រើន បានសំណូមពរសុំអោយលោកអភិបាលខេត្ត ឃឹម ប៊ុនសុង ជួយបញ្ឈប់ គម្រោងការរបស់លោកអភិបាលក្រុងសូ ប្លាតុងនេះផង ដើម្បី កុំអោយរឿងតូចក្លាយទៅជារឿងធំទាន់ ព្រោះបើមិនដូច្នោះទេ នៅថ្ងៃទី៥ ខែកុម្ភះខាងមុខនេះ បើមានការបោះឆ្នោតតាមរយៈការបន្លែបន្លំមែន នឹងមានផ្ទុះការ តវ៉ាពីអាជីវករភាគច្រើនជាមិនខាន។ដោយឡែកអាជីវករម្នាក់ទៀតដែលអះអាងថាខ្លួនឈ្មោះចាន់ ធូ បានទូរស័ព្ឌមកអះអាងប្រាប់ Fresh News នៅរសៀលថ្ងៃ នេះថាតាមពិតការប្រឆាំង មិនអោយម្ចាស់តូបលក់ខោអាវ ប្ដូរមកលក់មាសនេះគឺមានរហូតដល់ ទៅជាង ៧០តូប ឯណោះ មិនមែនមានតែ១តូបនោះទេ ព្រោះតែអាជីវករលក់មាសសំអាងថា បើគាត់ប្ដូរមុខរបរគួរតែប្ដូរមកកន្លែងប្លង់លក់មាសទៅ មិនត្រូវយកតូបលក់ខោអាវប្ដូរមកលក់មាសនោះទេ វាខុសទីតាំងដែលគណៈ កម្មការបានបែងចែកប្លុកលក់ដូររួចហើយ។
ដោយឡែកនៅថ្ងៃបោះឆ្នោតរើសប្រធានគណៈកម្មាធិការផ្សារថ្មី គឺមានអាជីវករមកចូលរួមជាង១៧០នាក់ឯណោះ។ ពាក់ព័ន្ធព័ត៌មានពីអាជីវករខាងលើនេះ នៅរសៀល ថ្ងៃទី៣១ ខែកុម្ភះ ឆ្នាំ២០១៧នេះ Fresh News មិនអាចធ្វើការទាក់ទងសុំការបំភ្លឺពីលោកអភិបាលក្រុង សៀមរាបសូ ប្លាតុង បានឡើយ ព្រោះមិនមានលេខទូរស័ព្ឌ សំរាប់ធ្វើការទាក់ទង៕
លោក សូ ប្លាតុង
