(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានទម្លាយនូវការសន្ទនាគ្នារវាងសម្តេច និងលោក កឹម សុខា ក្នុងការចរចាកន្លងមក នៅក្នុងកិច្ចប្រជុំរដ្ឋសភាវិសាមញ្ញ នៅព្រឹកថ្ងៃទី៣១ ខែមករា ឆ្នាំ២០១៧នេះ។ សម្តេចមានប្រសាសន៍ថា បើលោក កឹម សុខា ហ៊ានប្រកែកមិនទទួល ស្គាល់នូវសម្តីរបស់ខ្លួន សូមឱ្យលោក កឹម សុខា ទៅស្បថនៅមុខព្រះអង្គដង្កើ។
សម្តេចតេជោ ហ៊ុន សែន បានទម្លាយថា ក្នុងការចរចាគ្នានាពេលកន្លងទៅលោក កឹម សុខា បានរិះគន់លោក សម រង្ស៊ី ថាមានកំហុស២យ៉ាង ចំពោះការទាមទារយកតំណែងប្រធានក្រុមមតិភាគតិចក្នុងរដ្ឋសភា គឺទី១៖ លោក សម រង្ស៊ី ជាទណ្ឌិត បានបាត់បង់សិទ្ធិគ្រប់យ៉ាងក្នុងការទទួលតំណែង និងទី២៖ ទាល់តែតែងតាំងជាប្រធានក្រុមតំណាងរាស្រ្តសិន ទើបស្វ័យប្រវត្តិជាប្រធានក្រុមមតិភាគតិចក្នុងរដ្ឋសភា ដែលមានឋានៈស្មើនាយករដ្ឋមន្រ្តីបាន។
សម្តេចតេជោ ហ៊ុន សែន បានថ្លែងយ៉ាងដូច្នេះថា៖ «ឱ្យ កឹម សុខា ចេញមកឆ្លើយចុះ គាត់ប្រាប់ថា “(សម រង្ស៊ី) ខុសដល់ទៅ២ គឺទី១ សម រង្ស៊ី ខ្លួនឯងមិនមែនជាតំណាងរាស្រ្ត និងមួយទៀត ទាល់តែតែងតាំងជាប្រធានថ្នាក់ដឹកនាំតំណាងរាស្រ្ត ទើបក្លាយជាប្រធានក្រុមមតិភាគតិចស្វ័យប្រវត្តិ” តើលោកឯងនិយាយមែនឬមិនមែន ចេញមកនិយាយចុះ បើអ្នកឯងយ៉ាងម៉េច សូមទៅព្រះអង្គដង្កើជាមួយគ្នា ហ៊ានឬមិនហ៊ាន ទៅស្បថទីនោះ»។
សម្តេចតេជោ ហ៊ុន សែន បានបន្ថែមយ៉ាងដូច្នេះថា៖ «គាត់និយាយត្រឹមត្រូវរបស់គាត់ ឯកឧត្តម កឹម សុខា ប៉ុន្តែគាត់ច្បាស់ជា មិនហ៊ាននិយាយ ប្រាប់គេប្រាប់ឯងនោះទេ តែឯកឧត្តម បើសិនជាបញ្ចេញៗឱ្យអស់ បញ្ចេញមិនអស់ប្រយ័ត្ននៅក្នុងអានេះ(ទូរស័ព្ទ) ក្នុងអាហ្នឹងគឺឯកឧត្តម បញ្ចេញតែអាណាមានប្រយោជន៍ទេ ប្រយ័ត្នតែខ្ញុំបញ្ចេញឱ្យផ្សាយអាហ្នឹង ឯកឧត្តមត្រូវទទួលខុសត្រូវចំពោះបញ្ហាហ្នឹង»។
សម្តេចតេជោ បានចាត់ទុកថា គណបក្សប្រឆាំងខ្លួនឯង ក៏បានធ្វើការបកស្រាយមិនត្រូវគ្នា ចំពោះប្រការ ៤៨ថ្មី (បី) បទបញ្ជាផ្ទៃក្នុងរដ្ឋសភានេះដែរ។
សូមបញ្ជាក់ថា នាគ្រាដែលសមាជិកជាន់ខ្ពស់របស់គណបក្សសង្រ្គោះជាតិ សម្រេចជាគោលការណ៍រួមដោយស្នើដាក់ លោក កឹម សុខា ជាប្រធានថ្នាក់ដឹកនាំ ក្រុមតំណាងរាស្រ្តគណបក្សសង្រ្គោះជាតិ ដែលជាប្រធានក្រុមមតិភាគតិចក្នុងសភា កាលពីដើមខែធ្នូ ឆ្នាំ២០១៦នោះ លោក សម រង្ស៉ី ប្រធានគណបក្ស សង្រ្គោះជាតិ បានព្យាយាមញែកកៅអីមួយនេះជាពីរគឺដោយឱ្យ លោក កឹម សុខា អង្គុយនៅកៅអីប្រធានថ្នាក់ដឹកនាំតំណាងរាស្រ្ត គណបក្សសង្រ្គោះជាតិ ហើយលោកនៅជាប្រធានក្រុមមតិភាគតិចនៅរដ្ឋសភា។ លោកធ្លាប់បានបង្ហោះនៅលើបណ្តាញសង្គម របស់លោកថា លោកនៅតែជាប្រធានក្រុមមតិភាគតិចដដែល។
ទន្ទឹមនឹងការទម្លាយរឿងនេះ សម្តេចតេជោ ហ៊ុន សែន ក៏បានជំរុញឱ្យអ្នកជាប់ទោសដែល លោក កឹម សុខា សន្យាជួយពួកគាត់នោះទៅទាមទារការដោះលែងពី លោក កឹម សុខា ព្រោះរឿងនេះជាការសន្យារបស់ លោក កឹម សុខា។ សម្តេចមានប្រសាសន៍ថា៖ «រឿងអ្នកដែល កឹម សុខា សន្យាជួយឱ្យរួចពីគុក ទៅទារពី កឹម សុខា ទៅ ! កុំមកទារពីហ៊ុន សែន។ ព្រោះអ្នកឯងបានសន្យាជាមួយខ្ញុំថា ៣ថ្ងៃក្រោយអ្នកឯងនឹងធ្វើ អ្នកឯងអត់បានធ្វើតាមការសន្យា ខ្ញុំក៏មិនធ្វើអ្វីទាំងអស់»៕
សូមស្តាប់ប្រសាសន៍សម្តេចតេជោ ហ៊ុន សែន៖
