(ភ្នំពេញ)៖ បុរសពីរនាក់រងរបួសធ្ងន់​ និងរថយន្ត២គ្រឿង និងម៉ូតូ១គ្រឿងរងការខូចខាត​ ដោយសារតែនារីវ័យក្មេងម្នាក់ បានបើករថយន្ត បោះពួយយ៉ាងលឿន រួចជ្រុលទៅ​បុករះចូលផ្ទះប្រជាពលរដ្ឋ។

ហេតុការណ៍នេះ បានកើតឡើងនៅម៉ោង ១១៖៥០នាទីយប់ ថ្ងៃទី៣០ ខែមករា​ ឆ្នាំ២០១៧​ តាមបណ្តោយផ្លូវ វត្តអង្គតាមិញ​ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។

ម្ចាស់ផ្ទះដែលរងគ្រោះ នៅក្នុងហេតុការណ៍ខាងលើបានប្រាប់ភ្នាក់ងារ Fresh News ថា​ នាម៉ោងជាង១១យប់ គាត់កំពុងតែដេកក្នុងផ្ទះ ក៏ស្រាប់តែឮសំឡេងប្រ៉ាវ​ បុកចូល​ដល់ទ្វារបន្ទប់របស់គាត់ ភ្លាមនោះគាត់បានបើកទ្វារចេញមក មើលក៏ឃើញរថយន្តមួយគ្រឿងម៉ាក Higlander ពណ៌ស ស្លាកលេខ 2Y-8963 ដែលបើកដោយនារីម្នាក់ បានបុករះម៉ូតូខ្ទេចមួយគ្រឿង និងបុរសពីរនាក់សន្លប់ស្តូកស្តឹង ចូលទៅក្នុងផ្ទះបាត់ទៅហើយ​។

ភ្លាមៗអ្នកនៅក្បែរនោះ បាននាំគ្នាជួយឃាត់អ្នកបើកបរ រួមជាមួយរថយន្តផងដែរ បន្ទាប់ពីឃាត់បានហើយ ជនរងគ្រោះដែលជាម្ចាស់ផ្ទះ បានរាយការណ៍ ជូន​សមត្ថកិច្ច​ឲ្យមក​ជួយអន្តរាគមន៍ និងនាំខ្លួនអ្នកបើករថយន្តបង្ក រួមជាមួយវត្ថុតាង ទៅប៉ុស្តិ៍នគរបាល រង់ចាំដោះស្រាយគ្នា នៅពេលក្រោយ។

ចំណែកបុរសដែលរងរបួសទាំងពីរនាក់ ត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះនៅមន្ទីរពេទ្យផងដែរ៕