(ភ្នំពេញ)៖ នៅព្រឹកថ្ងៃទី៣១ ខែមករា ឆ្នាំ២០១៧នេះ រដ្ឋសភាបើកកិច្ចប្រជុំវិសាមញ្ញមួយ ដើម្បីពិភាក្សាអំពីការធ្វើវិសោធនកម្ម បទបញ្ជាផ្ទៃក្នុងរដ្ឋសភា ប្រការ៤៨ថ្មី (បី) ដើម្បីវិលត្រឡប់ទៅប្រើប្រាស់ប្រការ ៤៨ (ពីរ) វិញ។ កិច្ចប្រជុំនេះក្រោមអធិបតីភាពសម្តេចពញាចក្រី ហេង សំរិន ប្រធានរដ្ឋសភាកម្ពុជា។ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក៏អញ្ជើញចូលរួមកិច្ចប្រជុំសភាពេញអង្គនេះផងដែរ ដើម្បីពន្យល់ការធ្វើវិសោធនកម្មបទបញ្ជាផ្ទៃក្នុងនេះ។

សំណើសុំធ្វើវិសោធនកម្មនេះ ត្រូវបានចុះហត្ថលេខាដោយក្រុមតំណាងរាស្រ្តចំនួន ៥៥រូប កាលពីកន្លងទៅថ្មីៗនេះ បន្ទាប់ពីមានការប្រកាសដោយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ស្នើឱ្យមានការធ្វើវិសោធនកម្មលើមាត្រា៤៨ថ្មី (បី) នៃបទបញ្ជាផ្ទៃក្នុងនៃរដ្ឋសភានេះឡើងវិញ។ សម្តេចថា ប្រការនេះបាន ធ្វើឱ្យពិបាកក្នុងការធ្វើការ រួមទាំងមានប៉ុនប៉ងចរចាដោះលែងអ្នកទោស ដែលបំពានដល់អំណាចតុលាការជាដើម។

នៅយប់ថ្ងៃទី៣០ ខែមករា ឆ្នាំ២០១៧ម្សិលមិញនេះ សម្តេចតេជោ ហ៊ុន សែន​ នាយករដ្ឋមន្រ្តីនៃកម្ពុជា បានទម្លាយសារខ្លីមួយ ដែលសម្តេចតេជោ និងលោក កឹម សុខា បានឆ្លងឆ្លើយគ្នាពាក់ព័ន្ធនឹងការតែងតាំង លោក កឹម សុខា ជាប្រធានថ្នាក់ដឹកនាំតំណាងរាស្រ្ត គណបក្សសង្រ្គោះជាតិ និងជាប្រធានក្រុមមតិភាគតិច នៅក្នុងរដ្ឋសភា កាលពីថ្ងៃទី០៧ ខែធ្នូ ឆ្នាំ២០១៦កន្លងទៅនេះ។

នៅក្នុងសាឆ្លើយឆ្លងនោះ សម្តេចតេជោ ហ៊ុន សែ​ន បានផ្ញើសារទៅ លោក កឹម សុខា នៅវេលាម៉ោង៧៖៣៤នាទីព្រឹក ថ្ងៃទី០៧ ខែធ្នូ ឆ្នាំ២០១៦ ចំណែកលោក កឹម សុខា បានតបមកសម្តេចតេជោ ហ៊ុន សែន វិញ នៅម៉ោង៧៖៥៧នាទី ព្រឹកថ្ងៃទី០៧ ខែធ្នូ ឆ្នាំ២០១៦ ដដែលនេះ ពោលគឺមុនកិច្ចប្រជុំសភាចាប់ផ្តើម។

សាររបស់សម្តេចតេជោ ហ៊ុន សែន ផ្ញើទៅកាន់ លោក កឹម សុខា (ម៉ោង៧៖៣៤នាទីព្រឹក) មានខ្លឹមសារយ៉ាងដូច្នេះថា៖

«ព្រឹកនេះខ្ញុំអានព័ត៌មានឃើញមានមនុស្សមួយចំនួនមិនយល់ព្រមលើការតែងតាំងឯ.ឧជា ប្រធានក្រុមតំណាងរាស្ត្រផង ប្រធានក្រុមភាគតិចផង ដោយទុកឱយ សម រង្សុី ធ្វើប្រធានក្រុមសម្លេងភាគតិចឯសំរាប់ ឯ.ឧធ្វើប្រធានក្រុមតំណាងរាស្ត្រ។ មាត្រា៤៨ថ្មីគឺមនុស្សតែម្នាក់ទេធ្វើតំណែងទាំង២ មិនមែនមនុស្ស២នាក់ទេ។ ក្នុងករណីយខាងឯ.ឧ ទទួលយកការចាត់តាំងនេះមិនបានទេ ព្រឹកនេះ ខ្ញុំសុំធ្វើវិសោនកម្មមាត្រា៤៨ នៃបទបញ្ជារផ្ទៃក្នុង ដោយលុបចោលតំណែងទាំងអស់តែម្តង»។

ចំណែកសាររបស់ លោក កឹម សុខា ឆ្លើយតបទៅកាន់សម្តេចតេជោ ហ៊ុន សែន (ម៉ោង៧៖៥៧នាទីព្រឹក) មានខ្លឹមសារយ៉ាងដូច្នេះថា៖

«មិនអីទេសម្តេច ទុកអញ្ជឹងដដែលចុះ»។

ទន្ទឹមគ្នានឹងការទម្លាយសារសំងាត់នេះ សម្តេចតេជោ ហ៊ុន សែន បានបញ្ជាក់ប្រាប់អង្គភាពព័ត៌មាន Fresh News នៅយប់ថ្ងៃទី៣០ ខែមករា ឆ្នាំ២០១៧នេះថា នៅក្នុងកិច្ចប្រជុំរដ្ឋសភាវិសាមញ្ញ នាព្រឹកថ្ងៃទី៣១ ខែមករា ឆ្នាំ២០១៧នេះ សម្តេចនឹងបកស្រាយលម្អិតអំពីបញ្ហាទាំងនេះ នៅក្នុងរដ្ឋសភា ហើយសម្តេចបានស្នើឱ្យសាធារណជនទាំងអស់រង់ចាំតាមដាន​ នូវការបកស្រាយរបស់សម្តេចនៅថ្ងៃស្អែក៕