(វ៉ាស៊ីនតោន)៖ នៅក្នុងកិច្ចសន្ទនាតាមទូរស័ព្ទជាមួយប្រធានាធិបតី ស្តីទីកូរ៉េខាងត្បូងលោក Hwang Kyo-Ahn លោក ដូណាល់ ត្រាំ ប្រធានាធិបតីថ្មីរបស់អាមេរិក បានប្តេជ្ញាប្រើប្រាស់រនាំងដែក ការពារប្រទេសសម្ព័ន្ធមិត្តរបស់ខ្លួននៅអាស៊ីបូព៌ាមួយនេះជានិច្ច ហើយមេដឹកនាំទាំងពីរក៏បានសន្យាពង្រឹង និងពង្រីកកិច្ចសហប្រតិបត្តិការបន្ថែមទៀតផងដែរ ប្រឆាំងនឹងការគំរាមកំហែងរបស់ប្រទេសកូរ៉េខាងជើង។ នេះបើតាមការចេញផ្សាយនៅមុននេះបន្តិច ដោយសារព័ត៌មាន Channel News Asia នាព្រឹកថ្ងៃចន្ទ ទី៣០ ខែមករា ឆ្នាំ២០១៧។
សេចក្តីថ្លែងការណ៍ពីសេតវិមានអាមេរិក បានបញ្ជាក់យ៉ាងដូច្នេះថា «ប្រធានាធិបតីលោក ដូណាល់ ត្រាំ បានប្តេជ្ញាប្រើប្រាស់រនាំងដែក ដើម្បីការពារប្រទេសកូរ៉េខាងត្បូង ដោយក្នុងនោះរួមមានការពង្រីកនូវឧបករណ៍ការពារបន្ថែម និងពង្រឹងសមត្ថភាពយោធាឲ្យបានពេញបរិបូរណ៍តែម្តង»។ ទោះបីជាស្ថិតនៅក្នុងកាលៈទេសៈណាក៏ដោយ ក៏សហរដ្ឋអាមេរិកបានលើកឡើងថា ខ្លួននឹងធ្វើអ្វីៗគ្រប់យ៉ាងដើម្បីការពារកូរ៉េខាងត្បូង ពីការគំរាមកំហែងរបស់កូរ៉េខាងជើង។
គួរបញ្ជាក់ថារដ្ឋមន្ត្រីការពារជាតិអាមេរិកថ្មីលោក ចេមស៍ ម៉ាតទីស នឹងទៅបំពេញទស្សនកិច្ចនៅប្រទេសកូរ៉េខាងត្បូង នៅថ្ងៃពុធសប្តាហ៍នេះ ហើយនឹងបន្តដំណើរទៅកាន់ប្រទេសជប៉ុនបន្ថែមទៀត នៅថ្ងៃសុក្រ ដែលជាដំណើរទស្សនកិច្ចដំបូង ទៅកាន់ប្រទេសសម្ព័ន្ធមិត្តធំៗរបស់ខ្លួន នៅអាស៊ីបូព៌ា បន្ទាប់ពីទើបបានឡើងកាន់តំណែងដ៏សំខាន់បំផុតនេះ៕
