(សៀមរាប)៖ នៅក្នុងជំនួបរវាងអ្នកសារព័ត៌មាន ប្រចាំខេត្តសៀមរាប ជាមួយក្រុមការងារនៃព្រឹត្តិការណ៍អង្គរសង្ក្រាន្ដ ​ឆ្នាំ២០១៧ ដើម្បីចូលរួមអបអរសាទរបុណ្យចូលឆ្នាំថ្មី ប្រពៃណីយ៍ជាតិខ្មែរ នារសៀលថ្ងៃទី២៥ ខែមករា ឆ្នាំ២០១៧នេះ ដែលមានវត្តមានរបស់​លោក សោម រតនា អ្នកនាំពាក្យព្រឹត្តិការណ៍អង្គរសង្ក្រាន្ដ លោកបានលើកឡើងថា អ្នកសារព័ត៌មានពិតជាបានចូលរួមចំណែកយ៉ាងសំខាន់ ក្នុងការផ្សព្វផ្សាយព័ត៌មាន និងដំណឹងផ្សេងៗដែលពាក់ព័ន្ធ ជាមួយព្រឹត្តិការណ៍អង្គរសង្ក្រាន្ដ ជូនដល់​មហាជន​ទាំងជាតិ និងអន្តរជាតិ ដែលព័ត៌មានទាំងនោះ​ គឺក្នុងគោលបំណងដើម្បីចូលរួមចំណែកក្នុងការលើកកម្ពស់ នូវវិស័យទេសចរណ៍ ​វប្បធម៌ អរិយធម៌ ទំនៀមទម្លាប់ ប្រវត្តិសាស្ត្រ និងសម្បត្តិបេតិកភ័ណ្ឌពិភពលោក ដែលមានមហាប្រាង្គប្រាសាទ​​ដ៏ល្បីល្បាញរាប់រយ/ពាន់របស់ខ្មែរយើង ។

តាមរយៈ​អ្នកនាំពាក្យ​ផងដែរ ​បាន​បញ្ជាក់ប្រាប់​ ក្រុម​អ្នកសារព័ត៌មានប្រចាំ​ខេត្តសៀមរាបថា ព្រឹត្តិការណ៍​អង្គរ​សង្ក្រាន្ត​នៅ​ឆ្នាំ២០១៧នេះ នឹងមាន​កម្មវិធីថ្មីៗ និងគួរជាទីចាប់អារម្មណ៍ជាច្រើនទៀត ដើម្បី​ឲ្យ​ព្រឹត្តិការណ៍​ដ៏​សំខាន់ នៅ​សៀមរាប-អង្គរ កាន់តែល្អប្រសើរថែមមួយកម្រិតទៀត នៅឯព្រឹត្តិការណ៍អង្គរ​សង្ក្រាន្ត​ នាឆ្នាំ​លើកទី៥នេះ ។

គួររំលឹកផងដែរថា ព្រឹត្តិការណ៍​អង្គរ​សង្ក្រាន្ត​ ជាព្រឹត្តិការណ៍ ដែលបានរៀបចំនិងប្រព្រឹត្តិទៅចំនួន៤លើកជាប់ៗគ្នារួចមកហើយ ដោយសហភាពសហព័ន្ធ យុវជនកម្ពុជា សហការជាមួយក្រសួងទេសចរណ៍, ក្រសួងវប្បធម៌ និងវិចិត្រសិល្បៈ, អាជ្ញាធរជាតិអប្សរា, អាជ្ញាធរខេត្តសៀមរាប, និងក្រសួង, ស្ថាប័ន, អង្គភាពរដ្ឋ/ឯកជនពាក់ព័ន្ធ, និងសាធារណៈជនទូទៅ ប្រកបដោយជោគជ័យ និងមានទាក់ទាញ​ភ្ញៀវទេសចរ​ជាតិ-អន្តរជាតិបានយ៉ាងច្រើនកុះករ និងបានផ្សព្វផ្សាយបានយ៉ាងទូលំទំលាយ ផងដែរ ។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានបញ្ជាប់ប្រាប់អង្គភាព Fresh News ថា៖ បើតាមការបូកសរុបទិន្ន័យ នៃរបាយការណ៍របស់ ក្រសួងទេសចរណ៍ គឺព្រឹត្តិការណ៍អង្គរសង្ក្រាន្ដ កាលពី​លើកទីមួយ​ឆ្នាំ២០១៣ គឺមាន​ភ្ញៀវទេសចរចូលរួម ១៧ម៉ឺន​នាក់, លើក​ទី​ពីរ ឆ្នាំ២០១៤ ចំនួន ៣៨ម៉ឺន​នាក់, លើក​ទី​បី ឆ្នាំ២០១៥ មាន​ចំនួន ៩៧ម៉ឺន​នាក់, និង​លើក​ទី​បួន ឆ្នាំ២០១៦ កន្លងទៅនេះ គឺ​មានការកើន​ឡើងរហូលដល់​ ១លាន ៣សែន​នាក់ ហើយ​យើងក៏​រំពឹងថា​ ព្រឹត្តិការណ៍នៅ​ឆ្នាំ២០១៧នេះ នឹងមានចំនួន​នេះ​កើនឡើង​ផងដែរ៕