(ភ្នំពេញ)៖ សាលាដំបូងរាជធានីភ្នំពេញនៅថ្ងៃទី២៥ ខែមករា ឆ្នាំ២០១៧នេះ បានលើកយកសំណុំរឿងមួយ ដែលមានជនជាប់ចោទចំនួន៧នាក់ ពាក់ព័ន្ធនិងករណីវាយវាយសម្លាប់សិស្សស្រី វិទ្យាល័យពងទឹក មកជំនុំជម្រះលើអង្គសេចក្ដី។ សវនាការនេះមាន លោក តុប ឈុនហេង ជាប្រធានក្រុមប្រឹក្សាជំនុំជម្រះ និងមានលោកស្រី កែវ សុគន្ធា ជាតំណាងអយ្យការ។ ប៉ុន្តែសវនាការនេះមិនទាន់បានបញ្ចប់ទាំងស្រុងនោះទេ ហើយតុលាការនឹងបន្តនៅថ្ងៃទី១៧ ខែកុម្ភៈ ឆ្នាំ២០១៧ទៀត។
មន្រ្តីតុលាការបានឲ្យដឹងថា ជនជាប់ចោទក្នុងសំណុំរឿងនេះរួមមាន៖ ឈ្មោះ ជុំ វិរៈ អាយុ២២ឆ្នាំ ជាជនដៃដល់ និងត្រូវជាបងជីដូនមួយជនរងគ្រោះ។ ទី២ឈ្មោះ សុខ សុភាព អាយុ១៧ឆ្នាំ ទី៣ឈ្មោះ លឹម បញ្ញាវន្ត អាយុ២០ឆ្នាំ ទី៤ឈ្មោះ ហុង សុជោតា អាយុ២១ឆ្នាំ ទី៥ឈ្មោះ សុខ សុភា អាយុ២២ឆ្នាំ ។ ទាំង៥នាក់ខាងលើ ត្រូវបានតំណាងអយ្យការចោទប្រកាន់ពីបទ មនុស្សឃាតគិតទុកជាមុន និងបទលួចមានស្ថានទម្ងន់ទោស ប្រព្រឹត្តកាលពីថ្ងៃទី១០ ខែឧសភា ឆ្នាំ២០១៦ នៅចំណុចផ្ទះបាក់បែក ភូមិព្រៃល្វា សង្កាត់ព្រៃវែង ខណ្ឌសង្កោ យោងតាមមាត្រា២០០ និងមាត្រា ៣៦០នៃក្រមព្រហ្មទណ្ឌ។ រីឯទី៦ ឈ្មោះ ឡេង ដានី អាយុ១៧ ទី៧ឈ្មោះ គ្រឿ ចន្ធូ អាយុ១៨ឆ្នាំ ទាំងពីរនាក់នេះ ជាប់ចោទពីបទ ទទួលផលចោរកម្ម ប្រព្រឹត្តកាលពីថ្ងៃទី១០ ខែឧសភា ឆ្នាំ២០១៦ យោងតាមមាត្រា ៣៩៩ និងមាត្រា ៤០០នៃក្រមព្រហ្មទណ្ឌ។
ចំណែកនារីរងគ្រោះមានឈ្មោះវ៉ុន រដ្ឋា អាយុ១៩ឆ្នាំ ជាកូនទោលក្នុងគ្រួសារ និងជាសិស្សថ្នាក់ទី១២D នៃវិទ្យាល័យពងទឹក មានឪពុកឈ្មោះ វ៉ាត វ៉ុត និង ម្ដាយឈ្មោះ វិត សង់ មានទីលំនៅភូមិព្រៃកី សង្កាត់ពងទឹកខណ្ឌដង្កោ។
នាពេលសវនាការ ជនជាប់ចោទឈ្មោះជុំ វីរៈ ដែលជាជនដៃដល់ និងជាបងប្អូនជីដូនមួយរបស់ជនរងគ្រោះបានឆ្លើយសារភាពថា ខ្លួនពិតជាប្រព្រឹត្តដូចការចោទប្រកាន់ប្រាកដមែន ដោយបានខលហៅជនរងគ្រោះទៅផឹកស៊ីជាមួយជនជាប់ចោទឈ្មោះ វ័ន្ត និងសុជោតា រួចក៏បើកម៉ូតូដឹកជនរងគ្រោះទៅវាយសម្លាប់ដោយប្រើដុំឥដ្ឋ និងក្រោយមកក៏យកម៉ូតូជនរងគ្រោះជិះចេញទៅលក់ឲ្យឈ្មោះ ដានី និងចន្ធូ យកលុយចែកគ្នាចាយ។ ចំណែកឯ ជនជាប់ចោទ៦នាក់ផ្សេងទៀត ពុំទាន់ត្រូវបានសាកសួរនៅឡើយទេ ដោយសារពេលវេលាខ្លី ទើបលោកចៅក្រមតុប ឈុនហេង សម្រេចលើកពេលទៅបន្តសវនាការនៅព្រឹកថ្ងៃទី១៧ ខែកុម្ភ: ឆ្នាំ២០១៧ខាងមុខវិញ។
គួរបញ្ជាក់ថា នារីរងគ្រោះឈ្មោះវ៉ុន រដ្ឋា ត្រូវបានបងជីដូនមួយ នាំបក្ខពួក អូសទាញយកទៅសម្លាប់ចោលយ៉ាងសាហាវឃោឃៅ ស្ថិតនៅទីសំណង់បាក់បែកមួយក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ នៅវេលាម៉ោង៤៖៣០នាទី ថ្ងៃទី១០ ខែឧសភា
ឆ្នាំ២០១៦។ ក្រោយពីធ្វើសកម្មភាពជនដៃដល់ និងបក្ខពួក៦នាក់ទៀត ត្រូវបានកម្លាំងនគរបាលខណ្ឌពោធិ៍សែនជ័យ សហការជាមួយកម្លាំងនគរបាលខណ្ឌដង្កោ តាមស្រាវជ្រាវរហូតចាប់ខ្លួនជាបន្តបន្ទាប់៕
