(កណ្ដាល)៖ កម្លាំងសមត្ថកិច្ចចម្រុះ នៅថ្ងៃទី២៥ ខែមករា​ ឆ្នាំ២០១៧នេះ បានចុះទៅបិទបញ្ឈប់ពិធីមង្គលការ​ខុសច្បាប់មួយ នៅភូមិព្រែកបាឡាត់ឆឹង ឃុំត្រើយស្លា ស្រុកស្អាង ខេត្តកណ្តាល ដោយសមត្ថកិច្ចបញ្ជាក់ហេតុផលថា កូនកំលោះជាជនបរទេសហើយ ថែមទាំងហួសទិដ្ឋការស្នាក់នៅកម្ពុជា ត្រឹមថ្ងៃរៀបការនេះទៀត។

លោកវរសេនីយ៍ត្រី រឿង ឌឿន អធិការរងនគរបាលស្រុកស្អាង បានបញ្ជាក់ថា កម្លាំងចម្រុះខាងលើ រួមមាន កម្លាំងនគរបាលស្រុកស្អាង សហការជាមួយកម្លាំងអន្តោ​ប្រវេសន៍ស្រុក កម្លាំងនគរបាលប៉ុស្តិ៍ត្រើយស្លា និងអាជ្ញាធរមូលដ្ឋាន។

លោកវរសេនីយ៍ត្រី រឿង ឌឿន បានបន្តថា កូនកំលោះឈ្មោះ ចាប មាន (ឈ្មោះខ្មែរ) តែឈ្មោះដើម CHINTON AWOREW អាយុ៣៦ឆ្នាំ ជនជាតិអូស្ត្រាលី។ ឯភាគីកូនក្រមុំឈ្មោះ លី មុន្នីរ័ត្ន អាយុ២៥ឆ្នាំ មានទីលំនៅភូមិឃុំខាងលើ។

លោកវរសេនីយ៍ត្រី រឿង ឌឿន បានបញ្ជាក់ទៀតថា មូលហេតុដែលកម្លាំងសមត្ថកិច្ចចុះហាមឃាត់ និងបិទបញ្ឈប់ពិធីមង្គលការនេះ ដោយសារកូនកំលោះជាជន​បរទេសឈ្មោះ CHINTON AWOREW ខាងលើ ផុតទិដ្ឋការស្នាក់នៅប្រទេសកម្ពុជា ត្រឹមវេលាម៉ោង​ ១២៖១០នាទី​ ថ្ងៃ​ទី២៥ ខែមករា​ ឆ្នាំ២០១៧ ដដែលនេះ៕