(ព្រះសីហនុ)៖ លោកឧត្ដមសេនីយ៍ទោ ជួន ណារិន្ទ ស្នងការ​នគរបាល​ខេត្តព្រះសីហនុ​បានណែនាំឲ្យកម្លាំង​​នគរបាល​ចរាចរណ៍​ផ្លូវ​គោក ​សហការជាមួយ​កម្លាំង​នគរបាល​ស្រុក​ព្រៃ​នប់ ចុះពង្រឹងច្បាប់ចរាចរណ៍ផ្លូវគោក ដើម្បីការពារសុវត្ថិភាពជូនប្រជាពលរដ្ឋ ដែលធ្វើដំណើរតាមដងផ្លូវជាតិលេខ៤។

ប្រតិបត្តិការការពារសុវត្ថិភាពជូនប្រជាពលរដ្ឋខាងលើ ត្រូវបានធ្វើឡើនៅថ្ងៃទី២៤ ខែ​មករា​ ឆ្នាំ២០១៧នេះ ​លើ​ផ្លូវ​ជាតិ​លេខ៤​ នៅមុខ​សាលាស្រុកព្រៃនប់ ស្ថិត​នៅ​ភូមិ​បឹងវែង​ ​ឃុំ​វាលរេញ​​ ស្រុក​ព្រៃ​នប់​ ខេត្ត​ព្រះសីហនុ​។

ប្រតិបត្តិការនេះ ដឹកនាំ​ដោយ​លោក​វរសេនីយ៍ឯក​ ព្រហ្ម​ ពៅ​​ នាយការិយាល័យ​ ដែលមានកម្លាំងនគរបាលចម្រុះ ២៦នាក់ ដោយបានត្រួតពិនិត្យ​លក្ខណៈ​បច្ចេកទេស​យានយន្ត​គ្រប់ប្រភេទ​ និងណែនាំដល់ម្ចាស់រថយន្ត​ ដែលបើកបរ​លើសលឿនកំណត់​ ឲ្យបន្ថយល្បឿនបើកបររបស់ខ្លួន ដើម្បីការពារអាយុជីវិតទាំងអស់គ្នា៕