(ភ្នំពេញ)៖ លោក គឹម សន្តិភាព អ្នកនាំពាក្យក្រសួងយុត្តិធម៌ បានចាត់ទុកថា សេចក្តីថ្លែងការណ៍របស់ក្រុមអង្គការសង្គមស៊ីវិល ដែលទាមទារឱ្យតុលាការ ដោះលែងសកម្មជនអាដហុក និងគ.ជ.បនាថ្មីៗនេះ គឺជារឿងដដែលៗ និងមិនមានប្រយោជន៍។
លោក គឹម សន្តិភាព បានលើកឡើងប្រាប់អង្គភាពព័ត៌មាន Fresh News នៅរសៀលថ្ងៃទី២៤ ខែមករា ឆ្នាំ២០១៧ថា «សេចក្តីថ្លែងការណ៍ទាំងនេះ ជារឿងឥតប្រយោជន៍! អ្នកគួរពិចារណាធ្វើនូវអ្វីដែលមានប្រយោជន៍ ប្រសិនបើអ្នកមានសមានចិត្តពិតប្រាកដមែននោះ ដូចជាស្វែងរក និងផ្តល់ការគាំទ្រ អ្នកជំនាញច្បាប់ ដែលពូកែៗជាងនេះ ដើម្បីជួយការពារអ្នកទាំងនោះទៅតាមដំណាក់កាលនៃនីតិវិធី របស់តុលាការជាដើម ប្រសើរជាងធ្វើរឿង ឥតប្រយោជន៍ដដែលៗបែបនេះ!»។
កាលពីថ្ងៃទី២៣ ខែមករា ឆ្នាំ២០១៧ ម្សិលមិញនេះ អង្គការសង្គមស៊ីវិល និងសហគមន៍រងគ្រោះដីធ្លីចំនួន២៥ បានចេញសេចក្ដីថ្លែងការណ៍រួមមួយដោយថ្កោលទោស អាជ្ញាធរកម្ពុជា ដែលមិនព្រមដោះលែងបុគ្គលិកសមាគមអាដហុក និង គ.ជ.ប លោក នី ចរិយា។ សេចក្តីថ្លែងការណ៍នោះ បានចាត់ទុកថា ការឃុំខ្លួនអ្នកទាំងនេះគឺជាការរើសអើង ហើយចោទរាជរដ្ឋាភិបាលថា ប្រើប្រាស់តុលាការដើម្បីដាក់សម្ពាធលើអ្នកហ៊ានរិះគន់ប្រឆាំង នៅមុនការបោះឆ្នោតក្រុមប្រឹក្សាឃុំ-សង្កាត់ និងការបោះឆ្នោតជាតិ។
រហូតដល់ពេលនេះ មានរយៈពេលជាង៨ខែហើយ ដែលមន្រ្តីអាដហុក និងគ.ជ.ប ត្រូវបានតុលាការឃុំខ្លួន។ មន្រ្តីអាដហុក និងគ.ជ.បទាំងនោះ រួមមាន លោក យី សុខសាន លោក វង់ ណៃដា លោក នី សុខា លោកស្រី លឹម មុនី និង លោក នី ចរិយា (អគ្គលេខាធិការគ.ជ.ប) ដែលត្រូវតុលាការចោទប្រកាន់ពីបទ សមគំនិត និងសូកប៉ាន់សាក្សី ក្នុងរឿងសញ្ចារកម្មរបស់ កញ្ញា ខុម ចាន់តារាទី ហៅស្រីមុំ ដែលធ្លាយរឿងអាស្រូវជាមួយ លោក កឹម សុខា៕
