(ភ្នំពេញ)៖ រយៈពេល១១ខែ ឆ្នាំ២០១៦ កន្លងទៅនេះ រាជធានីភ្នំពេញ បានទទួលភ្ញៀវទេសចរអន្តរជាតិ ជាង២លាននាក់ ដែលកើន៦.៤ភាគរយ បើធៀបនឹងរយៈពេលដូចគ្នា នៅឆ្នាំ២០១៥។ នេះបើតាមការអះអាងរបស់ លោកស្រី គឹម សុវណ្ណា ប្រធានមន្ទីរទេសចរណ៍រាជធានីភ្នំពេញ។

លោកស្រី គឹម សុវណ្ណា បានឲ្យដឹងថា «ស្ថិតិភ្ញៀវទេសចរអន្តរជាតិ មកទស្សនារាជធានីភ្នំពេញ ក្នុងរយៈ១១ខែ ឆ្នាំ២០១៦ មានចំនួន ២,៤៤៥,៨៣០នាក់ មាន១៥៣សញ្ជាតិ កើន៦.៤ភាគរយ ធៀបនឹងរយៈពេលដូចគ្នា ក្នុងឆ្នាំ២០១៥»។ លោកស្រីប្រធានមន្ទីរបានបន្តថា ភ្ញៀវទេសចរអន្តរជាតិដែលមកទស្សនា ក្នុងរាជធានីច្រើនជាងគេ មានភ្ញៀវសញ្ជាតិចិន និងភ្ញៀវជាតិវៀតណាម។ ក្រៅពីនេះ មានដូចជា ជប៉ុន កូរ៉េខាងត្បូង ថៃ ម៉ាឡេស៊ី អាមេរិក បារាំង អូស្រ្តាលី អង់គ្លេស។

លោកស្រី គឹម សុវណ្ណា ក៏បានបន្ថែមទៀតថា «ក្នុងនៅរាជធានីភ្នំពេញ យើងមានរមណីយដ្ឋានទេសចរណ៍កម្សាន្ត និងទីតាំងទេសចរណ៍ធំៗ សរុប១៨ទីតាំង»។

បើតាមរដ្ឋមន្រ្តីក្រសួងទេសចរណ៍ លោក ថោង ខុន បានប៉ានប្រមាណថា ឆ្នាំ២០១៦ ភ្ញៀវទេសចរអន្តរជាតិ ដែលចូលមកទស្សនាកម្ពុជា ប្រហែលស្ថិតក្នុងរង្វង់ ៥លាននាក់៕