(កណ្តាល)៖ នាយឧត្តមសេនីយ៍ ហ៊ីង ប៊ុនហៀង បានដឹកនាំក្រុមការងារ ដង្ហែរអង្គផ្កាប្រាក់ និងនាំយកថវិកាចំនួន២០០លានរៀល ដែលជាអំណោយ សម្តេចតេជោ ហ៊ុន សែន និង សម្តេច កិត្តិព្រឹទ្ធបណ្ឌិត ប្រគល់ជូនមេជាងសំណង់ ដើម្បីកសាងបង្ហើយវិទ្យាល័យ សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ពោអណ្តែត នៅខេត្តកណ្តាល នៅថ្ងៃទី២៣ ខែមករា ឆ្នាំ២០១៧នេះ។
ក្រៅពីការប្រគល់ថវិកានេះនាយឧត្តមសេនីយ៍ ហ៊ីង ប៊ុនហៀង បានជួបសំណេះសំណាល ជាមួយប្រជាពលរដ្ឋ ជិត៤០០០នាក់ ដែលស្ថិតក្នុង ស្រុកកណ្តាលស្ទឹង ខេត្តកណ្តាលផងដែរ។
បន្ថែមពីលើនេះ ក្រោយពីស្តាប់របាយការណ៍ លោក បូ ណារ៉េត អភិបាលស្រុករួចមក នាយឧត្តមសេនីយ៍ ក៏បាននាំនូវការផ្តាំផ្ញើការសាកសួសុខទុក្ខ ពីសំណាក់សម្តេច ពញាចក្រី ហេង សំរិន, សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះពុកម៉ែបងប្អូន កងកម្លាំងប្រដាប់អាវុធ អជ្ញាធរមូលដ្ឋាន លោកគ្រូអ្នកគ្រូ និង សិស្សានិសិស្សផងដែរ។
នាយឧត្តមសេនីយ៍ ហ៊ីង ប៊ុនហៀង បានថ្លែងនូវការកោតសរសើរ ដល់លោកអភិបាលស្រុក ក្រុមប្រឹក្សាស្រុក ក្រុមប្រឹក្សាឃុំ ក៏ដូចជា កងកម្លាំងប្រដាប់ និងប្រជាការពារ ទាំងអស់ ដែលខិតខំបំពេញការងារ ដែលបានចូលរួម ថែរក្សា ការពារ ជួយកសាង អភិវឌ្ឍនូវសមិទ្ធផលជាច្រើន។
ឆ្លៀតក្នុងឱកាសនោះ នាយឧត្តមសេនីយ៍ ហ៊ីង ប៊ុនហៀង បានលើកឡើងពីប្រវត្តិដ៏ជូជត់ និងទុក្ខវេទនាបំផុតដែលប្រជាពលរដ្ឋ កម្ពុជាបានជួប ប្រទះក្នុងរបបប្រល័យពូជសាសន៍ ប៉ុល ពត ជាក់ស្តែងវត្តអារាម និងសាលារៀនទូទាំងស្រុកកណ្តាលស្ទឹងនេះ តែម្តងត្រូវបានបំផ្លាញខ្ទេចខ្ទី គ្មានសល់ទេ ក្នុងកាលៈទេសៈដ៍សែនលំបាកវេទនា ពុំដែលឃើញមានគណបក្សនយោបាយ ឬជនមួយចំនួនដែលអះអាងថា ជាអ្នកស្នេហាជាតិចេញមុខ មកសង្គ្រោះជាតិនោះទេ គឺមានតែសម្តេចទាំងបីដែលដឹកនាំរំដោះ និងកសាងប្រទេសជាតិតាំងពីបាតដៃទទេពីគំនរផេះផង់។ នាយឧត្តមសេនីយ៍ ហ៊ីង ប៊ុនហៀង បានបញ្ជាក់ជូន ពុក ម៉ែ បង ប្អូនថា បើគ្មានថ្ងៃ ៧ មករាទេ ក៍គ្មាន កិច្ចព្រមព្រៀងសន្តិភាព ២៣ តុលា ក៍គ្មាន សិទ្ធមនុស្ស គ្មានសិទ្ធរស់រានមានជីវិត សិទ្ធផ្សេងៗ ហើយក៏គ្មានសុខសន្តិភាព ស្ថេរភាព និងការអភិវឌ្ឍរីកចម្រើនលូតលាស់លើគ្រប់វិស័យ ដូចសព្វថ្ងៃនេះនោះដែរ។
គួរបញ្ជាក់ថា នាយឧត្តមសេនីយ៍ ហ៊ីង ប៊ុនហៀង បានប្រគេនបច្ច័យសម្រាប់វត្តពោធិ៍អណ្តែត ចំនួន១០លានរៀល ថវិកាសម្រាប់ជាងកសាងវិទ្យាល័យ សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ពោធិ៍អណ្តែត ចំនួន ២០០លានរៀល។ក្រៅពីនោះ លោកក៍បានឧបត្ថម្ភដល់លោកគ្រូអ្នកគ្រូ សិស្សានិសិស្សអាជ្ញាធរ កងកម្លាំងប្រដាប់អាវុធនិងប្រជាពលរដ្ឋផងដែរ៕
