(ពោធិ៍សាត់)៖ លោក​ ម៉ៅ ធនិន អភិបាលខេត្តពោធិ៍សាត់ នាព្រឹកថ្ងៃទី២២ ខែមករា ឆ្នាំ២០១៧នេះ បានអញ្ជើញជាអធិបតី ក្នុងពិធីបិទវគ្គសមាទានធុតង្គ និងចម្រើន​សមថវិបស្សានាកម្មដ្ឋាន នៅមណ្ឌលវិស្សនាធុរៈភ្នំទ្រព្យខាងជើង(ធ្លាជ្រៃ) ដែលស្ថិតក្នុងភូមិព្រៃឱម៉ាល់ សង្កាត់រលាប ក្រុងពោធិ៍សាត់ ខេត្តពោធិ៍សាត់។

ក្នុងកម្មវិធីបិទវគ្គនោះ បានការនិមន្ត និងអញ្ជើញចូលរួមពី ព្រះគ្រូ កែវ កន ព្រះបាឡាត់គណខេត្ត តំណាងព្រះគ្រូ យ៉ែម ហន ព្រះមេគណខេត្ត មន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ប្រភេទ អាជ្ញាធរក្រុង ព្រះសង្ឃ សីលវន្ត សីលវត្តី និងប្រជាពលរដ្ឋជិតឆ្ងាយ សរុបជាង៤០០អង្គ/នាក់។

លោក ម៉ៅ ធនិន បានសម្តែងការអបអរចំពោះលទ្ធផលវគ្គសិក្សា សមទានធុតង្គនៅខេត្តពោធិ៍សាត់ ដោយសូមឲ្យសកម្មភាពនេះមានជារៀងរាល់ឆ្នាំ ពីព្រោះមានសារៈ​សំខាន់ណាស់ ក្នុងវិស័យ​ព្រះពុទ្ធសាសនា សម្រាប់ឲ្យព្រះសង្ឃ សីលវន្ត សីលវត្តី ជាពិសេសយុវជន យុវនារី បានស្គាល់អំពីបុណ្យបាប ល្អ អាក្រក់ និងអប់រំចិត្ត បានស្ងប់រម្ងាប់ចាកកិលេសទាំងពួង។ ជាការពិតណាស់ថា អក្សរសាស្ត្រ ក្បួនខ្នាត និងវប្បធម៌របស់ខ្មែរយើង គឺមានតែវត្តអារាមទេ ដែលបានរក្សាការ​ពាររហូតមកដល់ពេលនេះ ហេតុនេះត្រូវតែរួមគ្នាថែរក្សាការពារ ប្រយោជន៍​ដល់កូនចៅមួយជំនាន់ៗ បានដឹង បានឃើញ និងសិក្សារៀនសូត្រ កុំចម្លងពីបរទេស ដែលមិនមែនវប្បធម៌របស់ខ្មែរ។

លោក​អភិបាលខេត្ត បានសំណូមពរថា ក្រោយពីបញ្ចប់វគ្គសមាទានធុតង្គ សូមឲ្យព្រះសង្ឃ សីលវន្ត សីលវត្តី យកទៅធ្វើការផ្សព្វផ្សាយឲ្យបានទូលំទូលាយ ដល់កូនចៅបងប្អូន ព្រោះថា​ក្លឹមសារធុតង្គនេះ បានបង្ហាញអំពីការសិក្សាធម៌វិន័យ ជម្រះចិត្តឲ្យបានស្អាតបរិសុទ្ធ រក្សាសីលសមាធិបញ្ញា ឲ្យបានបរិបូរណ៌ ពីព្រោះធុតង្គទាំង១៣ តែងតែមានសេចក្តីសណ្តោស ករុណាចំពោះមនុស្សផងទាំងឡាយ។​

គួរបញ្ជាក់ថា វគ្គសមាទានធុតង្គ និងចម្រើនសមថវិបស្សានាកម្មដ្ឋាន ត្រូវបានចាប់ផ្តើមឡើងរយៈពេលសិក្សា ៩យប់ ៩ថ្ងៃ ចាប់ពីថ្ងៃទី១៤-២២ ខែមករា ឆ្នាំ២០១៧ ដែលមានសិក្ខាកាមចូលរួមជាង ២០០អង្គ/នាក់ ក្រោមព្រះគំនិតផ្តួចផ្តើមដោយ ព្រះគ្រូ យ៉ែម ហន ព្រះមេគណខេត្តពោធិ៍សាត់។

ឆ្លៀតក្នុងឱកាសនោះ លោក ម៉ៅ ធនិន ក៏បានចែកអំណោយ ជូនដល់សីលវន្ត សីលវត្តីជាង៣០០នាក់ ក្នុងម្នាក់ៗ ទទួលបានក្រណាត់ស១ដុំ ព្រមទាំងបានបន្តចុះពិនិត្យ និងផ្តល់អនុសាសន៍ល្អៗមួយចំនួន ដល់ក្រុមការងារបច្ចេកទេស ដែលបាននឹងកំពុងតម្លើងទូរទស្សន៍ខ្នាតធំ នៅចំណុចគល់ស្ពានថ្មថ្មី ដើម្បីបំពេញតម្រូវការ និងលម្អសោភណ្ឌភាពក្រុងពោធិ៍សាត់ បានមួយផ្នែកផងដែរ៕