(ព្រៃវែង)៖ នាថ្ងៃទី២១ ខែមករា ឆ្នាំ២០១៧ លោក ប៉ោ ភក្តិ អនុប្រធានក្រុមការងារគណបក្សប្រជាជនកម្ពុជាចុះជួយស្រុកកំពង់ត្របែក និងជាប្រធានក្រុមការងារចុះជួយឃុំគោខ្ចក បានអញ្ជើញជា អធិបតីក្នុងពិធីសន្និបាតបូកសរុបលទ្ធផលការងារគណៈកម្មាធិការគណបក្ស ឃុំគោខ្ចក អាណត្តិទី៣ និងទិសដៅភារកិច្ច អាណត្តិទី៤ (២០១៧-២០២២) ដោយមានសមាសភាពចូលរួម ពីអស់លោក លោកស្រី ជាសមាជិក សមាជិកា គណបក្សស្រុក ឃុំ ភូមិ និងសកម្មជនប្រមាណ១០០០នាក់។
សន្និបាតបក្សនេះ ដើម្បីត្រួតពិនិត្យ វាយតម្លៃលទ្ធផល នៃការអនុវត្តគោលនយោបាយរបស់គណបក្ស សម្រាប់អភិវឌ្ឍន៍ឃុំ រយៈពេល៥ ឆ្នាំកន្លងមក និងលើកទិសដៅភារកិច្ច ដាក់ចេញនូវកម្មវិធីនយោបាយរបស់ គណៈកម្មាធិការគណបក្សឃុំ សម្រាប់អភិវឌ្ឍន៍ ពីឆ្នាំ២០១៧-២០២២ និងដំណើរការបោះឆ្នោតស្ទាបស្ទង់មតិ ដើម្បីធ្វើការជ្រើសរើសបេក្ខជន ដែលត្រូវឈរឈ្មោះបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ដែលប្រព្រឹត្តទៅនៅថ្ងៃទី០៤ ខែមិថុនា ឆ្នាំ២០១៧ ខាងមុខ។
លោកបានលើកឡើងថា ដើម្បីធានាបាននូវសុវត្ថិភាព និងរបៀបរៀបរយនៃដំណើរការ សន្និបាតគណៈកម្មាធិការគណបក្សឃុំ សូមឲ្យសមាជិក-សមាជិកាទាំងអស់ អនុវត្តឲ្យបានត្រឹមត្រូវ តាមកម្មវិធី និងសេចក្តីប្រកាសផ្សេងៗរបស់សន្និបាត ហើយតាមដានស្តាប់របាយការណ៍ និងមុនពេលអនុម័តបញ្ហាផ្សេងៗ សូមយកចិត្តទុកដាក់អនុវត្តឲ្យបានត្រឹមត្រូវ ប្រកបដោយប្រសិទ្ធភាព និងគុណភាព៕
