(ភ្នំពេញ)៖ សម្តេច សាយ ឈុំ ប្រធានព្រឹទ្ធសភាកម្ពុជា បានថ្លែងឲ្យដឹងថា ប្រទេសកម្ពុជា-ព័រទុយហ្គាល់ បានចុះអនុស្សារណៈយោគយល់គ្នា​ស្តីពីការពិគ្រោះយោបល់​នៃប្រទេសទាំងពីរ ដើម្បីពង្រឹងពង្រីកកិច្ចសហប្រតិបត្តិការលើ វិស័យនយោបាយ សេដ្ឋកិច្ច និងវប្បធម៌។ អនុស្សារណៈនោះនឹងជំរុញឲ្យមាន ទំនាក់ទំនងរវាងអង្គការ នីតិប្បញ្ញត្តិ ក្រសួង ស្ថាប័ននានា ដើម្បីបម្រើផលប្រយោជន៍ដល់ប្រទេស និងប្រជាជនទាំងពីរ។

សម្តេច សាយ ឈុំ មានលើកឡើងបែបនេះ ខណៈសម្តេច បានអនុញ្ញាតឲ្យ លោក Francisco Vaz Patto ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋ​ព័រទុយហ្គាល់ប្រចាំកម្ពុជា ចូលជួបសវនាការនិងសម្តែងការ គួរសម នៅវិមានព្រឹទ្ធសភា នៅថ្ងៃទី១៩ ខែមករា ឆ្នាំ២០១៧។

នៅក្នុងឱកាសនោះ លោក Francisco Vaz Patto ឯកអគ្គរដ្ឋទូត បានថ្លែងអំណរគុណចំពោះសម្តេចប្រធានព្រឹទ្ធសភា ដែលបានផ្តល់កិត្តិយស​អនុញ្ញាតឲ្យលោក​ចូលជួបសម្តែង​ការគួរសម​នាឱកាសនេះ។ក្នុងនាមឯកអគ្គរដ្ឋទូតសាធារណរដ្ឋព័រទុយហ្គាល់ប្រចាំកម្ពុជា លោកបានសន្យាថា នឹងខិតខំជំរុញនូវទំនាក់ទំនង និងកិច្ចសហ​ប្រតិបត្តិការរវាងប្រជាជន និងប្រទេសទាំងពីរឲ្យកាន់តែរីកចម្រើនថែមទៀត។

បន្ថែមពីលើនេះ លោកបានជម្រាបជូនសម្តេចថា ស្ថានទូតព័រទុយហ្គាល់ បានបើកការិយាល័យពាណិជ្ជកម្ម និងសហប្រតិបត្តិការរួចហើយ ដើម្បីបង្កើននូវការធ្វើពាណិជ្ជកម្ម និងវិនិយោគរបស់ព័រទុយហ្គាល់នៅកម្ពុជា។ លោកក៏បានសម្តែងនូវការរីករាយ ដោយមើលឃើញថា វិស័យវប្ប-ធម៌ និងអប់រំនៃប្រទេសទាំងពីរ នឹង មានសក្តានុពល​ផ្លាស់ប្តូរគ្នា​ទៅវិញទៅមក។

សម្តេចវិបុលសេនាភក្តី សាយ ឈុំ បានសម្តែងនូវការអបអរសាទរ និងស្វាគមន៍ចំពោះ លោក Francisco Vaz Patto ហើយសម្តេចមានជំនឿជឿជាក់ថា ឯកអគ្គរដ្ឋទូត នឹងរួមចំណែកលើកកម្ពស់ទំនាក់ទំនង និងកិច្ចសហប្រតិបត្តិការរវាងប្រជាជន និងប្រទេសទាំងពីរ ឲ្យកាន់តែល្អប្រសើរឡើង។

សម្តេចប្រធានព្រឹទ្ធសភា បានឲ្យដឹងថា​ សម្តេចនឹងខិតខំរួមចំណែកលើកតម្កើងទំនាក់ទំនង និងកិច្ចសហប្រតិបត្តិការទាំងនោះ ដើម្បីបម្រើផលប្រយោជន៍របស់ប្រទេស និងប្រជាជនទាំងពីរ៕