(ព្រៃវែង)៖ មន្ត្រីបសុពេទ្យនៃមន្ទីកសិកម្ម រុក្ខាប្រមាញ់ និងនេសាទខេត្តព្រៃវែង នៅថ្ងៃទី១៨ ខែមករា ឆ្នាំ២០១៧នេះ បានបញ្ជាឲ្យអាជីវករវៀតណាម ចុះកិច្ចសន្យាបញ្ឈប់ការដឹកសាច់ជ្រូក ដែលគ្មានការអនុញ្ញាតពីមន្រ្តីកម្ពុជា ចូលមកលក់ឲ្យប្រជាពលរដ្ឋកម្ពុជាតទៅទៀត ព្រោះការនាំចូលលក់ឲ្យពលរដ្ឋខ្មែរ កាលពីកន្លងទៅ គឺគ្មានការត្រួតពិនិត្យត្រឹមត្រូវ។
លោក ចិន វិសាល ប្រធានការិយាល័យបសុពេទ្យ នៃមន្ទីរកសិកម្មខេត្ត បានប្រាប់អ្នកសារព័ត៌មានថា លោកបានដឹកនាំកម្លាំងចុះពិនិត្យផ្ទាល់ហើយ ចំពោះអាជីវករវៀតណាម មកលក់សាច់ជ្រូក ពោះជ្រូក ឆ្លងចូលមកតាមច្រកអន្តរជាតិកោះរកា ស្រុកពាមជរ៍ ខេត្តព្រៃវែង។ ដើម្បីធានាសុវត្ថិភាពជូនប្រជាពលរដ្ឋ ក្រុមការងាររបស់លោកបានឲ្យពួកគាត់ធ្វើកិច្ចសន្យា បញ្ឈប់ការនាំចូលសាច់ជ្រូកទាំងនោះ ដោយគ្មានការត្រួតពិនិត្យទៀត។
លោក ចិន វិសាល បានបន្តថា «ការធ្វើកិច្ចសន្យានេះ គឺសម្រាប់លើកទី១ តែបើពួកគាត់នៅបន្តល្មើសជាលើកទី២ អាជ្ញាធរនឹងចាត់វិធានការក្ដៅតាមផ្លូវច្បាប់»។
ជាមួយគ្នានោះ ប្រជាពលរដ្ឋខ្មែរ ដែលរស់នៅភូមិកោះរកា និងភូមិជ្រៃថ្មី ឃុំកោះរកា បាននិយាយថា មូលហេតុពួកគាត់សម្រេចចិត្តទិញសាច់ជ្រូក ពោះជ្រូករបស់វៀតណាម ដោយសារតំបន់គាត់ឆ្ងាយពីផ្សារ គ្មានអ្នកលក់ក្រៅពីអាជីវករវៀតណាម ហើយពួកគាត់ទិញសាច់ទាំងនោះ ជាង២០ឆ្នាំ មកហើយ៕
