(រតនគិរី)៖ ខេត្តរតនគិរី ដែលជាខេត្តទេចរណ៍ធម្មជាតិ​មានរម្មណីដ្ឋានទេសចរណ៍រហូតដល់ទៅ ១៤កន្លែងនោះ នៅឆ្នាំ២០១៦កន្លងទៅ ទទួលបានភ្ញៀវទេសចរជាតិ-អន្ដរជាតិ ជិត ២០ម៉ឺននាក់ ដែលចំនួននេះប្រៀបធៀប នឹងឆ្នាំ២០១៥ កើនឡើងជិត៦ភាគរយ។

នេះបើតាមរបាយការណ៍ ដែលបង្ហាញក្នុងសន្និបាតបូកសរុបលទ្ធផល​ការងារប្រចាំឆ្នាំ២០១៦ និងលើកទិសដៅអនុវត្តបន្ដសម្រាប់ឆ្នាំ២០១៧ នៅព្រឹកថ្ងៃទី១៦ ខែមករា ឆ្នាំ២០១៧នេះ ក្រោម​អធិបតីភាពលោកទេសរដ្ឋមន្រ្តី លី ធុជ និងដោយមានការ​ចូលរួមពី លោក ថង សាវុន អភិបាលខេត្តរតនគិរី ព្រមទាំងថ្នាក់ដឹកនាំក្នុងខេត្ត និងមន្ដ្រីពាក់ព័ន្ធជាច្រើនរូបទៀត។

របាយការណ៍បានឲ្យដឹងថា ភ្ញៀវទេសចរដែលបានទៅកម្សាន្ដនៅខេត្តរតនគិរីសរុប ១៨៩,៦៦៩នាក់ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៥ កើនឡើងភ្ញៀវទេសចរចំនួន ៥.៧៨ភាគរយ ក្នុងនោះមាន ភ្ញៀវទេសចរ​ជាតិ​ចំនួន ​១៦៥,៩៧៧នាក់ កើន ៥.៩១ភាគរយ និងភ្ញៀវទេសចរ​អន្តរជាតិ ​២៣,៦៩២នាក់ កើន ៤.៨៥ភាគរយ។

របាយការណ៍ដដែលបញ្ជាក់ថា សេវាកម្មស្នាក់នៅក្នុងខេត្តរតនគិរីសរុបចំនួន ​៤៩កន្លែង ស្មើនឹង ១,១២៩បន្ទប់ ក្នុងនេះមានសណ្ឋាគារចំនួន ​១៤កន្លែង ស្មើនឹង​ ៦២៥បន្ទប់ និងផ្ទះសំណាក់ចំនួន​ ៣៥កន្លែង ស្មើនឹង​៥០៤បន្ទប់ ហើយមានភោជនីយដ្ឋានចំនួន​ ១៤កន្លែង និងអាហារដ្ឋានចំនួន ​២៥កន្លែង​ រីឯកន្លែងលក់វត្ថុអនុស្សាវរីយ៍សរុបចំនួន​ ១៩កន្លែង គឺប្រភេទត្បូងចំនួន​ ១០កន្លែង, ប្រភេទឈើ​ ៥កន្លែង និងប្រភេទប្រាក់ ចំនួន​៤កន្លែង​។

បន្ថែមពីនេះ អាជ្ញាធរខេត្ត បានចេញអាជ្ញាប័ណ្ណទេសចរណ៍ជូនដល់មូលដ្ឋានអាជីវកម្ម សេវាកម្មទេសចរណ៍សរុបចំនួន ​៣៣អាជ្ញាប័ណ្ណ ក្នុងនោះមានសណ្ឋាគារចំនួន​​៧, ផ្ទះសំណាក់ចំនួន ​២២, ភោជនីយដ្ឋាន​២ និងខារ៉ាអូខេចំនួន ​២កន្លែង​។​

សូមបញ្ជាក់ថា ​សព្វថ្ងៃខេត្តរតនគិរីមានរមណីយដ្ឋានទេសចរណ៍ធម្មជាតិ ចំនួន ០៨កន្លែង គ្រប់គ្រងដោយសហគមន៍ជនជាតិដើមភាគតិច ដើម្បីរកចំណូលតាមរូបភាពទេសចរណ៍ រមណីយដ្ឋានទាំងនេះរួមមាន៖ បឹងយក្ខឡោម ទឹកជ្រោះកាចាញ ទឹកជ្រោះកាទៀង ទឹកជ្រោះចាអ៊ុង ទឹកជ្រោះអូរស៊ិនលែរ៍ បឹងលំកុដ ទឹកជួរតាតតៃ និងទឹកជួរទឹង៕