(ស្ទឹងត្រែង)៖ កម្លាំងសមត្ថកិច្ចក្រុងស្ទឹងត្រែង បានឃាត់ខ្លួនជនសង្ស័យម្នាក់ ដែលបង្ខាំងប្រពន្ធទើបតែលែងលះគ្នាបាន៣ខែ ទុកក្នុងផ្ទះរយៈពេល២ថ្ងៃ ដើម្បីសុំត្រូវរ៉ូវគ្នាជាថ្មី។

ការឃាត់ខ្លួននេះ ត្រូវបានធ្វើឡើង នៅថ្ងៃទី១៤ ខែមករា ឆ្នាំ២០១៧នេះ ​ត្រង់ចំណុចសាលារៀនបួនមករា​ ភូមិកណ្ដាល​ សង្កាត់ស្ទឹងត្រែង ក្រុងស្ទឹងត្រែង បណ្តាលឱ្យមានការផ្អើលឆោរឡោនៅក្នុងភូមិ និងលើបណ្តាញសង្គម Facebook។

មន្ដ្រីនគរបាលមូលដ្ឋាន បានឲ្យដឹងថា ​ជនសង្ស័យឈ្មោះ ខេន​ លីហុង​ អាយុ៣៥ឆ្នាំ​​ មុខរបរបើកបរ ដោយឡែកជនរងគ្រោះឈ្មោះ ផាត​ សុឈៀក​​ អាយុ២៧ឆ្នាំ​។

បើតាមនគរបាល ជនបង្ក និងជនរងគ្រោះជាប្ដីប្រពន្ធ​ទើបលែងលះគ្នាបានរយៈពេល៣ខែ ​(ត្រឹមភូមិឃុំ) ដោយជនបង្ក ចិត្តមិនដាច់ពីប្រពន្ធទើបធ្វើសកម្មភាពចាប់ប្រពន្ធ ទៅបង្ខាំងទុកក្នុងផ្ទះសំណាក់ដើម្បីសំស្នេហ៍ជាថ្មី។ បន្ទាប់ពីទទួលបានព័ត៌មាន​ កម្លាំងសមត្ថកិច្ចចម្រុះទាំងអាវុធហត្ថ និងនគរបាល បានរៀបចំកម្លាំងស្រាវជ្រាវបង្ក្រាប​ ដល់យប់ថ្ងៃដដែលទើប កម្លាំងអាវុធហត្ថក្រុង ឃាត់ជនសង្ស័យបាន​។

បច្ចុប្បន្នជនសង្ស័យ ត្រូវបានកសាងសំណុំរឿង ដើម្បីបញ្ជូនទៅចាត់ការតាមនីតិវិធី៕