(ភ្នំពេញ)៖ នៅក្នុងខែមករា ឆ្នាំ២០១៧នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់គ្រឿងឧបភោគ-បរិភោគ និងសម្ភារប្រើប្រាស់ជូន ប្រជាពលរដ្ឋងាយរងគ្រោះបំផុតចំនួន ៤,៤៣៣គ្រួសារ រស់នៅក្នុងខេត្តចំនួន៣ នៃព្រះរាជាណាចក្រកម្ពុជា ក្នុងនោះមាន ខេត្តស្វាយរៀង ចំនួន១,៧៥៥គ្រួសារ ខេត្តកំពង់ធំ ចំនួន៨៧៥គ្រួសារ និងខេត្តព្រៃវែងចំនួន១,៨០៣គ្រួសារ។
ក្រុមការងារទីស្នាក់ការកណ្តាល កាកបាទក្រហមកម្ពុជា នឹងនាំយកអំណោយមនុស្សធម៌ទាំងនេះ ទៅចែកជូនដល់ ដៃប្រជាពលរដ្ឋងាយរងគ្រោះទាំងនោះ ក្នុងពេលឆាប់ៗនេះ ទៅតាមកាលបរិច្ឆេទ សមស្របរបស់សាខាកាកបាទក្រហមកម្ពុជានៃខេត្ត ទាំងបីខាងលើនេះ ។
កាកបាទក្រហមកម្ពុជា ដែលមានសម្តេចព្រះមហាក្សត្រី នរោត្តម សីហនុ ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលជានិច្ចកាលតែងតែយកព្រះទ័យ និងយកចិត្តទុកដាក់ ចំពោះសុខទុក្ខប្រជាពលរដ្ឋ ជួបការលំបាកដោយមិនរើសអើង មិនប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការនយោបាយអ្វីឡើយ៕
