(ភ្នំពេញ)៖ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានទទួលជួបប្រតិភូវិទ្យាស្ថានមាត្រាសាស្ត្រជាតិ នៃប្រទេសអាល្លឺម៉ង់ ដឹកនាំដោយ​លោក Uwe Miener ( PTB, Head of Working Group Asia) នាថ្ងៃទី១២ ខែមករា ឆ្នាំ២០១៧ នេះដើម្បីស្វែងយល់ពីហេដ្ឋារចនាសម្ព័ន្ធ គុណភាព (QI) ក្នុងប្រទេសកម្ពុជា ដោយប្រមូលទិន្នន័យ និងសេចក្តីត្រូវការរបស់កម្ពុជា ពិតប្រាកដ ដើម្បីចងក្រងឲ្យទៅជាដំណើរការគម្រោង​ទ្វេភាគី រវាងកម្ពុជា និងអាល្លឺម៉ង់ ស្តីពីការងារហេដ្ឋា​រចនាសម្ព័ន្ធ គុណភាពដែលក្នុងនោះ ផ្តោតលើសសរស្តម្ភទាំងបី គឺ​ ការងារវាយតម្លៃទទួលស្គាល់ ការងារមាត្រាសាស្ត្រ និងការងារស្តង់ដារូបនីយកម្ម។

ទោះជាយ៉ាងណា លោក Uwe Miener ជាប្រធានគណៈប្រតិភូ និងសហការី បានវាយតម្លៃខ្ពស់ ចំពោះភាពរីកចម្រើននៃវិស័យទាំងបី ខាងលើរបស់កម្ពុជា។  ក្នុងនោះដែរ លោកប្រធានប្រតិភូ បានផ្តល់សារៈសំខាន់ទៅលើភាព រីកចម្រើននៃវិស័យខាងលើនេះ ទាក់ទងទៅ​នឹងការរៀបចំរចនាសម្ព័ន្ធគុណភាព កិច្ចសហការប្រទាក់ក្រឡាគ្នា ព្រមទាំងស្ថានភាពសេដ្ឋកិច្ច នៃប្រទេសនោះផងដែរ ។

លោក ទេសរដ្ឋមន្ត្រី ចម ប្រសិទ្ធ បានសម្តែងការស្វាគម៍ និងចាត់ទុកដំណើរបេសកកម្ម ស្វែងយល់របស់ប្រតិភូ PTB នឹងទទួលបានព័ត៌មាន និងធាតុចូលជាច្រើន ដើម្បីជាមូលដ្ឋានអនុវត្តគម្រោង ទ្វេភាគីបានជោគជ័យ ដើម្បីធ្វើឲ្យវិស័យនេះមានភាពរីកចម្រើន មានការទទួលស្គាល់​ទូលំទូលាយ និងទាញបានទំនុកចិត្ត​ខ្ពស់ពីអតិថិជន សម្រាប់ឲ្យការបម្រើ​ផលប្រយោជន៍ជាតិ ។ ជាមួយគ្នានេះ ការរៀបចំសិក្ខាសាលា នៅថ្ងៃទី ១៦ ខែ មករា ខាងមុខ លោកទេសរដ្ឋមន្ត្រី នឹងអញ្ជើញចូលរួមបើក ហើយសង្ឃឹមថា សិក្ខាសាលានេះ នឹងទទួលបានជោគជ័យ និងលទ្ធផលផ្លែផ្កាគួរជាទីមោទនៈ​៕