(ភ្នំពេញ)៖ រដ្ឋាភិបាលអាល្លឺម៉ង់ បានបង្ហាញអំពីបំណងរបស់ខ្លួន ក្នុងការបន្តកិច្ចសហការប្រតិបត្តិការ ជួយអភិរក្សផ្ទាំងសិលាតាមប្រាសាទបុរាណនានា នៅក្នុងប្រទេសកម្ពុជា។ គ្រោងនេះ ត្រូវបានស្វាគមន៍យ៉ាងខ្លាំងពីភាគីខាងកម្ពុជា ដែលចាត់ទុកថា ជារឿងល្អប្រសើរដល់ចំណងកាទូតប្រទេសទាំងពីរ។

សំណើរបស់ភាគីអាល្លឺម៉ង់ បានធ្វើឡើងនៅក្នុងជំនួបរវាង លោក Ingo Heinz Karsten ឯកអគ្គរដ្ឋទូតនៃប្រទេសអាល្លឺម៉ង់ប្រចាំនៅកម្ពុជានេះ ជាមួយ
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលធ្វើឡើងនៅទីស្ដីការក្រសួងការបរទេស កាលពីថ្ងៃទី១២ ខែមករា ឆ្នាំ២០១៧ម្សិលមិញ ។

តាមសេចក្តីប្រកាសរបស់ក្រសួងការបរទេស នៅថ្ងៃទី១៣ ខែមករា ឆ្នាំ២០១៧នេះ បានឱ្យដឹងថា នៅក្នុងជំនួបនោះ លោក Ingo Heinz Karsten បានបង្ហាញអំពីបំណងរបស់រដ្ឋាភិបាលអាល្លឺម៉ង់ ក្នុងការបន្តកិច្ចសហប្រតិបត្តិការជាមួយកម្ពុជា លើការអភិរក្សផ្ទាំងសិលានៅតាមប្រាសាទនានារបស់កម្ពុជា។

ក្រៅពីនេះ លោក Ingo Heinz Karsten ក៏បានជំរាបជូនលោកទេសរដ្ឋមន្រ្តីអំពីគម្រោងរបស់អាល្លឺម៉ង់ក្នុងការបញ្ជូនគណៈប្រតិភូរបស់សភាអាល្លឺម៉ង់ មកទស្សនកិច្ចនៅកម្ពុជា នៅដើមខែកុម្ភៈ​ខាងមុខនេះផងដែរ ដែលមានគោលដៅសំខាន់ គឺដើម្បីពិនិត្យអំពីលទ្ធភាពពង្រីកបន្ថែមទៀត នូវកិច្ចសហប្រតិបត្តិការទ្វេភាគី។

លោកទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស បានសម្ដែងនូវអំណរគុណ ចំពោះរដ្ឋាភិបាលអាល្លឺម៉ង់ ដែលកន្លងមកបានផ្ដល់នូវ
ការជួយឧបត្ថម្ភដល់កម្ពុជាលើផ្នែកអភិរក្សផ្ទាំងសិលានៅតាមប្រាសាទបុរាណនានា ហើយបានសម្ដែងនូវការស្វាគមន៍ចំពោះបំណងប្រាថ្នារបស់ រដ្ឋាភិបាលអាល្លឺម៉ង់ ក្នុងការបន្តនូវគំរោងជំនួយអភិរក្សផ្ទាំងសិលានេះថែមទៀត៕