(ភ្នំពេញ)៖ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានបញ្ជាក់ឱ្យដឹងថា ចំពោះកម្មវិធីជួបសំណេះសំណាលជាមួយ សម្តេចតេជោ ហ៊ុន សែន នាយករដ្ឋមន្រ្តី​នៃកម្ពុជា នៅថ្ងៃទី១៤ ខែមករា ឆ្នាំ២០១៦ ស្អែកនេះ​ គឺអង្គភាពនីមួយៗជាអ្នកជ្រើសរើសអ្នកកាសែតរបស់ខ្លួនដើម្បីចូលរួម មិនមែនក្រសួងជាអ្នកចុចឈ្មោះដោយផ្ទាល់ទេ។

លោក ខៀវ កាញារីទ្ធ បានប្រកាសបែបនេះ បន្ទាប់ពីមានអ្នកសារព័ត៌មានមួយចំនួន នៅតាមបណ្តាខេត្ត បានមានការតវ៉ា បន្ទាប់ពីក្រសួងបានអញ្ជើញ អភិបាលរងខេត្ត មន្រ្តីសាលាខេត្ត និងមន្រ្តីព័ត៌មានខេត្ត មកចូលរួមកម្មវិធីសំណេះសំណាលរបស់សម្តេចតេជោ ហ៊ុន សែន នៅសណ្ឋាគារសុខាភ្នំពេញ នាថ្ងៃទី១៤ ខែមករា ស្អែកនេះ។

លោក ខៀវ កាញារីទ្ធ បានសរសេរនៅលើបណ្តាញសង្គម Facebook របស់លោកនៅថ្ងៃទី១៣ ខែមករា ឆ្នាំ២០១៧នេះថា «ឃើញមានការតវ៉ា ពីសហសេវិកជា​អ្នកយក​ព័ត៌មាន​នៅតាមខេត្ត លើប្រការដែលក្រសួងអញ្ជើញអភិបាលរងខេត្ត មន្ត្រីសាលាខេត្ត និង មន្ត្រីមន្ទីរព័ត៌មានខេត្តមកចូលរួមក្នុងជំនួបជាមួយនាយករដ្ឋមន្ត្រី តែមិន​អញ្ជើញខ្លួន ដែលជាអ្នកយកព័ត៌មាន។ ខ្ញុំសូមបញ្ជាក់ថា មន្ត្រីព័ត៌មានខេត្តគឺមានបីនាក់ (អភិបាលរងខេត្ត មន្ត្រីសាលាខេត្ត និង មន្ត្រីមន្ទីរព័ត៌មានខេត្ត) ហើយការ​អញ្ជើញអស់លោកទាំងបីនាក់នេះ គឺដើម្បីអស់លោកទាំងនោះ បានស្គាល់ អ្នកកាសែត និង យល់ពីសំណូមពរអ្នកកាសែតកាន់តែច្បាស់ថែមទៀត។ ឯចំពោះ​សហសេវិកជាអ្នកកាសែត ផ្ទាល់គឺ អង្គភាពនីមួយៗ ដែលសហសេវិកយើងនៅធ្វើការជាមួយជាអ្នកចុចឈ្មោះហៅមិនមែនក្រសួងទេ»។

សូមបញ្ជាក់ថា ចំពោះករណីនេះ លោករដ្ឋមន្រ្តីក្រសួងព័ត៌មាន ក៏ធ្លាប់បានអះអាងដែរថា តំណាងសារព័ត៌មាន ដែលនឹងអញ្ជើញឱ្យជួប សម្តេចតេជោ ហ៊ុន សែន ស្អែកនេះគឺជាតំណាងសារព័ត៌មាន​ដែលមានការចេញផ្សាយជាប្រចាំថ្ងៃ និងជាទៀងទាត់។ ក្រៅពីនោះ ក៏មានអ្នកនាំពាក្យនៅតាមក្រសួងស្ថាប័ននានា ថែមទៀតផង៕