(តាកែវ)៖ លោក ឡាយ វណ្ណៈ អភិបាលខេត្តតាកែវ បានថ្លែងឲ្យដឹងថា ប្រទេសកម្ពុជាជាពិសេស​ខេត្តតាកែវ មានសក្ដានុពល​ជាច្រើនសម្រាប់​អ្នកវិនិយោគ ហើយសម្រាប់​ក្រុមហ៊ុន រោងចក្រ សហគ្រាស និងរោងសិប្បកម្មចិនវិញ មានចំនួន៣៥កន្លែង មានទុនវិនិយោគ​ជិត​២០០លានដុល្លារ ព្រមទាំងបង្កើតការងារ​ធ្វើជូនប្រជាពល​រដ្ឋរាប់​មឺុននាក់។

លោក ឡាយ វណ្ណៈ ក៏បានថ្លែងស្វាគមន៍ និងជំរុញលើកទឹកចិត្តចំពោះបណ្ដាល​គម្រោងវិនិយោគ​មកកាន់ខេត្តតាកែវ ហើយអាជ្ញាធខេត្ត និងបន្តការខឹតខំប្រឹងប្រែង​របស់ខ្លួន​ថែមទៀត ក្នុងគោលដៅបន្តពង្រឹងកិច្ចសហប្រតិបត្តិការ​សេដ្ឋកិច្ច ការបើកទូលាយការអភិវឌ្ឍន៍​វិស័យឧស្សាហកម្ម ព្រមទាំងបង្កើតបាន​នូវបរិយាកាសវិនិយោគ​ឲ្យកាន់តែ​ប្រសើរ មានលក្ខណៈទុកចិត្តបានសម្រាប់អ្នកវិនិយោគនិងធុរជន។

លោកអភិបាលខេត្តតាកែវ បានលើកឡើងបែបនេះ ខណៈលោកនិងក្រុមការងារ បានជួបជាមួយក្រុមគណៈប្រតិភូក្រុងស៊ាងយ៉ាង ខេត្ត​ហ៊ូប៉ី របស់សាធារណរដ្ឋ​ប្រជា​មានិត​ចិន​មួយក្រុម ដែលដឹកនាំដោយលោកអភិបាលក្រុង​ស៊ាងយ៉ាង សាន ឌឺហាវ ធ្វើទស្សនកិច្ច នៅក្នុងខេត្តតាកែវ រយៈពេលប្រមាណ៥ថ្ងៃ ដើម្បីសិក្សា​ស្វែងយល់ពីសក្ដា​នុពលនានា​របស់ខេត្ត ដើម្បីធ្វើការវិនិយោគ និងសហប្រតិបត្តិការលើវិស័យ​នានារវាងខេត្តតាកែវ​និងក្រុងស៊ាងយ៉ាង ដែលបានចុះអនុស្សារណៈ​យោគយល់គ្នាស្ដីពី​ទំនាក់ទំនងមិត្តភាព​រវាងខេត្តទាំងពីរ។

បន្ថែមបីលើនេះ លោក ឡាយ វណ្ណៈ ឲ្យដឹងថា ជាជំហានដំបូងក្រុមហ៊ុន​ផ​លិតចំណីសាច់ និងកាប់សាច់សត្វ និងធ្វើការវិនិយោគ លើទឹកប្រាក់​ប្រមាណ១០០លានដុល្លារ នៅក្នុងខេត្តតាកែវ និងរាជធានិភ្នំពេញ លើការចញ្ចឹមជ្រូកយកសាច់ ហើយមានក្រុមហ៊ុនមួយទៀត​មានបំណងនាំចេញអង្ករពីខេត្តតាកែវចំនួន ពី ៥ម៉ឺន ទៅ១០ម៉ឺនតោន ក្នុង១ឆ្នាំព្រមទាំងមាន​គម្រោងធ្វើការវិនិយោគ លើដំណាំស្រូវក្នុងខេត្តតាកែវផងដែរ។

ថ្លែងស្វាគមន៍នៅក្នុងឱកាសទទួលគណៈប្រតិភូក្រុង ស៊ាងយ៉ាង នៅលើទឹកដី​ខេត្តតាកែវ នៅថ្ងៃទី១២ ខែមករា ឆ្នាំ២០១៦ នៅសណ្ឋាគារដូនកែវ ក្រុងដូនកែវ លោក ឡាយ វណ្ណៈ អភិបាល​ខេត្តតាកែវ បានចាត់ទុកដំណើរ​ទស្សនកិច្ច ពិតជាមានសារសំខាន់​មួយតាមរយៈ​កិច្ចសហប្រតិបត្តិការ​រវាងខេត្តក្រុងទាំង២ និងប្រទេសទាំង២​ឲ្យកាន់តែប្រសើរ​ឡើង ជាពិសេស​ទៅទៀតនោះដំណើរ​ទស្សនកិច្ចនេះ នឹងផ្ដល់នូវកាលានុវត្តន៍​ភាពសំខាន់ៗពាក់ព័ន្ធ និងវិស័យវិនិយោគ ពាណិជ្ជកម្ម​រវាងខេត្តទាំង២។

លោកអភិបាលខេត្តតាកែវ បានឲ្យដឹងថា ស្ថានភាពប្រទេសកម្ពុជាបច្ចុប្បន្ន​ជាពិសេសខេត្តតាកែវ មានការអភិវឌ្ឍន៍​ដ៏គួរឲ្យភ្ញាក់ផ្អើល។ ស្ថានភាពទាំងអស់នេះ​ជាការខិតខំរបស់រាជរដ្ឋាភិបាល និងប្រជាជនកម្ពុជា​ទាំងមូល ហើយក៏មិនអាចកាត់ផ្ដាច់បាន​ពីការជួយឧបត្ថមគាំទ្រពី​បណ្ដាប្រទេស​ជាមិត្ត ជាពិសេសមិត្តចិន។ គ្រាន់តែនៅ​ក្នុងខេត្តតាកែវ មានមូលដ្ឋានផលិតកម្ម ឧស្សាហកម្មនិងសិប្បកម្ម​ដែលវិនិយោគ ដោយជន​ជាតិចិន មានចំនួន៣៥កន្លែង ដែលមានទុនវិនិយោគ​ប្រមាណជិត២រយលាន​ដុល្លាអាមេរិក និងបានបង្កើតការងារដល់ប្រជាពល​រដ្ឋក្នុងខេត្តរាប់ម៉ឺននាក់៕