(ភ្នំពេញ)៖ លោក ហ៊ុន ម៉ានិត នាយករងខុទ្ទការល័យ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា លើកទឹកចិត្តដល់ជនពិការដោយសារសង្គ្រាម មិនត្រូវអស់សង្ឃឹមក្នុងឆាកជីវិតនោះទេ ព្រោះនៅពេលនេះអ្វីៗមិនបាត់បង់ទៅតាម ការពិការភាពនោះទេ គឺត្រូវតែតស៊ូដើម្បីកសាងជីវភាពនៅក្នុងគ្រួសារឲ្យកាន់តែប្រសើរ។
ការថ្លែងលើកទឹកចិត្តបែបនេះរបស់លោក ហ៊ុន ម៉ានិត បានធ្វើឡើងនៅរសៀលថ្ងៃទី៦ ខែមករា ឆ្នាំ២០១៧ ក្នុងពិធីបរិច្ចាគជើងសិប្បនិម្មិតចំនួន១២០ ជូនដល់ជនពិការកម្ពុជា នាមជ្ឈមណ្ឌលកម្ចាត់មីនកម្ពុជា (CMAC)។
លោក ហ៊ុន ម៉ានិត បានលើកឡើងថា «អ្វីដែលយើងជួបប្រទះនេះ មិនមានជាបញ្ហាចុងក្រោយ សម្រាប់យើងនោះទេ ជីវិតយើងនៅមានដង្ហើម អ្វីៗមិនបានបាត់ ទៅជាមួយការពិការភាពនោះទេ ទោះជាមានការលំបាកជាងមុនក៏ដោយ ប៉ុន្ដែយើងនៅមានក្រុមគ្រួសារ និងរាជរដ្ឋាភិបាលនៅជាមួយជានិច្ច ហើយយើងខំប្រឹងប្រែងបន្ដជីវិតយើង និងបង្កើនជីវភាពយើងបន្ដទៀត»។
លោក ហ៊ុន ម៉ានិត បន្ថែមថា ប្រសិនបើមានការខិតខំប្រឹងប្រែងតស៊ូ អត់ធ្មត់ជោគជ័យនឹងមកដល់ ជាក់ស្ដែងក្នុងឱកាសចែកជើងសិប្បនិម្មិតនេះ គឺដើម្បីជួយសម្រួលក្នុងការរស់នៅ ការប្រកបរបបចិញ្ចឹមជីវិតផ្សេងៗ របស់បងប្អូនជនពិការ។
ជាមួយគ្នានោះដែរ លោក ហ៊ុន ម៉ានិត បានសម្ដែងនូវការថ្លែងអំណរគុណ ដល់ម្ចាស់ជំនួយទាំងអស់ ដែលជួយឧបត្ថម្ភ ទាំងថវិកា ឬសម្ភារៈផ្សេង ដែលជាការជួយសម្រួលដល់ជនពិការ៕
