(កណ្តាល)៖ លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីសម្រេច បង្កើតក្រុមការងារចុះវាស់វែង ប្រមូលទិន្នន័យ ដើម្បីចុះបញ្ជីដីមានលក្ខណៈ ជាប្រព័ន្ធជូនប្រជាពលរដ្ឋ ដែលមានវិវាទដីធ្លីជាមួយ លោកឧកញ៉ា ឡោក ហួរ មានទីតាំងនៅស្រុកកៀនស្វាយ និង ស្រុកស្អាង ខេត្តកណ្តាល ដែលទើបរាជរដ្ឋាភិបាលដោះស្រាយរួចរាល់។
សូមបញ្ជាក់ថា នៅថ្ងៃទី០៦ ខែមករា ឆ្នាំ២០១៧ ទីស្តីការគណៈរដ្ឋមន្រ្តី បានធ្វើលិខិតផ្ញើជូនទេសរដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដោយបង្ហាញពីលទ្ធផល នៃការស្រាវជ្រាវករណីវិវាទដីធ្លីប្រជាពលរដ្ឋ និងលោក ឡោក ហ៊ួរ នៅស្រុកកៀនស្វាយ ខេត្តកណ្តាល។
នៅក្នុងលិខិតរបស់ទីស្តីការគណៈរដ្ឋមន្រ្តី បានបញ្ជាក់ថា លោក ឡោក ហ៊ួរ បានរំលោភដីប្រជាពលរដ្ឋជាច្រើនពាន់ហិកតា ហើយរាជរដ្ឋាភិបាលសម្រេចដកហូតដី ដែលលោក ឡោក ហ៊ួរ បានរំលោភដីពីប្រជាពលរដ្ឋចំនួន ២៩៩៧,៩២ហិកតា ព្រមទាំងនិរាករណ៍ប័ណ្ណសំគាល់សិទ្ធិ កាន់កាប់អចលនវត្ថុចំនួន២៩ប័ណ្ណ៕
