(កំពង់ស្ពឺ)៖ កម្មករ-កម្មការិនីរោងចក្រកាត់ដេរ វីនសុនអ៊ិនធលហ្គាមេន (ខេមបូឌា) ជាង៦០០នាក់ បាននាំគ្នាធ្វើកូដកម្មនៅមុខសួនឧស្សាហកម្មវ៉ាយសេវេន មានទីតាំងស្ថិតនៅផ្លូវជាតិលេខ៤ ភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ដោយបានស្នើយ៉ាងទទូចដល់ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ជួយអន្តរាគមន៍ចាត់វិធានការជាបន្ទាន់ ព្រោះពួកគាត់សុទ្ធតែត្រូវការប្រាក់យកទៅបង់ថ្លៃផ្ទះ ថ្លៃទឹកភ្លើង និងដោះស្រាយជីវភាពប្រចាំថ្ងៃ។
ការធ្វើកូដកម្មនេះ កើតឡើងនៅថ្ងៃទី០៥ ខែមករា ឆ្នាំ២០១៧នេះ ក្នុងគោលបំណងដើម្បីទាមទារឱ្យម្ចាស់ទីតាំង និងលោកថៅកែរោងចក្រ បើកប្រាក់អត្ថប្រយោជន៍ផ្សេងៗជូនពួកគាត់ ព្រោះពួកគេរំលោភលើកិច្ចសន្យា ក្នុងអំឡុងពេលព្យួរការងារ។
តំណាងកម្មករម្នាក់បានថ្លែងឱ្យដឹងថា កម្មកររោងចក្របានធ្វើតវ៉ា និងទាមទារលក្ខខណ្ឌ ២ចំណុច បន្ទាប់ពីភាគីថៅកែរោងចក្រវីនសុន និងម្ចាស់ទីតាំងដែលគេស្គាល់ថា ជាឧកញ៉ា អ៊ី ឆែ បានឃុបឃិតគ្នាដឹកជញ្ជូនសម្ភាររោងចក្រចេញអស់ ខណៈពេលកម្មករកំពុងព្យួរការងារ រយៈពេល២ខែ គិតចាប់ពីថ្ងៃទី១១ ខែតុលា ឆ្នាំ២០១៦ ដល់ថ្ងៃទី២៩ ខែធ្នូឆ្នាំ២០១៦។
តំណាងកម្មករបានថ្លែងបន្តថា ក្នុងរយៈពេលកំពុងព្យួរការងារ កម្មករទាំងអស់បាននាំគ្នាទៅរកការងារផ្សេងៗ ដើម្បីទ្រទ្រង់ជីវភាព ស្រាប់តែពេលត្រឡប់មកវិញ លោកថៅកែ និងម្ចាស់ទីតាំង បានដឹកសម្ភារចេញអស់ទៅហើយ។
ក្នុងករណីនេះ កម្មករទាំងអស់បានទាមទារ ២ចំណុច៖ ទី១.សុំឱ្យក្រុមហ៊ុនទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗ តាមច្បាប់ស្តីពីការងារ ជូនកម្មករម្នាក់ៗតាមអតីតភាពការងារជាក់ស្តែង និងទី២.សុំឱ្យម្ចាស់ទីតាំងយកប្រាក់ថ្លៃកក់អគារចំនួន ៦ខែ មកទូទាត់ប្រាក់ឈ្នួល និងប្រាក់អត្ថប្រយោជន៍
ផ្សេងៗ។
ក្រុមកម្មករ-កម្មការិនីទាំងអស់ ក៏បានស្នើសុំលោកប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ស្ពឺ លោកអភិបាលខេត្តកំពង់ស្ពឺ និងជាពិសេសគឺការអន្តរាគមន៍ពីសំណាក់ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា មេត្តាជួយដោះស្រាយជូនកម្មករទាំង ជាង៦០០នាក់នេះ ដើម្បីទទួលបានប្រាក់យកទៅដោះស្រាយបញ្ហាមួយចំនួន ដូចជាថ្លៃឈ្នួលផ្ទះ ថ្លៃទឹកភ្លើង និងជីវភាពរស់នៅប្រចាំថ្ងៃ៕
