(ភ្នំពេញ)៖ អ្នកជោគជ័យ ក្នុងវិស័យអចលនទ្រព្យ លោក គីម ហ៊ាន ប្រធានសមាគមអ្នកវាយតំលៃ និងភ្នាក់ងារអចលនវត្ថុកម្ពុជា (CVEA) បានបង្ហាញពីកត្តា៦យ៉ាង ដែលធ្វើឲ្យ ពាណិជ្ជករកម្ពុជាមួយចំនួនធំ ទទួលបានជោគជ័យខ្ពស់ ក្នុងអាជីវកម្ម ដោយកត្តាធំៗទាំង នោះរួមមាន៖ ជំនាញដឹកនាំ ជំនាញគ្រង់គ្រង់ ជំនឿជឿជាក់ គំនិតច្នៃប្រឌិត យុទ្ធសាស្រ្ដ និងចក្ខុវិស័យ។

ការលើកឡើងរបស់ លោកប្រធានសមាគមអ្នកវាយតម្លៃអចលនវត្ថុរូបនេះ ធ្វើឡើងក្នុង «សិក្ខាសាលាបង្ហាញលទ្ធផល ស្រាវជ្រាវ​ថ្នាក់បណ្ឌិត» ដែលធ្វើឡើងនៅព្រឹកថ្ងៃទី០៥ ខែមករា ឆ្នាំ២០១៧ នាសាកលវិទ្យាល័យអាស៊ី អឺរ៉ុប។

លោក គីម ហ៊ាង បានថ្លែងថា កត្តាទាំង៦យ៉ាងនេះ បានជួយទៅដល់ពាណិជ្ជករកម្ពុជាមួយចំនួនធំ ឲ្យទទួលបានជោគជ័យខ្ពស់បំផុ​ត​​។ កត្តាដឹកនាំ គឺជាកត្តាមួយដែលទទួលបានជោគជ័យខ្ពស់ អ្នកដែលដឹកនាំល្អបំផុត គឺជាចេះធ្វើការជាក្រុម។ កត្តាគ្រប់គ្រង់ ក៏ជាផ្នែកមួយសំខាន់ដែរ ប្រសិនបើគ្មានជំនាញគ្រប់គ្រង់នោះ ការងារក៏មិនបានទទួលជោគជ័យនោះឡើយ។ ជំនឿជឿរជាក់លើខ្លួន​ឯង​គឺជាកត្តាសំខាន់បំផុតដែលមិនអាចខ្វះបាន។ ការច្នៃប្រឌិត គឺជាចំណែកមួយ ដើម្បីឲ្យយើង​បង្កើតអ្វីដែលថ្មី ។ ការចេះប្រើប្រាស់ យុទ្ធសាស្រ្ដ បានល្អប្រសើរ ក្រុមហ៊ុនដំណើរការយូរអង្វែង និងការសម្លឹងមើលចក្ខុវិស័យខ្ពស់ នាពេលអនាគត។

លោកបន្ថែមថា កត្តាទាំងនេះហើយ ដែលជម្រុញឲ្យពាណិជ្ជករកម្ពុជា ទទួលបានជោគជ័យខ្ពស់ យ៉ាងត្រចះត្រចង់។

លោកបណ្ឌិត ទ្រី ចាន់ធុច ប្រធានអង្គភាពគ្រប់គ្រង់ថ្នាក់ក្រោយបណ្ឌិត សាកលវិទ្យាល័យអាស៊ីអឺរ៉ុប បានថ្លែងថា ក្នុងថ្ងៃនេះលោក គីម ហ៊ាង បានលើកយកប្រធានបទ ការអនុវត្តន៍ជាក់ស្ដែង របស់សហគ្រិនអចលវត្ថុនៅកម្ពុជា។ គន្លឹះនៃភាពជោគជ័យ របស់សហគ្រិន​ក្នុងវិស័យអចលនទ្រព្យ សម្រាប់អ្នកដែលបញ្ចប់ថ្នាក់បណ្ឌិតទាំង២០នាក់ របស់សកវិទ្យាល័យអាស៊ីអឺរ៉ុបនេះ គឺពុំមានបេក្ខជនណាមួយ​ ធ្វើការសិក្សាទៅលើប្រធានបទនេះទេ ហើយនេះជាប្រធានបទថ្មី សម្រាប់ការបកស្រាយលើប្រធានបទនេះ គឺមានសារៈសំខាន់ណាស់ សម្រាប់ធនធានមនុស្ស ដើម្បីធ្វើការសិក្សា ព្រោះវិស័យនេះ គឺជាវិស័យមួយដែលមានសក្តានុពលសម្រាប់កម្ពុជា។

លោកបណ្ឌិតបានថ្លែងបន្ដទៀថា សម្រាប់ការជ្រើសរើសយកប្រធានបទនេះ គឺពិតជាល្អ ហើយបើឆ្លងតាមការវាយតម្លៃរបស់គណៈ​កម្មាការចំនួន២លើកឃើញថា មានការគាំទ្រពេញចិត្ត និងអនុញ្ញាតឲ្យបេក្ខជនធ្វើការសិក្សាស្រាវជ្រាវ លើប្រធានបទនេះឲ្យបាន​ល្អ។

លោកបណ្ឌិតបន្ដទៀតថា សព្វថ្ងៃនេះនៅកម្ពុជាពុំទាន់ មានសាលាដែលបណ្ដុះបណ្ដាល ទៅលើវិស័យដីធ្លីនោះទេ ប៉ុន្ដែមាន​នៅក្នុងកម្មវិធីសិក្សាមួយចំនួន សព្វថ្ងៃនេះ នៅខ្វះខាតផ្នែកវិស័យនេះច្រើន នៅថ្ងៃអនាគតប្រសិនបើមានស្ថាប័នធ្វើការបណ្ដុះ​​បណ្ដាល ទៅស៊ីជម្រៅនេះគឺជាការប្រសើរ៕