(ភ្នំពេញ)៖ លោក ស សុខា អនុប្រធានសហភាព សហព័ន្ធយុវជនកម្ពុជា ទទួលបន្ទុក៣ខេត្ត បានឲ្យដឹងថា នៅព្រឹកស្អែកនេះ សហភាពសហព័ន្ធយុវជនកម្ពុជា នឹងរៀបចំពិធីគោរពវិញ្ញាណក្ខន្ធអ្នកស្លាប់ ក្នុងជំនាន់ ប៉ុល ពត នៅមជ្ឈមណ្ឌលប្រល័យ ពូជសាសន៍ជើងឯក។
លោក ស សុខា បញ្ជាក់នៅលើ Facebook របស់លោក នារសៀលថ្ងៃទី៥ ខែធ្នូ ឆ្នាំ២០១៧នេះថា «ក្នុងនាមជាយុវជនជំនាន់ក្រោយ យើងខ្ញុំមានការសោកស្ដាយជាពន់ពេក ដែលកម្ពុជាបានជួបនឹងរបបវាលពិឃាតចន្លោះឆ្នាំ១៩៧៥ ដល់១៩៧៩ ហើយពិធីនាព្រឹកថ្ងៃស្អែក នៅជើងឯកនេះ គឺជាការគោរពវិញ្ញាណក្ខន្ធ ជាការសោកស្ដាយពីយុវជនជំនាន់ក្រោយ ជាការរំលឹក និងចងចាំមិនភ្លេចនូវរបបយង់ឃ្នង និងចងចាំដើមហេតុដែលនាំឲ្យ កើតរបបបែបនេះដែរ»។
លោកបន្ថែមថា យុវជនសូមប្រកាសចិត្តចងចាំដឹងគុណដល់យុវជនជំនាន់មុន ដែលបានសាមគ្គីគ្នាវាយរំដោះសង្គ្រោះប្រជាជនពីក្រញ៉ាំបីសាចនេះ បានរហូតថ្កុំថ្កើងដល់សព្វថ្ងៃ ដូច្នេះសូមអញ្ជើញបងប្អូនជនរួមជាតិ យុវជនចូលរួមពិធីជាមួយ ស.ស.យ.ក កុំបីខាន។
ជាមួយគ្នានោះ លោក ស សុខា បានរំលឹកថា «កាលណោះ (ពេលកើតសង្គ្រាម) ធនធានមនុស្ស ទាំងវ័យចាស់ វ័យកណ្ដាល យុវជន និងកុមារ របស់កម្ពុជា ត្រូវបាត់បង់ស្ទើរគ្មានសោះ ហេដ្ឋារចនាសម្ព័ន្ធ វត្តអារ៉ាម សាលារៀន មន្ទីរពេទ្យ អគារផ្សេងៗរងការខូចខាត និងក្លាយជាគុក ក្លាយជាឃ្លាំង ដោយអាចនិយាយថា ជាវាសនារបស់កម្ពុជាក៏បាន ប៉ុន្តែគឺសុទ្ធតែកើតចេញពីគំនិត និងអំពើរបស់មនុស្ស។ នាឆ្នាំ១៩៧០ មានរដ្ឋប្រហារទំលាក់សម្ដេចតា ដែលនាំឲ្យសង្គ្រាមស៊ីវិលឥតឈប់ រហូតដល់១៩៧៥ ក្រុមមេដឹកនាំ ប៉ុល ពត ដណ្ដើមកាន់កាប់បាន កម្ពុជាកាន់តែធ្លាក់ខ្លួនធ្ងន់មែនទែន»។
លោក ក៏បានឲ្យដឹងដែរថា រហូតមកដល់ថ្ងៃ៧ ខែមករា ឆ្នាំ១៧៩៧ ទើបរំដោះបានវិញ តែសង្គ្រាមស៊ីវិលនៅតែអូសបន្លាយ រហូត១៩៩៧-៩៨ ទើបបញ្ចប់ក្រោមនយោបាយឈ្នះ-ឈ្នះរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងគ្រានោះ ឃើញថារដ្ឋាភិបាលប្រើដៃម្ខាងស្ដារប្រទេសផង ដៃម្ខាងការពារកុំឲ្យរបបវាលពិឃាតត្រឡប់មកវិញផង ហើយក្នុងនាមជាអ្នកជំនាន់ក្រោយ មិនចង់ឃើញ សង្គ្រាម មិនចង់ឃើញការបំបែកបាក់ញុះញង់ផ្ទៃក្នុងពីសំណាក់ក្រុមណាមួយ ឫពីប្រទេសណាមួយជាដាច់ខាត។
លោកសង្កត់ធ្ងន់ថា «យុវជនរួមគ្នាជាមួយរាជរដ្ឋាភិបាល ការពារសន្តិភាព ទប់ស្កាត់មិនឲ្យសង្គ្រាម និងរបបបែប ប៉ុល ពត វិលត្រឡប់មក វិញឡើយ។ យុវជន ជឿជាក់លើកម្ពុជា !!!!»៕
