(ភ្នំពេញ)៖ ក្នុងឱកាសចូលរួមអបអរសាទរ ខួបលើកទី៣៨ ថ្ងៃជ័យជម្នះ ៧មករា ដែលជាថ្ងៃកំណើតទី២ របស់យេីងទាំងអស់គ្នា និងរបស់ប្រជាពលរដ្ឋខ្មែរទូទាំងប្រទេសនោះ នៅព្រឹកថ្ងៃទី៤ ខែមករា ឆ្នាំ២០១៧ នេះក្រុមការងារអនុសាខាកាកបាទក្រហមកម្ពុជា ខណ្ឌមានជ័យ ដឹកនាំដោយ លោក ឌី រត្ន័ខេមរុណ អភិបាលរងខណ្ឌមានជ័យ និងជាប្រធានគណៈកម្មាធិការអនុសាខាខណ្ឌមានជ័យ រួមជាមួយក្រុមការងារ សមាជិក សមាជិកាបានអញ្ជើញចុះសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ផ្តល់ជូនប្រជាពលរដ្ឋជួបការខ្វះខាតក្នុងជីវភាពរស់នៅប្រចាំថ្ងៃ ចំនួន៤០គ្រួសារ រស់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ។
លោកប្រធានគណៈកម្មាធិការអនុសាខា បានផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលយកចិត្តទុកដាក់ និងផ្តល់ក្តីអាណិត ស្រឡាញ់ ចំពោះប្រជាពលរដ្ឋរងគ្រោះនិង ងាយរងគ្រោះគ្រប់ប្រភេទ គ្រប់ពេលវេលា ទីកន្លែង គ្រប់ស្រទាប់វណ្ណៈ ដោយពុំមានប្រកាន់ពូជសាសន៍ ឬនិន្នាការនយោបាយអ្វីឡើយ ។
លោក ឌី រត្ន័ខេមរុណ បានជម្រាបជូនបងប្អូនប្រជាពលរដ្ឋថា ដោយមាន ថ្ងៃ៧មករា ទេីបមានថ្ងៃនេះ ក្រោមការដឹកនាំរបស់ប្រមុខរាជរដ្ឋាភិបាល យេីងមានសន្តិភាពពេញបរិបូរណ៍ និងការអភិវឌ្ឍន៍គ្រប់វិស័យ ដូច្នេះ «ថ្ងៃ ៧មករា ជាថ្ងៃកំណេីតទី២ របស់យេីងទាំងអស់គ្នា និងរបស់ប្រជាពលរដ្ឋខ្មែរទូទាំងប្រទេស»។
លោក ឌីរត្ន័ខេមរុណ ក៏បានលើកឡើងអំពីថ្ងៃជ័យជំនះ៧មករា ឆ្នាំ១៩៧៩ ដែលប្រទេសជាតិទាំងមូល និងប្រជាជនរាប់សិបលាននាក់ បានរស់រានមានជីវិតរហូតមកដល់សព្វថ្ងៃ ដោយសារតែគុណបំណាច់ថ្ងៃ៧មករា នេះហើយដែលបានធ្វើឱ្យប្រទេសជាតិមានការអភិវឌ្ឍរីកចំរើនរហូតមកដល់ពេលបច្ចុប្បន្ន ដែលទាំងនេះគឺដោយសារតែការលះបង់របស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបូជាសាច់ស្រស់ ឈាមស្រស់ និងក៏មានការចូលរួមពី យុទ្ឋជន យុទ្ឋនារីជាច្រើននាក់ទៀតក្នុងការផ្តួលរលំរបបប្រល័យពូជសាសន៍ ប៉ុលពត ៣ឆ្នាំ ៨ខែ នឹង២០ថ្ងៃ ហើយប្រជាជនទូទាំងប្រទេស បានចាត់ទុកថា ថ្ងៃ៧មករា ជាថ្ងៃកំណើតទី២ របស់យើងទាំងអស់គ្នា និងបានចារទុកក្នុងប្រវត្តិសាស្រ្តផងដែរ។
មិនតែប៉ុណ្ណោះ រាជរដ្ឋាភិបាលតែងតែប្រារព្ឋធ្វើខួបអនុស្សារីយ៍ជារៀងរាល់ឆ្នាំ ដោយគិតមកដល់ពេលនេះ ទិវាជ័យថ្ងៃ៧មករា (១៩៧៩ - ២០១៧) មានរយៈពេល៣៨ឆ្នាំហើយ។
ជាមួយគ្នានេះ លោកអភិបាលរងខណ្ឌ ក៏បានស្នើដល់បងប្អូនប្រជាពលរដ្ឋ អញ្ជើញទៅពិនិត្យបញ្ជីឈ្មោះបោះដំបូង ដែលបានផ្សាយនៅតាមទីតាំងដែលយើងបានទៅចុះឈ្មោះ ដើម្បីផ្ទៀងផ្ទាត់ឈ្មោះ ថ្ងៃ ខែ ឆ្នាំកំណើត ហើយបើមានខុស សូមបងប្អូនទៅជួបមន្ត្រីចុះឈ្មោះ ដើម្បីធ្វើការកែតម្រូវ។
លោក ឌី រត្ន័ខេមរុណ បានបញ្ជាក់ថា អំណោយដែលនាំមកជូននាពេលនេះ ក្នុងគ្រួសារនីមួយៗទទួលបានថវិកា២០,០០០រៀល អង្ករ៣០គីឡូក្រាម មី១កេស ទឹកត្រី ទឹកស៊ីអុីវ១យួរ ទឹកសុទ្ឋ១យួរ ស្ករស១គីឡូក្រាម ទឹកក្រូច៣កំប៉ុងតែ២កញ្ចប់ទឹកដោះគោ ១កំប៉ុងត្រីខ១កំប៉ុង៕
