(ភ្នំពេញ)៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នៅរសៀលថ្ងៃទី០២ ខែមករា ឆ្នាំ២០១៧នេះ បានដឹកនាំមន្រ្តីក្រសួងសាធារណការ និងដឹកជញ្ជូនជាច្រើនរូប ចូលគោរពព្រះវិញ្ញាណក្ខន្ធសម្តេច ស៊ីសុវត្ថិ ជីវ័ន្តមុនីរក្ស ដែលកំពុងតម្កល់ធ្វើព្រះរាជពិធីបុណ្យនៅវត្តបុទុមវតី។
លោកទេសរដ្ឋមន្រ្តី ស៊ុន ចាន់ថុល បានសម្តែងនូវសមានទុក្ខដ៏ក្រៀមក្រំជាមួយព្រះញាតិវង្សរបស់ព្រះអង្គ និងបានចាត់ទុកការសោយទិវង្គតរបស់ព្រះអង្គ ជីវ័ន្តមុនីរ័ក្ស ជាការបាត់បង់ដ៏ធំធេងរបស់សង្គមជាតិ។
ក្នុងលិខិតចូលរួមរំលែកព្រះរាជមរណទុក្ខ លោក ស៊ុន ចាន់ថុល បានថ្លែងថា «ស្ថិតក្នុងបរិយាកាសដ៏ក្តុកក្តួលក្រៀមក្រំគ្មានទីបំផុតនេះ ទូលព្រះបង្គំ យើងខ្ញុំទាំងអស់គ្នា សូមសម្តែងនូវសមានទុក្ខ ដ៏ក្រៀមក្រំជ្រាលជ្រៅបំផុត ព្រមទាំងក្តីសង្វេគដ៏មហាធំធេង និង ពោរពេញដោយក្តីសោកស្តាយ អាឡោះអាល័យ ជាអនេកចំពោះការសោយទិវង្គតសម្តេច ស៊ីសុវត្ថិ ជីវ័ន្តមុនីរ័ក្ស ឧត្តមទីប្រឹក្សាផ្ទាល់ព្រះមហាក្សត្រ ។ ការសោយទិវង្គតរបស់ព្រះអង្គ គឺជាការបាត់បង់រាជវង្សមួយអង្គ ដែលបានចូលរួមចំណែកកសាងប្រទេសជាតិ និងការអភិវឌ្ឍជាតិមាតុភូមិ ព្រមទាំងបានលះបង់កម្លាំងកាយចិត្ត ធនធាន ពេលវេលាគ្រប់កាលៈទេសៈ ដោយបានចូលរួមចំណែកយ៉ាងសកម្មជាមួយព្រះមហាក្សត្រក្នុងការបម្រើឧត្តមប្រយោជន៍ជូនជាតិ មាតុភូមិរហូតអស់មួយព្រះជន្ម»។
សម្តេច ស៊ីសុវត្ថិ ជីវន្តមុនីរ័ក្ស បានសោយទិវង្គត ១០៖៤៥នាទីព្រឹកថ្ងៃពុធ ទី២៨ ខែធ្នូ ឆ្នាំ២០១៦នេះ ក្នុងព្រះជន្មាយុ ៨០ព្រះវស្សា ដោយព្រះរោគាពាធ នៅព្រះរាជដំណាក់របស់ព្រះអង្គ ក្នុងសង្កាត់ទឹកថ្លា ខណ្ឌសែនសុខ ខាងក្រោយក្រសួងពាណិជ្ជកម្ម។ សម្តេច ស៊ីសុវត្ថិ ជីវន្តមុនីរ័ក្ស គឺជាបុត្រារបស់សម្តេច ស៊ីសុវត្ថិ មុនីវង្ស និងត្រូវជាព្រះបិតុលាបង្កើត (ឪពុកមា) ព្រះបរមរតនកោដ្ឋ នរោត្តម សីហនុ ផងដែរ។
សម្តេច ស៊ីសុវត្ថិ ជីវន្តមុនីរ័ក្ស គឺជាឧត្តមប្រឹក្សា នៃអង្គព្រះមហាក្សត្រ ហើយក៏ធ្លាប់បានធ្វើជាអនុប្រធានទី១ នៃព្រឹទ្ធសភាជាតិនីតិកាលទី១ និងទី២ផងដែរ៕
