(ភ្នំពេញ)៖ កម្លាំងនគរបាលខណ្ឌជ្រោយចង្វារ បានបើកប្រត្តបត្តិការ ដាក់៣គោលដៅទាំងព្រឹក ដើម្បីអនុវត្តន៍យុទ្ធនាការបង្ក្រាបគ្រឿងញៀន ទូទាំងប្រទេស រហូតអាចឈានទៅឡោមព័ទ្ធ បង្ក្រាបក្រុមប្រើប្រាស់គ្រឿងញៀនស្រីប្រុស ជាបន្តបន្ទាប់ ដល់ទៅ១៤នាក់ និងដកហូតបានថ្នាំញៀន១៦កញ្ចប់ រួមជាមួយសម្ភារ ជក់ហ្ស៊ីហ្សា និងឧបករណ៍ប្រើប្រាស់គ្រឿងញៀនមួយចំនួនផងដែរ។
លោកវរសេនីយ៍ត្រី ឯក សេរីវុធ អធិការរងនគរបាល ខណ្ឌជ្រោយចង្វារ បានបញ្ជាក់ថា ក្នុងប្រត្តបត្តិការបង្ក្រាបក្រុមគ្រឿងញៀននេះ ត្រូវបានធ្វើឡើងដោយប្រើពេលមួយព្រឹកថ្ងៃទី២ ខែមករា ឆ្នាំ២០១៧ ស្ថិតក្នុងសង្កាត់ជ្រោយចង្វារ និងសង្កាត់ជ្រោយចង្វារ។
លោកថា ប្រតិបត្តិការនេះ បានធ្វើឡើងបន្ទាប់ពីទទួលបានការណែនាំពីលោកវរសេនីយ៍ឯក សៀម សុត្ថាវុធ អធិការនគរបាលខណ្ឌជ្រោយចង្វារ ដើម្បីអនុវត្តន៍យុទ្ធនាការបង្ក្រាបគ្រឿងញៀន ទូទាំងប្រទេស ដោយកម្លាំងនគរបាលមូលដ្ឋានប៉ុស្ដិ៍ជ្រោយចង្វារ និងកម្លាំងនគរបាលមូលដ្ឋានប៉ុស្ដិ៍បាក់ខែង សហការជាមួយកម្លាំងនគរបាលខណ្ឌ បានបើកប្រត្តបត្តិការដាក់៣គោលដៅទាំងព្រឹក ដោយកំណត់បាននូវទីតាំងរហូតឈានទៅដល់ការឡោមព័ទ្ធបង្ក្រាបជនសង្ស័យបាន១៣នាក់ ជាបន្តបន្ទាប់ក្នុងនោះមានស្រី៣នាក់ ដែលបក្ខពួកទាំងនេះ កំពុងធ្វើសកម្មភាពប្រើប្រាស់គ្រឿងញៀន និងដកហូតបានថ្នាំញៀន១២កញ្ចប់តូចរួមនិងឧបករណ៍ប្រើប្រាស់គ្រឿងញៀន សម្ភារជក់ហ្ស៊ីហ្សាមួយចំនួន ស្ថិតក្នុងសង្កាត់បាក់ខែង។
លោក ឯក សេរីវុធ បានបញ្ជាក់ទៀតថា ក្រោយបង្ក្រាបបក្ខពួកប្រើប្រាស់គ្រឿងញៀនបាន១៣នាក់ ប្រហែលជាកន្លះម៉ោងក្រោយ កម្លាំងនគរបាលយើងបានបន្តទៅកំណត់ទីតាំងមួយកន្លែងទៀត ស្ថិតក្នុងសង្កាត់បាក់ខែង អាចឈានទៅឡោមព័ទ្ធរហូតឃាត់ខ្លួនជនប្រើប្រាស់គ្រឿងញៀន បានម្នាក់ទៀត ដកហូតបានថ្នាំញៀន៤កញ្ចប់ និងអាវុធកែច្នៃ១ដើម រួមនិងឧបករណ៍ប្រើប្រាស់គ្រឿងញៀនមួយចំនួនបន្ថែម។
អធិការរងដដែលបានឲ្យដឹងថា ក្រោយបង្ក្រាបក្រុមប្រើប្រាស់គ្រឿងញៀនទាំង១៤នាក់ជាបន្តបន្ទាប់ រួមជាមួយវត្ថុតាង ដែលដកហូតបានក្នុងប្រត្តបត្តិការអនុវត្តន៍យុទ្ធនាការបង្ក្រាបគ្រឿងញៀននូវទូទាំងប្រទេសនេះ ត្រូវបញ្ជូនមកសាកសួរ នៅអធិការដ្ឋាននគរបាលខណ្ឌជ្រោយចង្វារ ដើម្បីបន្តអនុវត្តន៍តាមនិតិវិធី៕
