(ភ្នំពេញ)៖ កម្លាំងនគរបាលការិយាល័យ​នគរបាល​ព្រហ្មទណ្ឌ​កំរិតស្រាល​រាជធានីភ្នំពេញ ក្រោមការបញ្ជាផ្ទាល់ពីនាយឧត្តមសេនីយ៍ ជួន សុវណ្ណ បានបង្ក្រាបក្រុមចោរប្លន់ កាប់យកម៉ូតូ៤នាក់ ដែលបានធ្វើសកម្មភាព នៅចំណុចមណ្ឌល​កំសាន្តបឹង​បៃតង ភូមិច្រេស សង្កាត់ភ្នំពេញ​ថ្មី ខណ្ឌ​សែនសុខ នៅថ្ងៃទី២៩ ខែធ្នូ ឆ្នាំ២០១៦កន្លងទៅ និងដកហូតបានម៉ូតូរបស់ជនរងគ្រោះ១គ្រឿងផងដែរ។

លោក ប៊ុន សត្យា នាយការិយាល័យព្រហ្មទណ្ឌកម្រិតស្រាល បានឲ្យដឹង នៅព្រឹកថ្ងៃទី៣១ ខែធ្នូ ឆ្នាំ២០១៦នេះថា​​ ក្រោយមានសភាពការណ៍កើតឡើង កម្លាំងការិយាល័យ បានធ្វើការស្រាវជ្រាវយ៉ាងយកចិត្តទុកដាក់ ឈានទៅឃាត់ខ្លួនបានជនសង្ស័យចំនួន៣​នាក់​ នៅចំណុចម្តុំកន្លែងប៉ះកង់ ក្បែរផ្សារដីហុយ សង្កាត់ភ្នំពេញ​ថ្មី ខណ្ឌ​សែនសុខ​ ដែលជនសង្ស័យទី១៖ ឈ្មោះ ហាប ម៉េ​ង​ហុង អាយុ១៧​ឆ្នាំ, ទី២៖ ឈ្មោះ សុខ ពេជ្រ អាយុ១៩ឆ្នាំ និងទី៣៖ ឈ្មោះ ម៉ៅ ប៊ុនធឿន អាយុ១៧ឆ្នាំ ជនសង្ស័យទាំង៣នាក់ ស្នាក់នៅ ភូមិត្រពាំង​ស្វាយ សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ។

លោកនាយការិយាល័យ បានបន្ថែមថា ​ក្រោយពីមានចម្លើយសារភាព នៅព្រឹកថ្ងៃទី​​៣០ ខែធ្នូ ឆ្នាំ២០១៦ កម្លាំងការិយាល័យបន្ដឃាត់ខ្លួន ​ជនសង្ស័យម្នាក់ទៀត ឈ្មោះ សេង គឹមសុង អាយុ១៦ឆ្នាំ​។

បើតាមលោក ប៊ុន សត្យា ​ក្រោយឃាត់ខ្លួនកម្លាំងជំនាញរបស់លោក ដកហូតបានម៉ូតូ១គ្រឿង ម៉ាកស្មាស់​វី ពណ៌ខ្មៅ ពាក់​ស្លាកលេខ ភ្នំពេញ1CW-3150 ហើយបានប្រគល់ជូនជនរងគ្រោះដែលមានម្ចាស់ម៉ូតូ ឈ្មោះ ផុន ឡុង ភេទ​ប្រុស​។

បច្ចុប្បន្នជនសង្ស័យទាំងនេះ ត្រូវបានកម្លាំងជំនាញកសាងសំណុំរឿង ដើម្បីបញ្ជូនទៅចាត់ការបន្ដតាមនីតិវីធី៕