(ភ្នំពេញ)៖ ដោយសារតែបច្ចុប្បន្នអាកាសធាតុ មានការប្រែប្រួល និងមានខ្យល់ត្រជាក់នៃរដូវរងារ ទើបក្រសួងសុខាភិបាល បានចេញនូវសេចក្ដីណែនាំ អំពីវិធីសាស្រ្ដសាមញ្ញមួយចំនួន ដល់ប្រជាពលរដ្ឋ ដើម្បីឲ្យចេះការពារ និងថែរក្សាសុខភាព នារដូវត្រជាក់នេះ ជៀសវាងជំងឺដង្កាត់ ដែលអាចកើតមានជាយថាហេតុ។

ក្រសួងសុខាភិបាល បានណែនាំឲ្យប្រជាពលរដ្ឋថែរក្សាសុខភាព តាមបែបសាមញ្ញមួយចំនួនដូចជា៖

* ត្រូវស្លៀកពាក់ខោអាវក្រាស់ៗ រុំកនឹងកន្សែង ពាក់មួកនិងស្រោមដៃរងា ដើម្បីការពារកុំឲ្យធាតុត្រជាក់ប៉ះខ្លួនប្រាណដោយចំហរ​​ ធ្វើយ៉ាងណាឲ្យមានការរក្សាកំដៅ ក្នុងខ្លួនជាធម្មតា។

* ចូរស្វែងរកការព្យាបាលវេជ្ជសាស្រ្ដ នៅគ្រឹះស្ថានសុខាភិបាល ប្រសិបើលោកអ្នកមានរោគសញ្ញា ពិបាកដកដង្ហើម គ្រុនក្ដៅ ក្អក ឈឺក និងឈឺសាច់ដុំ ឬមានបញ្ហាសុខភាពផ្សេងៗទៀត។

* ចូរចាំថា គួរធ្វើដំណើរតែនៅពេលដែលលោកអ្នកមានសុខភាពល្អ ហើយប្រសិនបើលោកអ្នកគិតថា លោកអ្នកមានជំងឺផ្ដាសាយ ឬមិនស្រួលខ្លួន (ឈឺ)  គួរពន្យារផែនការធ្វើដំណើរ របស់លោកអ្នក រហូតដល់មានសភាពស្រួលបួល យ៉ាងហោច​ណាស់២៤ម៉ោង ក្រោយពីមានស្ថានភាពមិនស្រួលខ្លួន ហើយមិនត្រូវប្រើប្រាស់ឱសថប្រភេទអង់ទីប៊ីយូទិក ដោយគ្មានវេជ្ជបញ្ជានោះឡើយ។

* ពេលលោកអ្នក ក្អក ឬកណ្ដាស សូមខ្ទប់មាត់ជាមួយក្រដាស ក្រណាត់ ឬកន្សែងស្អាត។ បើគ្មានក្រណាត់ឬកន្សែង សូមក្អក ឬកណ្ដាស់ដោយយកអាវខ្ចប់មាត់ មិនត្រូវប្រើដៃទទេរបស់លោកអ្នកនោះឡើយ។

* លាងសម្អាតដៃរបស់លោកអ្នក ឲ្យបានញឹកញាប់ជាមួយសាប៊ូ និងទឹក ហើយជៀសវាងយកដៃលោកអ្នកទៅប៉ះពាល់ ភ្នែក ច្រមុះ និងមាត់របស់លោកអ្នក ប្រសិនបើមិនទាន់បានលាងសម្អាតទេនោះ។

* បើប្រាស្រ័យទាក់ទងជាមួយអ្នកឈឺ ត្រូវចេះការពារខ្លួន កុំឲ្យមានការចម្លងរោគ ដោយមិនត្រូវជិតស្និទ្ធពេក និងអនុវត្តវិធានការ ដូច​បានជម្រាបជូនខាងលើនេះ។

* សម្រាប់ទារក កុមារ និងមនុស្សវ័យចំណាស់ គឺមានហានិភ័យខ្ពស់ ទាក់ទងនឹងជំងឺបណ្ដាលមកពីអាកាសធាតុត្រជាក់ ​​​​​​​​​​ដូច្នេះទារកដែលមានអាយុតិចជាង ១ឆ្នាំមិនគួរឲ្យដេក ក្នុងបន្ទប់ត្រជាក់នោះឡើយ។ ការផ្ដល់សម្លៀកបំពាក់កក់ក្ដៅ និងដណ្ដប់ភួយសម្រា​ប់ទារកឲ្យបានត្រឹមត្រូវ ដើម្បីព្យាយាមរក្សាសីតុណ្ហភាព ឲ្យបានកក់ក្ដៅសម្រាប់ខ្លួនប្រាណពួកគេ ក៏ដូចជានៅក្នុងបន្ទប់របស់ទារក។

* មនុស្សវ័យចំណាស់ ជាញឹកញប់មានកំដៅរាងកាយតិច ដោយសារតែការរំលាយអាហារក្នុងរាងកាយយឺត និងសកម្មភាពរាងកាយមានតិច ឬចុះថយដែលអាចធ្វើឲ្យសីតុណ្ហភាព ក្នុងរាយកាយថយចុះជាងធម្មតា។ ដូច្នេះមនុស្សវ័យចំណាស់ ក៏មានហានិភ័យដែរ ដែល​បណ្ដាលឲ្យមានគ្រោះថ្នាក់ដល់អាយុជីវិត ដោយសារតែការឆ្លើយតប យឺតរបស់រាងកាយជាមួយភាពត្រជាក់ ជាពិសេសអ្នកមានជំងឺ​ទឹកនោមផ្អែម និងជំងឺបេះដូង។

* កុមារ និងមនុស្សវ័យចំណាស់ គួរតែស្លៀកពាក់សម្លៀកបំពាក់ច្រើនជាន់ ឬក្រាស់ៗពេលមានអាកាសធាតុត្រជាក់ ដើម្បីរក្សាភាព​កក់ក្ដៅក្នុងខ្លួនគាត់។ ជៀសវាងសម្លៀកបំពាក់តឹង ពីព្រោះ វាអាចរំខានដល់ចរាចរឈាម ក្នុងរាងកាយ និងបណ្ដាលឲ្យបាត់បង់កំដៅ​រាងកាយ។

* កុមារ និងមនុស្សវ័យចំណាស់គួរពាក់មួក និងស្រោមជើង នៅពេលចេញក្រៅក្នុងពេល មានអាកាសធាតុត្រជាក់ ដើម្បីរក្សាកំដៅ​ក្នុង​រាងកាយ ដែលអាចបាត់បង់តាមរយៈដៃ ក្បាល និងជើង។

* ពិសាទឹកឲ្យបានញឹកញាប់ ដើម្បីចៀសវាងការបាត់បង់ជាតិទឹក និងពេលសរីរាង្គខិតខំទប់ទល់នឹងភាពត្រជាក់។

សម្រាប់ព័ត៌មានបន្ថែម សូមទាក់ទងទូរស័ព្ទទាន់ហេតុការណ៍ 115 ដោយឥតគិតថ្លៃ៕