(ភ្នំពេញ)៖ លោក​មេធាវី​ ពេជ​ រតនា​ ជាប់​ចោទ​ពី​បទ «ប៉ុនប៉ង​សូកប៉ាន់​ចៅក្រម​» តាម​មាត្រា​២៧ និង​៥១៨ នៃ​ក្រម​ព្រហ្មទណ្ឌ​​កំណត់​ការ​ផ្តន្ទា​ទោស ​ដាក់​ពន្ធនាគារ​ពី​៥ឆ្នាំ​ទៅ​១០ឆ្នាំ​ ។ លោក​ ស្វាយ​ តុញ​​ ប្រធាន​ក្រុម​ប្រឹក្សា​ជំនុំជម្រះ​សាលា​ដំបូង​រាជធានី​ភ្នំពេញ​ នៅ​ព្រឹក​ថ្ងៃ​ទី​៣០​ ខែធ្នូ​ ឆ្នាំ​២០១៦​ ប្រកាស​សាលក្រម​ផ្តន្ទា​ទោស​លោក​មេធាវី​ ពេជ​ រតនា​ ដាក់​ពន្ធនាគារ​រយៈពេល​៥ឆ្នាំ​ តែ​អនុវត្ត​ទោស​ត្រឹម​២ឆ្នាំ​ប៉ុណ្ណោះ​។​

ការ​សម្រេច​នេះ​មាន​ន័យ​ថា​ តុលាការ​បាន​ផ្តន្ទា​ទោស​លោក​មេធាវី​ ពេជ​ រតនា​ ​ក្នុង​កម្រិត​ទាប​បំផុត​ ហើយ​ព្យួរទោស​៣ឆ្នាំ​ឲ្យ​ថែម​ទៀត​ផង​។

កាលពី​ថ្ងៃ​ទី​២៩​ ខែធ្នូ​ ឆ្នាំ​២០១៦​ សាលា​ដំបូង​រាជធានី​ភ្នំពេញ​ ក៏​បាន​ប្រកាស​សាលក្រម​សំណុំ​រឿង​ ប្រព្រឹត្ត​អំពើពុករលួយ​ មួយ​ករណី​ដែរ​។​ ប៉ុន្ដែ​លោក​ វ៉ាត​ ពិសិដ្ឋ​ ក្រឡាបញ្ជី​តុលាការ​កំពូល​ ហាក់​មាន​ «ភ័ព្វសំណាង»​ ដែល​ត្រូវ​បាន​តុលាការ​ផ្តន្ទា​ទោស​ដាក់​ពន្ធនាគារ​៣ឆ្នាំ ​តែ​អនុវត្ត​ទោស​ក្នុង​ពន្ធនាគារ​ត្រឹម​៥ខែ​ប៉ុណ្ណោះ​ ហើយ​លោក​នឹង​ត្រូវ​ដោះលែង​ឲ្យ​មាន​សេរីភាព​ឡើងវិញ​នា​ដើម​ខែ​មករា​ ឆ្នាំ​២០១៧​ខាងមុខ​នេះ​ ។

សូមជំរាបថា​ លោក​មេធាវី​ ពេជ​ រតនា​ សារភាព​ថា​ លោក​ពិត​ជា​បាន​យក​ប្រាក់​មួយ​ចំនួន​ ដើម្បី​សូកប៉ាន់​ចៅក្រម​ស៊ើបសួរ​ ដើម្បី​កុំ​ឲ្យ​ឃុំ​ខ្លួន​កូន​ក្ដី​ប្រាកដមែន​ ។​ ប៉ុន្តែ​ចៅក្រម​ ពុំ​ព្រម​ទទួល​ រួច​ក៏​ត្រូវ​សមត្ថកិច្ច​អង្គភាព​ប្រឆាំង​អំពើ​ពុករលួយ​ ឃាត់ខ្លួន​តែ​ម្តង​។ លោក​មេធាវី​ ពេជ​ រតនា​ សារភាព​បែប​នេះ​នា​សវនាការ​កាល​ព្រឹក​ថ្ងៃ​ទី​៨​ ខែ​ធ្នូ​ ឆ្នាំ​២០១៦​ នៅ​សាលា​ដំបូង​រាជធានី​ភ្នំពេញ​កន្លង​ទៅ​​។​

លោក​មេធាវី​ ពេជ​ រតនា​ បាន​និយាយ​ក្នុង​សវនាការ​ទៀត​ថា​ ខ្លួនពិតជាបានយកលុយចំនួន៥០០០ដុល្លារពីកូនក្តីឈ្មោះ សេង សាវី ភេទស្រី ទៅសុំតម្កល់ឲ្យចៅក្រមស៊ើបសួរ ឈ្មោះ ជួន សុរាសី មែនដើម្បីជាការតម្កល់កុំឲ្យចៅក្រមស៊ើបសួររូបនោះឃាត់ និងឃុំខ្លួនកូនក្តីលោក ខណៈដែលកូនក្តីលោកជាប្តីអ្នកស្រី សេង សាវី ត្រូវបានតុលាការចាប់ឃុំខ្លួនពាក់ព័ន្ធរឿងដីធ្លីរួចមកហើយ។ ប៉ុន្តែ​ចៅក្រមស៊ើបសួរ មិនព្រមទទួលយកសំណើសុំ ជាការតម្កល់ប្រាក់នោះទេ ហើយនៅគ្រាដែលលោកចាកចេញពី​សាលា​ដំបូង​រាជធានី​ភ្នំពេញ​ ក៏ត្រូវសមត្ថកិច្ច​អង្គភាពប្រឆាំងអំពើពុករលួយឃាត់ខ្លួនតែម្តង​៕