(ភ្នំពេញ)៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និង ដឹកជញ្ជូន បានបង្ហាញផែនការពង្រីកកំពង់ផែស្វយ័ត ភ្នំពេញ និងព្រះសីហនុ ឲ្យមានសមត្ថភាពកាន់តែខ្ពស់បន្ថែមទៀតក្នុងការផ្ទុកកុងតឺន័រ ក៏ដូចជាការចេញចូលរបស់នាវា ដើម្បីឆ្លើយតប កំណើនពាណិជ្ជកម្ម។
ក្នុងពិធីបិទសន្និបាតបូកសរុបការងារឆ្នាំ២០១៦ និងលើកទិសដៅសម្រាប់ឆ្នាំ២០១៧ របស់ក្រសួងសាធារណការ និងដឹកជញ្ជូននៅ រសៀលថ្ងៃទី២៩ ខែធ្នូ ឆ្នាំ២០១៦នេះ លោកទេសរដ្ឋមន្រ្តី ស៊ុន ចាន់ថុល បានបង្ហាញថា ក្នុងទិសដៅអភិវឌ្ឍន៍ឆ្នាំ២០១៦-២០១៨ កំពង់ផែស្វយ័តភ្នំពេញ មានផែនការពង្រីកផែកុងតឺន័រ LM17 ឲ្យមានសមត្ថភាពទទួលកុងតឺន័រឲ្យបាន ៣០ម៉ឺនកុងតឺន័រក្នុងមួយឆ្នាំ។ ក្នុងនោះមានការសាងសង់ទីលានកុងតឺន័របន្ថែមលើផ្ទៃដីទំហំ ៥ហិកតា បំពាក់រថយន្តស្ទូចកងតឺន័រលើទីលានចំនួន ៤គ្រឿង និងទិញរថ យន្តដឹកជញ្ជូនចំនន ២៤គ្រឿង។
កំពង់ផែ ក៏នឹងរៀបចំឲ្យមានហេដ្ឋារចនាសម្ព័ន្ធនៅចំណតផែគីឡូម៉ែត្រលេខ៦ ដើម្បីតភ្ជាប់ឲ្យមានការដឹកជញ្ជូនរវាងផ្លូវដែក ផ្លូវគោក និងផ្លូវទឹក។ រៀបចំឲ្យមានហេដ្ឋារចនាសម្ព័ន្ធសមស្របបន្ថែមទៀតនៅចំណតផែទន្លេបិត ស្ថិតក្នុងខេត្តត្បូងឃ្មុំ ដើម្បីជំរុញឲ្យមានការដឹកជញ្ជូនទំនិញកសិផលតាមផ្លូវទឹកពីបណ្តាខេត្តផ្នែកខាងលើ នៃទន្លេមេគង្គ។
កំពង់ផែស្វយ័តភ្នំពេញ ក៏មានផែនការបូមស្តារប្រឡាយនាវាចរណ៍ក្នុងតំបន់ទន្លេមេគង្គក្រោម ដើម្បីឲ្យមានជម្រៅទឹក ៧.៥ម៉ែត្រ ដែលអាចឲ្យនាវាចំណុះ ៥,០០០តោន អាចចូលមកចំណតផែ។ កំពង់ផែ ក៏នឹងបូមស្តារប្រឡាយនាវាចរណ៍ក្នុងតំបន់ទន្លេមេង្គលើសំដៅសម្រួលការដឹកជញ្ជូនតាមផ្លូវក្នុងស្រុកពីបណ្តាខេត្តភូមិភាគឦសាន។
សម្រាប់កំពង់ផែស្វយ័តខេត្តព្រះសីហនុវិញ គ្រោងសាងសង់ចំណតផែកុងតឺន័រប្រវែង ៣៥០ម៉ែត្រ ជម្រៅទឹក ១៤,៥ម៉ែត្រ ទីលានកុងតឺ ន័រ និងឋបនីយភ័ណ តម្លៃប៉ាន់ស្មាន ១៤០លានដុល្លារអាមេរិក។ បន្ថែមពីលើនោះ កំពង់ផែ ក៏នឹងបំពាក់គ្រឿងចាក់លើកដាក់កុងតឺន័រទំនើបប្រភេទ OC ចំនួន ៣គ្រឿង និងប្រភេទ RTG ចំនួន ៩គ្រឿង និងឧបករណ៍លើកដាក់ទំនិញកុងតឺន័រមួយចំនួន ដោយប្រើប្រាស់ ប្រាក់កម្ចីតម្លៃប្រមាណ ៦០លានដុល្លារអាមេរិក។
យោងតាមរបាយការណ៍របស់ក្រសួងបានឲ្យដឹងថា នៅឆ្នាំ២០១៦នេះ កំពង់ផែស្វយ័តភ្នំពេញ និងខេត្តព្រះសីហនុ រកចំណូលបានសរុប ប្រមាណ ៧០លានដុល្លារអាមេរិក៕
