(ភ្នំពេញ)៖ ជាថ្មីម្តងទៀតកញ្ញា ធី សុវណ្ណថា ដែលគេដឹងថា ជាតារាFacebook មួយរូបនៅកម្ពុជា និងជាប្រធានអង្គការយុវជនកិច្ចការសង្គម បានបញ្ជាក់នៅក្នុងវីដេអូឃ្លីបរបស់ខ្លួនថា កញ្ញា សុំបដិសេធទាំងស្រុងនូវព័ត៌មានថា កញ្ញាបែកបាក់ផ្ទៃក្នុង និងឈ្លោះគ្នាជាមួយលោក ផែ សុវណ្ណារិទ្ធ និងលោក ស្រី ចំរើន។

កញ្ញា ធី សុវណ្ណថា «ខណៈនេះពួកខ្ញុំមិនមានបញ្ហាអ្វីហ្នឹងគ្នាទេ គឺលោក ស្រី ចំរើន កំពុងចុះទៅមុលដ្ឋានបំពេញបេសកកម្ម នៅខេត្តកោះកុងលើគម្រោង សាងសងផ្លូវដែលជាកម្រោងអង្គការខ្ញុំ ហើយគាត់នៅបំពេញការងារបន្តបន្ទាប់ទៀត ចំណែកខ្ញុំ និងលោក ផែ សុវណ្ណារិទ្ធ ក៏គ្មានបញ្ហាអ្វីហ្នឹងគ្នាដែរ នេះលោក ផែ សុវណ្ណារិទ្ធ កំពុងបើកឡាន ពួកខ្ញុំគ្មានបញ្ហាអ្វីជាមួយគ្នានោះទេ»។

ការអះអាងជាថ្មីម្តងទៀតរបស់ កញ្ញា ធី សុវណ្ណថា បានធ្វើឡើងក្រោយពេលដែលមានសារព័ត៌មាន នៅលើបណ្តាញសង្គមក៏ដូចជា នៅលើសារព័ត៌មានមួយចំនួនថា រូបនាង និងក្រុមការងារលោក ស្រី ចំរើន ព្រមទាំងក្រុមការងារ ផែ សុវណ្ណរិទ្ធ បែកបាក់ និងមានទំនាស់ជាមួយគ្នា ហើយថា កញ្ញា ធី សុវណ្ណថា បាននិងកំពុងរៀបចំពាក្យបណ្តឹង និងសហការជាមួយសមត្ថកិច្ច ដើម្បីចាប់ខ្លួនបុគ្គលទាំងនោះពីបទប្រមាទនិងទំលាយឯកសារឯកជន៕