(ភ្នំពេញ)៖ គណៈកម្មការតំបន់ឡានឆាង-មេគង្គ ដែលជាស្ថាប័នសិក្សាស្រាវជ្រាវមួយ បង្កើតនៅឆ្នាំ២០១៥ ដោយមានប្រទេសកម្ពុជា ចិន ថៃ ឡាវ និងវៀតណាម ជា​សមាជិក​នោះ នៅថ្ងៃទី២៨ ខែធ្នូ ឆ្នាំ២០១៦នេះ បានបើកសិក្ខាសាលាលើកដំបូងមួយ ស្ដីពីកិច្ចសហប្រតិបត្តិការតំបន់ឡានឆាង-មេគង្គ ដើម្បីប្រមូលធាតុចូល​ពីអ្នកជំនាញ​នានា សំដៅរៀបចំផែនការអនុវត្តរបស់ខ្លួន បន្តទៅមុខទៀត។

ថ្លែងប្រាប់អ្នកសារព័ត៌មាន លោក គង់ ភោគ នាយកប្រតិបត្តិនៃវិទ្យាស្ថានកម្ពុជាសម្រាប់សិក្សាយុទ្ធសាស្រ្ត (CISS) បានឲ្យដឹងថា «កិច្ចប្រជុំនេះ បានផ្ដល់ជាឱកាសសំខាន់ សម្រាប់ឲ្យអ្នកស្រាវជ្រាវ និងអ្នកបច្ចេកទេសពីប្រទេសជាសមាជិ ក្នុងតំបន់ឡានឆាង-មេគង្គ បានធ្វើការផ្លាស់ប្ដូរចំណេះដឹង បទពិសោធន៍ និងផ្ដល់ជាគំនិត ដើម្បីឲ្យ​គំនិតផ្ដួច​ផ្ដើមនៃការបង្កើតគណៈកម្មការនេះ ទទួលបានជោគជ័យ»។

លោកនាយក គង់ ភោគ បានបន្តថា គំនិតផ្ដួចផ្ដើមនៃការបង្កើតគណៈកម្មកាតំបន់ឡានឆាង-មេគង្គនេះ គឺដើម្បីជំរុញឲ្យមានការរីកចម្រើនក្នុងតំបន់ និងដើម្បីថែរក្សា​សន្តិភាព ស្ថិរភាពក្នុងតំបន់ឲ្យបានយូរអង្វែង។ គោលដៅសំខាន់ គឺដើម្បីឲ្យប្រទេសក្នុងតំបន់ មានការសម្របសម្រួលគោលនយោបាយ ជំរុញឲ្យមានការអភិវឌ្ឍបានលឿន និងធ្វើឲ្យគោលនយោបាយរបស់ប្រទេសជាសមាជិក មានភាពស៊ីចង្វាក់គ្នា។

លោក គង់ ភោគ បានបន្ថែមថា «កម្មវត្ថុនៃកិច្ចប្រជុំនាពេលនេះ មានភាពទូលំទូលាយជាមុន គឺមានដល់ទៅ ២៦ចំណុច ជាវិស័យអាទិភាពរបស់ប្រទេស​ជាសមាជិក ដែលពីមុនមានតែការពិភាក្សាលើវិស័យពាណិជ្ជកម្ម និងការគ្រប់គ្រងធនធានធម្មជាតិ ប្រកបដោយនិរន្តរភាព ប៉ុណ្ណោះ»។

មិនត្រឹមតែប៉ុណ្ណោះ លោកបានបញ្ជាក់ថា ថ្វីត្បិតតែគណៈកម្មការតំបន់ឡានឆាង-មេគង្គនេះ ស្ថិតក្រៅក្របខណ្ឌរដ្ឋាភិបាល នៃប្រទេសជាសមាជិក ក៏ពិតមែន តែគណៈ​កម្មការ​នេះ បានផ្ដល់ជាព័ត៌មាន គំនិតដ៏សំខាន់ និងផ្ដល់ជាដំណោះស្រាយដល់រដ្ឋាភិបាលទាំងនោះ ដែលបានមកពីការសិក្សាស្រាវជ្រាវ នាពេលកន្លងមក។

លោកបន្តទៀតថា រយៈពេលប៉ុន្មានឆ្នាំចុងក្រោយនេះ បណ្ដារដ្ឋាភិបាលទាំងនេះ បានយកចិត្តទុកដាក់ និងជំរុញឲ្យគណៈកម្មការមួយនេះ បន្តការសិក្សាស្រាវជ្រាវ​លើវិស័យ​អាទិភាពមួយចំនួនទៀត  ដើម្បីស្វែងរកកាលានុវត្តថ្មីៗ សម្រាប់ជាប្រយោជន៍ដល់វិស័យរដ្ឋ និងវិស័យឯកជន ផងដែរ៕