(កណ្តាល)៖ ដោយអនុវត្តន៍តាមភារកិច្ចស្នូល របស់កងរាជអាវុធហត្ថ បង្ការ បង្ក្រាប និងសង្គ្រោះ ដែលជាយន្តកាដឹកនាំដ៏មានប្រសិទ្ធភាព របស់នាយឧត្តមសេនីយ៍ សៅ សុខា អគ្គមេបញ្ជាការរងនៃ កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស និងលោក ម៉ៅ ភិរុណ អភិបាលខេត្តកណ្តាល លោកឧត្តមសេនីយ៍ត្រី សំ តុលា មេបញ្ជាការ កងរាជអាវុធហត្ថខេត្តកណ្តាល តែងតែយក ចិត្តទុកដាក់ក្នុងការអនុវត្តន៍ យន្តកាខាងលើ ពិសេសលោកមេបញ្ជាការបានជំរុញ ដាស់តឿនក្រើនរំលឹក ដល់ជំនាញ មេបញ្ជាការគ្រប់ លំដាប់ថ្នាក់ឲ្យធ្វើសកម្មភាពបង្ការ បង្ក្រាប សង្គ្រោះ ជាប្រចាំដូចភ្លៀងរលឹម ហើយបង្ក្រាបបានជាបន្តបន្ទាប់មិនឈប់ទាល់តែអស់បទល្មើស ពិសេសបទល្មើសគ្រឿងញៀន។
ជាក់ស្តែង នៅថ្ងៃទី២៧ ខែធ្នូ ឆ្នាំ២០១៦ កម្លាំង អ.ហ ស្រុកលើកដែក ដឹកនាំដោយលោកមេបញ្ជាការស្រុក ប្រាក់ សាមិត្ត សហការជាមួយ កម្លាំងមន្ទីរយុត្តិធម៌ អ.ហ ខេត្តកណ្តាល ចុះដឹកនាំផ្ទាល់ដោយលោកមេបញ្ជាការរង ទូច អ៉ីណាន និងលោក វ.ត្រី អ៊ុយ សុវណ្ណា ប្រធានមន្ទីរ ក្រោមការសម្របសម្រួលនីតិវិធី ដោយលោកព្រះរាជអាជ្ញា លឹម សុគន្ធា បានបន្តចុះបង្ក្រាបករណី រក្សាទុក ប្រើប្រាស់ និងជួញដូរសារធាតុ ញៀននៅចំណុច មាត់អូរក្រោយភូមិ ស្ថិតក្នុងភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ដោយចាប់ខ្លួនជនសង្ស័យ ចំនួន៦នាក់ ព្រមទាំងដកហូតថ្នាំញៀនចំនួន៦៤កញ្ចប់ ក្នុងនោះមួយកញ្ចប់ធំផងដែរ។
មន្រ្តីអាវុធហត្ថខេត្តកណ្តាល បានបញ្ជាក់ថា ជនសង្ស័យទាំង៦នាក់ ដែលត្រូវចាប់ខ្លួននោះរួមមាន: ទី១ឈ្មោះ ប៉ាវ រ៉ាវី អាយុ៣០ឆ្នាំ មុខរបរមិនពិតប្រាកដ ទីលំនៅភូមិឃុំកើតហេតុ ទី២ ឈ្មោះ ថុល វណ្ឌី អាយុ២២ឆ្នាំ មុខរបរមិនពិតប្រាកដ ទីលំនៅភូមិឃុំកើតហេតុ ទី៣ ឈ្មោះ វ៉ាន វី អាយុ ២៥ ឆ្នាំ មុខរបរមិនពិតប្រាកដ ទីលំនៅភូមិឃុំកើតហេតុ ទី៤ ឈ្មោះ ស៉ិន ពន្លឺ អាយុ១៨ឆ្នាំ មុខរបរមិនពិតប្រាកដ ទីលំនៅភូមិថ្មី ឃុំថ្មី ស្រុកពាមរក៍ ខេត្តព្រៃវែង ទី៥ ឈ្មោះ កែវ ទី អាយុ២២ឆ្នាំ មុខរបរបើកបរ ទីលំនៅភូមិ៥ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង និង ទី៦ឈ្មោះ លី ក្តី អាយុ២២ឆ្នាំ មុខរបរកម្មករ ទីលំនៅភូមិ៥ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង។
បើតាមមន្រ្តីអាវុធហត្ថ ក្រៅពីការដកហូតវត្ថុតាងជាម៉្សៅក្រាមពណ៌សរចំនួន៦៤កញ្ចប់ កម្លាំងប្រតិបត្តិការ បានដកហូតទូរស័ព្ទ៤គ្រឿង ដាវសាមូរ៉ៃ២ដើម និងសម្ភារវេចខ្ចប់ប្រើប្រាស់មួយចំនួនទៀត។
បច្ចុប្បន្ន ជំនាញកំពុងស្រាវជ្រាវបន្ត និងអនុវត្តតាមនីតិវិធីច្បាប់៕
