(ភ្នំពេញ)៖ ដោយមានការអាណិតអាសូរ ដល់លោកតាព្រឹទ្ធាចារ្យល្ខោនខោល លោកតា យិត សារិន ហៅលោកគ្រូ ស ដែលមានវ័យរហូតដល់៩១ឆ្នាំទៅហើយ កំពុងធ្លាក់ខ្លួនឈឺ រហូតបញ្ជូនទៅសង្គ្រោះនៅក្នុងប្រទេសថៃ កាលពីពេលថ្មីនេះ ម្ចាស់ភោជនីយដ្ឋាន បាយ័ន និងសិប្បកម្ម បាយ័នសំរងធម្មជាតិ បាននាំយកថវិកាមួយចំនួន និងទឹកផ្លែឈើ ឧបត្ថម្ភជូនដល់លោកតា ដើម្បីរំលែកនូវក្ដីទុក្ខលំបាក និងជួយសម្រាលថ្លៃព្យាបាលមួយចំនួន។
លោកស្រី ថេ ដាឡែន ម្ចាស់ភោជនីយដ្ឋានបាយ័ន និងសិប្បកម្ម បាយ័នសំរងធម្មជាតិ បានថ្លែងឲ្យដឹងថា ដោយមើលឃើញពីភាពលំបាក និងក្ដីអាណិតអាសូរ ចំពោះអ្នកសិល្បៈបុរាណខ្មែរ កំពុងធ្លាក់ខ្លួនឈឺ គឺលោកតា យិត សារិន ទើបលោកស្រីបាននាំយកថវិកា ឧបត្ថម្ភជូនដល់លោកតា ដែលកំពុងសម្រាកព្យាបាល នៅក្នុងមន្ទីរពេទ្យកាល់ម៉ែត ខណៈស្ថានភាពជំងឺរបស់លោកតា នៅមិនទាន់ជាសះស្បើយនៅឡើយ។
លោកស្រីបន្តទៀតថា នេះគឺជាទឹកចិត្តសប្បុរសធម៌មួយ ដែលបងប្អូនប្រជាពលរដ្ឋខ្មែរត្រូវតែមាន និងត្រូវចេះជួយគ្នាទៅវិញទៅមក នៅក្នុងគ្រាអាសន្នអន់ក្រ ហើយលោកស្រីក៏សូមអំពាវនាវ ដល់សប្បុរសជន នានាដទៃទៀត សូមជួយដល់លោកតាល្ខោនខោល យិត សារិន ដែលលោកតា ជាធនធានសិល្បៈមួយ បានបន្សល់ទុកនូវស្នាដៃជាច្រើន ដល់កូនខ្មែរជំនាន់ក្រោយ ជាពិសេសកេរដំណែលល្ខោនខោល ដែលត្រូវបានពិភពលោក កំពុងតែចាប់អារម្មណ៍ ហើយក៏ជាការរួមចំណែកចូលរួម អភិរក្ស នូវសិល្បៈវប្បធម៌របស់ខ្មែរយើង ផងដែរ។
សូមបញ្ជាក់ថា ម្ចាស់ភោជនីយដ្ឋាន បាយ័ន និងសិប្បកម្ម បាយ័នសំរងធម្មជាតិ នាពេលកន្លងមក តែងតែធ្វើសកម្មភាពមនុស្សជួយដល់សង្គម ដល់ជនទីទ័លក្រ ជាពិសេស គឺបានចូលរួមយ៉ាងសកម្ម ជាមួយនឹងសកម្មភាពរបស់ជនពិការ នៅក្នុងប្រទេសកម្ពុជា៕
