(ភ្នំពេញ)៖ Page Facebook «Wanderlust Guide» បានដឹកនាំក្រុមការងារចំនួន៧ នាក់ ក្នុងនោះមានតារាសម្ដែង នាង ភិន សុដាលីស ម្នាក់ផងដែរ ឆ្ពោះទៅកាន់​ប្រទេសកូរ៉េខាងត្បូង រយៈពេល៨ថ្ងៃ ដើម្បីធ្វើការសិក្សាស្វែងយល់ ពីតំបន់ទេសចរណ៍នានា និងឲ្យបានជ្រួតជ្រាបជាមុន ពីកញ្ចប់តម្លៃសេវាកម្មទេសចរណ៍ផ្សេងៗ ក្នុងន័យផ្ដល់ភាពងាយស្រួល នៅពេលអតិថិជន ធ្វើដំណើរកម្សាន្ត តាមរយៈក្រុមហ៊ុនទេសចរណ៍ របស់ខ្លួន។

កញ្ញា ឆរដ្ឋ ឆលាភី អ្នកគ្រប់គ្រងទូទៅប្រចាំ Page «Wanderlust Guide» បានថ្លែងឲ្យដឹងមុនពេលចេញដំណើរ នាយប់ថ្ងៃទី២៦ ខែធ្នូ ឆ្នាំ២០១៦ នៅឯព្រលានយន្តហោះ អន្តរជាតិភ្នំពេញ ថា ការនាំក្រុមការងារចេញដំណើរ ទៅការទីក្រុង សេអ៊ូល ប្រទេសកូរ៉េខាងត្បូង នៅពេលនេះ គឺក្នុងគោលបំណង ដើម្បីសិក្សាស្វែងយល់ ពីតម្លៃកញ្ចប់សេវាកម្ម ទេសចរណ៍ ទស្សនាតំបន់កម្សាន្តនានា ក្នុងន័យឲ្យបានដឹងជាមុន ងាយក្នុងការនាំអ្នកទេសចរណ៍ ពីប្រទេសកម្ពុជា ក៏ដូចជាពិប្រទេសនានា ពេលពួកគាត់ចង់ទៅកម្សាន្ត នៅក្នុងប្រទេសកូរ៉េ។

អ្នកគ្រប់គ្រងវ័យក្មេងមានរូបឆោម លោមពណ៌ស្រស់ស្អាត មិនចាញ់តារាសម្ដែងរូបនេះ បានបន្តឲ្យដឹងទៀតថា កន្លងមកក្រុមទេសចរណ៍របស់ម្ដាយនាង (KU Tourism) ដោយរូបនាងផ្ទាល់ បានធ្វើដំណើរសិក្សា ពីកញ្ចប់តម្លៃសេវាកម្ម តាមបណ្ដាប្រទេសនានា ក្នុងតំបន់អាស៊ី ជាច្រើនរួចមកហើយ ប៉ុន្តែនៅពេលនេះ នាងបានដឹកនាំ ក្រុមការងារ ទៅកាន់ប្រទេសកូរ៉េ រយៈពេល៨ថ្ងៃ ក្នុងនោះក្រុមការងារក៏បានរៀបចំ ថតជាវីដេអូឃ្លីប បង្ហាញពីតំបន់ទេសរណ៍ សេវាកម្មម្ហូបអាហារ សណ្ឋាគារ កន្លែងដែលគួរដើរកម្សាន្ត របៀបរបបនៃការធ្វើដំណើរ ជាដើម ដើម្បីជាទុនមួយ ចាំបាច់ត្រូវតែដឹងជាមុន មុនពេលនាំភ្ញៀវទេចរណ៍ ទៅកាន់ប្រទេសកូរ៉េ។

កញ្ញា ឆរដ្ឋ ឆលាភី បានសង្កត់ធ្ងន់ថា ដោយសារតែម្ដាយរបស់នាង មានក្រុមហ៊ុនទេសរណ៍ផ្ទាល់ខ្លួន ឈ្មោះថា « KU Tourism» ដែលបានបម្រើអតិថិជន អស់រយៈពេលជាច្រើនឆ្នាំមកហើយ ទើបនាងត្រូវតែស្វែងយល់ពីការងារទេសចរណ៍នេះ ឲ្យបានទូលំទូលាយ ទាំងក្នុង និងក្រៅប្រទេស។ ជាមួយគ្នានេះ Page Facebook «Wanderlust Guide» ដែលមានរូបនាងផ្ទាល់ជាអ្នកគ្រប់គ្រង ក៏បានផ្ដល់នូវព័ត៌មាន អំពីសេវាកម្មទេសចរណ៍នានាជាច្រើន ទាំងក្នុង និងក្រៅប្រទេស ដែលធ្វើឲ្យលោកអ្នក ឬអតិថិជន អាចតាមដាន និងស្វែងយល់ ឲ្យកាន់តែច្បាស់ មុននឹងសម្រេចចិត្តចេញដំណើរកម្សាន្ត តាមរយៈក្រុមហ៊ុនទេសចរណ៍របស់នាង ឬក្រុមហ៊ុនដទៃ។

សូមបញ្ជាក់ថា ក្រុម Page «Wanderlust Guide» ដែលបានធ្វើដំណើរទៅកាន់ប្រទេសកូរ៉េ នៅពេលនេះ គឺមានសមាជិកទាំងអស់ចំនួន៧ នាក់ ក្នុងមានដូចជា កញ្ញា ឆរដ្ឋ ឆលាភី, កញ្ញា ឆរដ្ឋ ឆឡេតា, អ្នកនាង ភិន សុដាលីស, សូ តារា , ឌី ពិដោរ និង កញ្ញា គង់ សូលីយ៉ា។ បន្ទាប់ពីទស្សនកិច្ចនេះ ត្រូវបានបញ្ចប់ ក្រុម Page «Wanderlust Guide» នឹងបង្ហាញនូវសមិទ្ធផល វីដេអូឃ្លីបមួយ ស្ដីពីតំបន់ទេសចរណ៍នានា
និងសេវាកម្មផ្សេងៗ នៅក្នុងប្រទេសកូរ៉េ ដើម្បីឲ្យអ្នកគាំទ្រ Page របស់ខ្លួន និងអតិថិជន បានដឹងជាមុន មុននឹងទៅកម្សាន្ត នៅក្នុងប្រទេសកូរ៉េ៕